體重管理

「嗱，跟住落嚟嗰 6 個月，要好好跟足計劃食生果。」

體重管理tai2 cung3 gun2 lei5（英文：weight management）係指一系列攞嚟幫人維持健康體重（唔太輕又唔太重）嘅技巧。

背景

响廿一世紀初，癡肥嘅情況日趨普遍，而癡肥會提升好多種重病－例如心臟病同高血壓呀噉－嘅機率；因為噉，醫療工作者開始廣泛討論體重管理嘅問題。

恆心研究

體重管理工作好多時都會要求參加者持之以恆噉做某啲嘢，例如

• 持續 6 個月做住一定量嘅運動；
• 持續 6 個月跟足研究者製訂嘅飲食配搭嚟食嘢飲嘢... 呀噉；

但實證研究表明，體重管理工作成日會遇到「啲參加者做做吓就半途而廢」噉嘅情況，例如有多份廿一世紀初嘅研究試過搵人返嚟做啲體重管理項目，發覺淨係頭嗰 6 個月內已經有成 50% 咁多嘅參加者放棄咗減肥計劃；於是有醫學同營養學方面嘅工作者就諗咗條計，想用生還分析（survival analysis）做研究。

例：2019 年巴西運動減肥研究

喺 2019 年，有一班巴西嘅醫療研究者就做咗份研究，想睇吓啲人有幾能夠堅持減肥計劃，亦都想知啲半途而廢嘅人點解會想放棄減肥。呢班研究者搵咗 195 個大人返嚟，參與一個 6 個月咁長嘅減肥計劃，（簡化講）要佢哋响跟住嗰 6 個月內每個禮拜都做指定嘅運動，同時參加者有權响任何一點時間宣布放棄減肥計劃，班研究者：

• 研究開始打前量度咗拃佢哋預咗用嚟做自變數嘅變數，簡單嘅有參加者嘅年紀同性別呀噉；
• 然後佢哋一路監察住班參加者，知邊位參加者有跟足 6 個月嘅運動計劃、邊位參加者半途而廢、同埋每位半途而廢嘅參加者係响邊點時間宣布放棄嘅；
• 佢哋亦有嘗試用面試研究噉嘅方法，跟進半途而廢嘅參加者，問佢哋點解想放棄（不過參加者有權揀唔答）；
• 响嗰 6 個月間，有成 52.7% 嘅參加者放棄咗。

然後佢哋行咗生還分析，發現性別同教育並唔會對「參加者能唔能夠持之以恆」有影響。

好似上述噉嘅研究，仲有好多第啲研究者做，不過可能用嘅自變數唔同。

輕推研究

2018 年英倫一地嘅自助餐；輕推可唔可以鼓勵人攞多啲健康嘅嘢食呢？

例：2013 年自助餐研究

飲食對人嘅健康有深遠影響：人食得多得滯會肥，所以佢哋食嘢嗰陣要食得適量；而且淨係食得適量係唔夠嘅－例如生果同蔬菜提供到維他命 C 呢種重要嘅維他命，而呢種維他命係肉食提供唔到嘅，所以人除咗要食適量，仲要食得均衡，攝取到嗮人體需要嘅各種營養。喺 2010 年代起，有唔少行為經濟學研究者同營養學工作者合作諗計，想用輕推鼓勵人均衡飲食。

喺 2013 年，有班經濟學家作出咗個假說，假想人喺自助餐當中揀嘢食嗰陣，係一定程度上以

「

攞自己第一眼望到嘅嘢食。

」

噉嘅簡單法則行事嘅。然後佢哋就做咗份實地實驗，研究地點係一場研討會，研討會上有提供自助式嘅早餐。班研究者事前暗中（研討會出席者唔知）做咗實驗操作：佢哋設低咗兩行隊，兩行隊各自有一張枱畀佢哋攞嘢食，而且淨係准由佢哋所屬嗰張枱攞嘢食，兩張枱大細一樣，而且啲嘢食嘅份量同種類都一樣，不過嘢食擺法就唔同－

• 枱 A 係將啲冇咁健康嘅嘢食（包括煙肉同有芝士嘅蛋）擺近喺出席者一入嚟就望到嘅位，
• 而枱 B 就啱啱相反，將啲健康嘅嘢食（包括生果同低脂肪嘅乳酪）擺近喺出席者一入嚟就望到嘅位。

設定好嗮啲嘢之後，班研究者就暗中派人觀察研討會嘅出席者，數住每位出席者屬邊條隊同埋攞咗咩嘢食。事後佢哋就對攞到嘅數據做分析，發覺（簡化講）出席者顯著比較大機率會攞佢哋第一眼望到嘅嘢食－枱 A 嘅出席者比較大機率會攞煙肉同有芝士嘅蛋，而枱 B 嘅出席者就比較大機率會攞生果同低脂肪乳酪。基於呢個發現，班研究者就作出提議，主張「將啲健康嘢食擺喺就手或者樣眼嘅地方」能夠做一種輕推，用嚟鼓勵食自助餐嘅人食多啲健康嘢食，有助體重管理。

睇埋

• 癡肥
• 均衡飲食
• 垃圾食物
• 心理干預