稅務上訴委員會

稅務上訴委員會（英文：Board of Review (Inland Revenue Ordinance)，縮寫：BOR）係香港獨立嘅法定團體，1947年根據《稅務條例》﹙第112章﹚第65條嘅規定成立，負責喺稅務上訴作出聆訊同裁決。

提出上訴

任何人士可以喺符合以下任何一種情況之下，以書面形式向委員會書記發出上訴通知，提出上訴：

1. 當事人已經對任何評稅作出有效嘅反對，但係稅務局局長喺考慮嗰項反對嘅時候冇同佢達成協議，佢就可以喺局長嘅書面決定送交畀當事人之後嘅一個月內提出上訴；嗰份上訴通知必須附有以下資料：
   1. 局長嘅決定書副本一份；
   2. 上訴理由陳述書一份。
2. 當事人根據《稅務條例》第82A條被評定補加稅後，可以喺評稅通知書發出日期計起一個月內提出上訴；嗰份上訴通知必須附有以下資料：
   1. 評稅通知書副本一份；
   2. 上訴理由陳述書一份；
   3. 如果曾經接獲局長根據第82A(4)條發出嘅擬評定補加稅通知書，就要提交嗰份通知書嘅副本一份；
   4. 上訴人根據第82A(4)條作出嘅任何書面申述嘅副本一份。

聆訊小組嘅組成

組成同職能

聆訊小組最少由三名成員組成，其中一人一定要係主席或副主席（簡稱主訊人），負責喺稅務上訴作出聆訊同裁決。委員會喺聆訊審議嘅任何事項，需要由出席聆訊並根據嗰件事項表決嘅成員以過半數票決定；如果票數相同，就由主訊人除咗佢原有嘅一票之外，亦有權投決定票。

聆訊通知書

書記要喺接獲上訴通知書之後，編定嗰項聆訊上訴嘅時間，並需要畀上訴人同局長14日嘅上訴聆訊通知。喺聆訊上訴前任何時間，上訴人可以憑住交畀委員會書記嘅書面通知，將上訴取消；或上訴人同局長可以根據上訴人嘅評稅款額達成和解。凡係喺上訴達成和解，上訴人同局長需要簽署一份要有和解條款嘅和解書作為書面記錄，並需要將嗰份和解書呈交畀委員會批註。

出面網頁

• 稅務上訴委員會