著長靴嘅貓

呢幅圖畫，描繪畫畫人想像中嘅長靴貓。長靴貓喺河邊大嗌：「救命呀！我嘅主人浸親呀！」。

《著長靴嘅貓》（德文：Der gestiefelte Kater）係童話故事，廣泛喺歐洲多地流傳。呢個古仔講到主角養咗一隻異常咁聰明嘅貓，隻貓識得好似人類噉著住靴用兩隻腳行路（長靴貓）而且佢仲用佢嘅機智，幫身無分文、出身寒微嘅主人得到權力同財富。

早喺十六世紀嗰時，個故仔已經有喺意大利嗰頭流傳。打後個故仔因為廣傳，而出咗多個版本，當中某啲版本就連《格林童話》都有收錄。廿世紀起最常見嗰個版本，係由法國作家沙略佩羅寫嘅。

名稱含意

故事入便嗰隻著住長靴行路嘅貓，自稱叫英文：Monsieur Puss：

• Monsieur 一詞嚟自法文，大致係先生（對男性嘅敬稱）噉解；
• Puss 一詞係英語對貓嘅可愛稱呼，大概可以想像成等同粵語貓貓噉嘅意思；

所以呢個名可以理解為貓貓先生噉嘅意思。

英文：Puss in Boots，就可以解做著長靴嘅貓或者著長靴嘅貓貓噉解。

情節大要

描繪長靴貓嘅插圖

以下講嘅情節，跟嘅係沙略·佩羅嗰個版本。

主角背景

話說好耐好耐以前有個磨坊主人，佢有三個仔。呢位磨坊主人過咗身後，佢座磨坊留俾大仔，佢隻驢就留俾二仔，而最細嗰個仔就得到阿爸隻貓。細仔生得好英俊，但身無分文又係平民出身。佢見到自己淨係得到阿爸隻貓，就唉聲嘆氣：

「唉，大哥可以靠磨麵粉生活，二哥就有隻驢仔可以攞嚟做嘢。我呢？我諗我遲早都係窮到要煮咗隻貓嚟食。」

隻貓聽到主人喺度自怨自艾，就噉講：

「喵。主人唔使閉翳。你俾個袋我同幫我準備一對靴。然後你就會知，你阿爸查實留咗最正嗰樣嘢俾你。」

細仔聽到，又覺得隻貓的確好聰明，諗住話唔定佢真係有計，於是佢就搵咗個袋同一對啱著嘅靴返嚟。隻貓得到想要嘅嘢之後，就孭起個袋同埋著起對靴，並且以 Monsieur Puss（貓貓先生）自居。

貓貓有計

呢幅插圖描繪貓貓先生攞住自己殺死咗嘅兔仔。

貓貓先生第一時間去樹林，樹林裏面有好多兔仔。貓貓先生詐死引兔，輕易就捉到隻兔仔。然後佢就將隻兔條屍袋doi6入袋，並且走去見國王。國王一接見佢，貓貓先生就送禮：

「喵。國王陛下，我代表卡拉巴斯侯爵（英文：Marquis of Carabas）將呢隻兔仔送俾您。」

國王好高興。貓貓先生打後又好幾次殺兔送俾國王，話件禮物係嚟自卡拉巴斯侯爵嘅，次次都氹到國王開心。

有一次，貓貓先生收到消息，知道國王將會帶住公主出巡，出巡途中會經過某條河。

「喵。主人，如果你照我講嘅說話去做，你就會行好運。你去呢條河度沖涼，淨低嘅就交俾我。」

主人決定照做，走咗去條河沖涼。佢沖沖吓，貓貓先生將主人啲衫收埋喺嚿岩石下便。過咗一陣，國王同公主坐住馬車經過。貓貓先生就大聲嗌：

「救命呀！我嘅主人卡拉巴斯侯爵浸親呀！」

國王聽到，就即刻由馬車嘅窗嗰度伸咗個頭出嚟。佢見到係貓貓先生，就下令叫守衛去幫侯爵。貓貓先生同國王講，話侯爵頭先沖沖吓涼，有班土匪走嚟偷走侯爵嘅衫。國王於是就命令僕人去衣櫃嗰度搵幾件靚衫送俾侯爵。貓貓先生嘅主人著起國王送嘅靚衫，加上佢本人又有返咁上下俊朗，公主當場就對佢產生好感，國王同公主仲肯畀「侯爵」上車跟佢哋一齊出巡。

