審計署 (香港)
審計署（英文：Audit Commission）係香港特別行政區政府轄下嘅獨立部門，亦係香港歷史最長嘅部門之一，專責幫香港政府條數核數。
史
[編輯]英軍喺香港成立殖民地之後，1844年已經委任謝利做第一位核數總長，直接向英國當時嘅殖民地帳目核數局局長匯報。自1867年，港英政府帳目由當地政府負責審計，但係喺某尐情況下，仍要交由倫敦嘅主計審計長（Comptroller and Auditor General）審計。
1910年5月，香港核數署正式成立。1947年，香港核數署署長嘅職銜改名做總監，而代表佢出掌屬土核數署嘅主管嘅職銜就改名做核數署署長。
隨住英國殖民地政策轉變，1971年年底廢除咗總監一職，設喺倫敦嘅中央核數機構都摺咗。有關方面決定屬土嘅審計工作應該由當地嘅核數署主管（即核數署署長）負責，並要求各屬土制定法例，落實呢項決定。
香港嘅《核數條例》喺1971年12月制定，具體界定核數署署長嘅委任、任期、職責同埋權力，並就政府帳目嘅審計同報告訂定條文。根據嗰條條例，核數署署長係政府帳目嘅外部審計師，有好大權力，可以查政府部門嘅記錄，又可以要求任何公職人員作出解釋，同埋提供佢認為執行職務所需的資料。喺根據嗰條條例執行職責同埋行使權力時，核數署署長唔使聽任何人或者機構嘅指令或者受佢哋控制。
1978年，嗰陣時嘅立法局成立政府帳目委員會，負責審計報告等事宜。1986年，立法局同核數署制定衡工量值嘅審計準則，正式處理部門嘅效率問題。
香港主權移交，《香港基本法》第58條訂明，香港特別行政區設立審計署，獨立運作，對香港特別行政區行政長官負責，而審計署署長重成為咗香港特別行政區政府嘅主要官員之一，要由中華人民共和國國務院任命。核數署於是改名做審計署，阿頭係審計署署長。
署長
[編輯]審計署署長係香港公職人員，根據《香港法例》第122章《核數條例》執行職務時，唔使聽任何人或者機構嘅指令。署長由行政長官提名，國務院委任（根據《核數條例》第3條[1]，主權移交前由香港總督委任）。
而家審計署署長每年向立法會主席呈交三份報告書，一份根據《核數條例》第12條嘅規定，每年要呈交一份政府帳目；同埋兩份關乎衡工量值式審計結果。審計署署長報告書會由政府帳目委員會按照《核數條例》第12條同埋《立法會議事規則》第2501章第72條嘅規定，進行審議。
歷任首長
[編輯]審計署成立咗百幾年，首長個名轉過好幾次。
- 核數總長
- 謝利（1844—1846年）
- 凱恩（1846—1854年）
- 默瑟（1854—1858年）
- 倫尼（1858年—1870年）
- 奧斯汀（1870—1879年）
- 馬什（1879—1887年）
- 斯圖爾特（1887—1890年）
- 核數長
- 核數署署長
- 鄭凌志（1948—1955年）
- 卡特（1955—1959年）
- 庫珀（1959—1965年）
- 白列鼎（1965—1970年）
- 華爾雅（1970—1975年）
- 黎義孚（1975—1982年）
- 司徒勤（1982—1988年）
- 韓智（1988—1992年）
- 鄭寧（1992—1995年）
- 陳彥達（1995—1997年）
- 審計署署長
出面網頁
[編輯]- Audit Commission | 香港審計署（英文）（繁體中文）（簡體中文）
- 《香港法例》第122章《核數條例》
