Wikipedia:是日正文/2022年3月
芭蕾舞，簡稱芭蕾，係一種高度技術化嘅音樂廳舞蹈，歷史相當悠久：芭蕾舞源自 15 世紀文藝復興時期嘅意大利，後嚟由法國同俄羅斯發揚光大，廣泛噉喺歐美地區嗰度傳播開去，仲因為多人跳而令到佢嘅技術發展到愈嚟愈複雜，有埋一套佢獨有嘅專業詞彙；到咗廿世紀，芭蕾舞經已成為咗一種國際性嘅演藝，世界各個國家同地區都有組芭蕾舞團表演同教授呢一種藝術，並且將佢哋各自嘅本土文化融入去佢哋嘅芭蕾舞入面，而粵港澳地區嘅香港芭蕾舞團同廣州芭蕾舞團都係遠東地區當中享負盛名嘅芭蕾舞團。
一齣芭蕾舞劇可以當成一件藝術品，包含編舞同音樂等部份，呢啲唔同部份會由一個芭蕾舞團嘅唔同人員分別負責：編舞師等嘅人員會負責諗齣芭蕾舞劇應該要包含啲乜嘢舞步、要配合啲乜嘢音樂嚟跳、同埋成個過程要表達乜嘢故仔等等嘅內容，而個芭蕾舞團啲芭蕾舞蹈員就會負責將嗰啲舞步跳出嚟，成為觀眾注意力嘅中心。喺英文入面，一般人都興將女嘅芭蕾舞蹈員嗌做「ballerina」，男嘅芭蕾舞蹈員嗌做「danseur」或者「ballerino」，但實際專業人士所使用嘅稱謂會有更加嚴格精細嘅分類。
芭蕾舞大致上可以分做古典同現代兩種：最傳統嗰種芭蕾舞係所謂嘅古典芭蕾舞，通常會配合西人古典樂嚟跳，舞蹈員著嘅服飾可以好華麗複雜又可以好簡樸，通常會運用比較多嘢嘅舞台，而且最重要嘅係，舞步上有嚴格嘅規範；現代芭蕾舞好多時會偏好簡單嘅服飾同舞台，而相對嚟講，對舞步嘅規範比較寬鬆，成日會融入第啲舞種嘅技法。 (成篇文章……)