跳去內容

邪惡問題

出自維基百科,自由嘅百科全書
(由邪惡論證跳轉過嚟)
伊比鳩魯希臘文:Ἐπίκουρος;341-270 BCE)嘅雕像;佢係個古希臘哲學家,而且據講係最早提出邪惡問題嘅人[1]

邪惡問題粵拼ce4 ok3 man6 tai4 / 英文problem of evil),又有叫罪惡問題,係宗教哲學上一條好出名嘅問題。條問題係噉嘅:「如果真係有個全知全能全善上帝存在,點解呢個世界會有邪惡痛苦?」

呢條問題喺「上帝係咪存在」嘅討論當中引起咗巨大嘅爭議,到咗廿一世紀初世人對呢條問題仲未有一致嘅共識。

背景概念[編輯]

内文:宗教哲學

邪惡問題本質上係屬於宗教哲學嘅範疇,喺「上帝係咪存在」相關嘅討論上成日會有人提起[2]

邪惡存在[編輯]

内文:邪惡痛苦
睇埋:

首先,諗吓邪惡痛苦嘅概念:事實表明,自然界無時無刻都有大量嘅動物正喺度畀第啲動物監生食落肚,而且又有好多動物喺度餓死渇死病死(野生動物嘅痛苦);主流哲學家認為,呢啲噉嘅事好顯然會引起大量嘅痛苦[註 1];而智能冠絕動物界嘅人類,時不時都會為咗私利而有意引起痛苦,甚至做呢啲嘢嗰陣會經過深思熟慮先郁手,例子可以睇吓謀殺強姦同埋打仗等嘅現象;雖然邪惡呢個概念難定義,但「有能力決策嘅個體,為咗私利等嘅原因引起巨大痛苦」一般都會畀人覺得係邪惡[3]。噉即係話

邪惡同痛苦好明顯係存在嘅,而且人類承受好多邪惡同痛苦。
2016 年影到兩隻喺度開餐食鹿;有人指出,喺野外嘅動物成日都會因為畀其他動物捕食,而遭受極大嘅痛苦

基本論證[編輯]

内文:全知全能全善
睇埋:上帝全能悖論

根據廿世紀初主流嘅基督教猶太教思想,上帝有以下呢三樣特徵[註 2][4][5]

  • 全知:上帝乜都知,所以佢理應知道「佢創造嘅呢個宇宙,充滿咗各式各樣嘅邪惡同痛苦」。
  • 全能:上帝咩都做得到,所以如果佢想,佢理應會有能力令所有嘅邪惡同痛苦消失。
  • 全善:上帝係善良嘅,佢深愛世人,甚至係善嘅化身;而正路認為,如果 A 深愛 B,噉 A 應該會想減少 B 受到嘅痛苦,會郁手減少 B 受到嘅痛苦。

噉問題就嚟喇。邪惡問題最基本嗰款論證係好似以下噉嘅[1]

  1. 如果上帝存在,而且佢係全知全能全善嘅,噉佢理應會知道邪惡同痛苦存在(全知),會有能力令呢啲嘢消失(全能),亦會郁手令呢啲嘢消失(全善)。噉嘅話,世界理應唔會再有邪惡同痛苦。
  2. 不過,邪惡同痛苦好明顯存在(上面提咗)。
  3. 所以「假設上帝存在」同現實觀察得到嘅嘢,出現咗場矛盾

冇其他理由,討論者就得出結論

全知全能全善嘅上帝唔存在。

解答[編輯]

内文:自由意志

有唔少思想家都嘗試對邪惡問題作出解答。最簡單嗰隻回應係,上帝缺少咗全知全能全善當中其中一樣,即係可能

  • 上帝唔係全知嘅,佢有能力同意圖想令邪惡同痛苦消失,但佢唔知呢啲嘢存在;
  • 上帝唔係全能嘅,佢知邪惡同痛苦存在亦想郁手消滅呢啲嘢,但佢冇能力噉做;
  • 上帝唔係全善嘅,佢知邪惡同痛苦存在亦有能力消滅呢啲嘢,但佢唔在意人類同第啲動物承受緊嘅痛苦;有啲人甚至覺得上帝係邪惡嘅,特登整咗個充滿邪惡同痛苦嘅世界。

除此之外,亦都有啲人由自由意志嘅角度嚟思考[6]:例如佢哋有諗過全能悖論等嘅問題,主張上帝嘅全能係「合邏輯嘅全能」,即係指「上帝淨係做到任何合邏輯嘅嘢,所以唔會整到嚿佢舉唔起嘅石頭出嚟」;呢啲思想者又指出,如果一個人要算係做出咗善行,佢必定要靠自己嘅自由意志,喺「有權揀做惡行」嘅情況下揀做出善行,先至可以算係展現咗善呢種價值;而如果上帝完全唔畀人有「揀做惡行」嘅選擇權,人冇可能達致善;噉亦即係話,「一個淨係得善、冇惡嘅世界」係一樣自相矛盾嘅嘢,所以「合邏輯全能」嘅上帝冇可能造到啲噉嘅嘢出嚟。

到咗廿一世紀初,邪惡問題依然廣泛噉畀人視為一條未解得開嘅問題。

睇埋[編輯]

註釋[編輯]

  1. 有啲思考者會攻擊呢一點,主張(例如)以外嘅動物並冇能力真係感受痛苦。可以睇吓動物認知等嘅課題。
  2. 不過正如跟住落嚟會講到,呢三個特徵「要點界定」都係一條問題。

[編輯]

  1. 1.0 1.1 Hickson, Michael W. (2014). "A Brief History of Problems of Evil". In McBrayer, Justin P.; Howard-Snyder, Daniel (eds.). The Blackwell Companion to The Problem of Evil. Hoboken, New Jersey: Wiley-Blackwell. pp. 6-7.
  2. Gregory A. Boyd (2003), Is God to Blame? (InterVarsity Press). pp. 55-58.
  3. Garrard, Eve (April 2002). "Evil as an Explanatory Concept". The Monist. Oxford University Press. 85 (2): 320-336.
  4. Wierenga, Edward R. (1989). The Nature of God: An Inquiry Into Divine Attributes. Cornell University Press.
  5. Haji, Ishtiyaque (2009). "A Conundrum Concerning Creation". Sophia. 48 (1): 1-14.
  6. Lacewing, Michael (2014). Philosophy for AS: Epistemology and Philosophy of Religion. Routledge. pp. 239-242.

[編輯]

  • (英文) Zalta, Edward N. (ed.). "The Problem of Evil". Stanford Encyclopedia of Philosophy.