Wikipedia:是日正文/2009年4月
澳門，係中華人民共和國兩個特別行政區之一，分三部份：連接中國大陸澳門半島、珠江口南中國海上嘅氹仔島同路環島。北面同廣東省珠海市拱北連接；西面隔海望住珠海嘅灣仔同橫琴。
澳門半島同氹仔島之間由三條大橋連接，分別為1974年10月啟用嘅嘉樂庇總督大橋、1994年3月啟用嘅友誼大橋同埋2005年1月9日啟用嘅西灣大橋。此外仲有蓮花大橋，連接由路、氹兩島間嘅小海峽填海而成嘅路氹城同埋珠海市橫琴島，係第二個同中國大陸連接嘅口岸。東面就同另一個特別行政區──香港──相隔60公里，中間以珠江口相隔；而計劃興建嘅港珠澳大橋一端將會喺澳門東北角嘅東方明珠相連接。
澳門除咗內港碼頭同埋位於新口岸嘅港澳碼頭之外，喺1995年11月，位於澳門氹仔東側嘅澳門國際機場正式營運，據機場資料顯示：澳門國際機場2005年全年客運量為425萬高峰人次，特區政府會斥資60億澳門元填海擴建用來增加客運量，機場主要與內地城市同埋亞洲主要城市有航班往來。
澳門已經喺2005年10月底舉辦完第四屆東亞運動會，其中主場館「澳門蛋」喺2005年7月開幕。除此之外，澳門多個建設亦紛紛動工或者已經落成，好似已經開幕嘅漁人碼頭、科學館、「澳門蛋」隔籬嘅Hello Kitty land主題公園同埋酒店等旅遊設施。 (睇落去……)