馬車繼續行。貓貓先生有咁快得咁快跑，快過馬車去到田地嗰度。佢同耕緊田嘅農夫講：

「你哋要同國王講，話笪地係屬於卡拉巴斯侯爵嘅。否則你哋就會被剁成碎肉。」

班農夫俾佢嚇到，就乖乖哋照做。過咗冇耐，國王架馬車經過。國王見到笪農地好靚，就問啲農夫笪地係邊個嘅。班農夫話笪地係卡拉巴斯侯爵嘅。國王心裡就覺得卡拉巴斯侯爵係個人才。

誅食人魔

貓貓先生繼續計劃。佢走去笪地嘅真正主人嘅城堡：座城堡又大又宏偉，主人係一隻好有錢、識魔法曉變身嘅食人魔。貓貓先生行入城堡要求同主人會面，話座城堡咁靚搞到佢好想向主人致返個敬。食人魔聽到就肯接見。貓貓先生開口：

「我敬愛嘅城堡主人，我聽講你有神力識變身喎。係咪真㗎？」

食人魔好得戚，即刻施展變身術，變咗做隻獅子，嚇到貓貓先生彈起。

食人魔變返原形，貓貓先生就繼續講：

「我亦都有聽人講，話你有能力變身做好細隻嘅動物... 例如係老鼠噉呢。不過我唔係好信囉。」

「你唔信！？」

食人魔想證明佢法力幾勁，即場變咗做隻老鼠。下一刻，貓貓先生就撲上去，將變咗老鼠嘅食人魔食落肚。

貓貓先生前往食人魔嘅城堡。 貓貓先生前往食人魔嘅城堡。  貓貓先生同食人魔（坐喺櫈上嗰個）見面。 貓貓先生同食人魔（坐喺櫈上嗰個）見面。

結局收場

就喺呢個時候，國王架馬車路經城堡。國王同公主見到座城堡咁宏偉，忍唔住停低咗架馬車喺度觀賞。貓貓先生見狀就跑出去：

「國王陛下！歡迎嚟到卡拉巴斯侯爵嘅城堡！」

「嘩！乜原來卡拉巴斯侯爵座城堡咁宏偉！」

國王同公主決定入城堡參觀，於是「侯爵」就將佢隻手交俾公主，拖住公主隻手跟國王行入城堡。佢哋仲享用食人魔本來準備嘅盛宴。期間公主鍾意咗「侯爵」，國王仲即場提出想俾公主嫁畀佢－如是者，原本好窮嘅後生仔就做咗貴族，名成利就。

從今以後，貓貓先生亦都生活富足，捉老鼠淨係為咗過癮。

文化影響

二零二一年影到，德國一地有座雕像，描繪著長靴嘅貓。

内文：無敵貓劍俠

睇埋：史力加 2同睡公主 (芭蕾舞劇)

著長靴嘅貓相當出名，多次畀人改編做電影等媒體嘅作品。

例如夢工場喺二〇〇四年出嘅電腦動畫奇幻片《史力加 2》噉：呢套戲同佢嘅相關作品惡搞咗大量嘅童話故事橋段，諸如灰姑娘、白雪公主同神仙教母等都係佢哋嘅惡搞對象，而史力加 2 用咗長靴貓做佢其中一個主要角色；個角色大受歡迎，打後仲喺二〇一一年嘅《無敵貓劍俠》同埋佢嗰套續集入便擔正做主角。

由柴可夫斯基作曲嘅芭蕾舞劇《睡公主》，亦都用咗長靴貓做佢其中一個次要角色。

睇埋

• 反英雄：長靴貓被指係頗為典型嘅反英雄，佢誅殺四圍害人嘅食人魔，救咗唔少人嘅命（英雄之舉），不過佢為咗達到目的而講咗唔少大話（英雄一般唔會做嘅嘢）而且佢誅食人魔有一部份係為咗私利—佢主人名成利就，佢自己就可以嘆世界。
• 擬人化
• 招財貓
• 窮至有錢情節

拎

• （英文） 著長靴嘅貓，沙略·佩羅《著長靴嘅貓》嘅英文版。
• （英文） 文學 / 著長靴嘅貓，電視橋段網呢頁講《著長靴嘅貓》。