高竇
高竇[1]（粵音：gou1 dau3；英文：hubris，嚟自古希臘文 hybris）係泛指一個人對自己嘅能力或者價值有過高嘅評價。呢種心態可以出現喺政治領袖、科學家、企業家甚至普通人身上。領袖唔聽從顧問意見，堅持錯誤決策，結果可以釀成災難；又或者科學家過份相信自己嘅技術，忽視倫理規範。
宗教神話
[編輯]睇埋：希臘神話
希臘神話
[編輯]狂妄自大係希臘神話成日出現嘅主題，意思係一個人太過自負、自大，甚至以為自己可以同神明比拼，結果多數會帶來悲劇。喺古希臘人嘅世界觀入面，天地有一套秩序，而人如果違反呢個秩序，就會受到天譴。狂妄自大正正就係一種越界行為，表現出人唔知自己身份，挑戰神明嘅權威[2]。
最出名嘅例子之一就係阿拉克妮嘅故事：阿拉克妮佢係一個織布高手，自誇技術連智慧與工藝女神雅典娜都唔夠佢叻。有人警告佢唔好咁大口氣，但阿拉克妮唔聽，仲挑戰雅典娜織布。兩人織完之後，阿拉克妮技術的確好高，但佢喺作品入面諷刺眾神，結果激嬲雅典娜，雅典娜將佢變成蜘蛛，永遠要織網。好似噉嘅故事警告人唔好過份自信或者侮辱神明，而係要謙卑做人，只要一狂妄，最終都會自食其果，突顯咗人類喺神面前應該自知之明。
亦可以睇埋斯薛佛斯嘅故仔。
其他神話
[編輯]新約聖經嘅天使戰爭講到，身為上帝手下最靚最奪目嘅天使路西法自以為有能力挑戰上帝。
至於舊約聖經嘅巴別塔，某啲詮釋認為呢個故仔係講「人類自大，最後受到上帝懲罰」。