關於東張西望嘅爭議

《東張西望》係香港無綫電視一個標榜娛樂同時事資訊，同時為無綫電視唔同業務做宣傳嘅節目，不過，佢哋有別於一般專業時事新聞節目，《東張西望》團隊入面好多人，都並未經歷過正規專業採訪或者新聞學嘅訓練，主持人往往會加入自己個人意見或者立場，甚至會有一啲情緒化嘅表現。另外，佢哋討論一啲議題嘅時候，有時亦會帶有相關嘅商業宣傳。內容一直有唔少人批評同爭議，其他批評就包括未經同意盜用他人短片、硬銷政府政策同決定、對社會問題抱有偏頗預設立場嘅爭議、發佈假新聞等，有啲網民甚至形容佢哋每日每夜都侮辱緊全香港記者。不過，佢哋掛住「資訊娛樂節目」嘅牌頭，結果廣管局無例可依，並唔可以好似監管新聞節目咁處理對《東張西望》嘅投訴。

節目混合廣告被批評罰款

2010年9月10號，廣管局審議兩宗投訴《東張西望》喺2010年1月同2月將節目混合廣告材料，節目過分突出商業產品同服務；決定向無綫電視施加罰款港幣4萬港元。

2022年1月8號，《東張西望》被指就口罩議題，借訪問化學學者鄺士山為名，推銷無綫旗下網絡商店士多Ztore嘅KF94口罩為實，引起批評。當時鄺喺訪問聲稱香港無工廠生產到KF94口罩，之後東張西望嘅主持就宣傳士多Ztore，示範點樣喺嗰度買口罩。之後，鄺士山開Facebook澄清，話嗰陣唔知道香港製造廠SAVEWO 救世已經攞到認證可以生產KF94口罩，而無綫其後亦引述呢篇聲明澄清。

2022年7月13號，《東張西望》用咗超過兩分鐘幫美心西餅賣廣告，主持人黃嘉慧首先假扮訪問途人，但之後就牽強咁轉移話題，然後大量內容都係介紹同評價美心西餅產品，又用上大量形容詞讚揚美心嘅產品，仲擺埋QR Code喺度畀人嘟。關於無綫電視劇Facebook專頁就引述通訊局《有關間接宣傳及植入式廣告的常見問題》，指《東張西望》得寸進尺，越賣越離譜。

採訪手法爭議

東張西望嘅主持同製作團隊，好多都並未經歷過正規專業採訪或者新聞學嘅訓練，手法唔止一次被質疑。

2016年游莨維採訪亞洲電視終止免費廣播倒閉手法被批評

2016年4月，亞洲電視因為政府拒絕續牌，需要終止免費廣播同解僱大量員工。喺4月2號，游莨維對留守到最後嘅亞視新聞部主播追問佢係咪失業，但未得到回應。游莨維當時立即擺出囂張表情藐嘴，又做出爆粗鬧有關新聞主播嘅人，結果被網民批評佢幸災樂禍。

採訪2016年熊本地震被指欠缺準備

2016年4月16號，因應日本熊本縣發生7.3級地震，《東張西望》派出攝製隊前往災區拍攝，並且喺4月18號以「熊本連環大地震」為題作報道。李旻芳話本來打算去超級市場買嘢食，但因為地震關係，食物早已被當地災民搶購，附近嘅商戶亦無外賣；一名日本女士得知佢哋想食嘢嗰陣，就為佢哋送上飯團。網民紛紛批評攝製隊出發前準備不足，並加重當地災民嘅負擔，令香港蒙羞。李旻芳回應話，之後已經歸還食物。

利穎怡窮追猛打採訪手段被批評

2022年5月，《東張西望》主持利穎怡就美孚新邨老鼠屋事件採訪業主，利穎怡嘅窮追猛打手段，令業主感到不耐煩並對利穎怡施襲，事後《東張西望》報警處理，節目亦大篇幅討論事件，利穎怡就表明會追究到底，又反問如果記者們問多幾句就要被人打，那仲有邊個想去報道一啲難處理嘅民生問題。

不過有啲網民就認為無綫為咗博鏡頭吸收視，唔理會主持人嘅安全，亦唔應該話用『幫人』美化自己死纏爛打咁追住人嘅行為。另外，記者林彥邦亦喺媒體平台 ReNews 撰文，質疑《東張西望》嘅追訪方式近乎纏擾，質疑同屋主帶來嘅「惡」係咪對等，又話就算真係要跟進呢單新聞，都可以從屋主本身嘅遭遇、精神狀態，有無折射到社會某啲人的遭遇困境，或者問食環、區議員、食衛局、社署等等，而唔係一味追住一個情緒同埋行為本身有異嘅阿姐唔放，質疑《東張西望》團隊繼續拍攝帶來反效果。

2022年游莨維拍攝雲咸街槍擊案記者會和正規記者衝突

2022年6月，中環蘇豪區雲咸街爆出槍擊案，游莨維代表《東張西望》喺現場拍攝，期間疑似同在場正規港聞記者發生衝突，佢事後喺社交媒體出post，質疑在場嘅港聞記者，反問佢哋喺自己2010年採訪馬尼拉人質事件嘅時候畢業未。呢個Post引起公憤，有人不滿佢以「老行尊」態度用年資壓人，亦有人批評《東張西望》本來就唔係非式新聞節目，唔應該妨礙港聞記者採訪工作。佢之後再出文，話自己當時係聽到有人話「東張西望都嚟採訪，阻住晒～」，又話自己2008年已經開始採訪生涯，「當中受過的冷眼和冷言冷語已經不計其數，結果今次谷住啖氣」。

有啲網民仍然批評游莨維，另外之後多個傳媒發現，有大批名字並唔係華人，疑似網軍嘅帳戶留言，統一寫住『支持Monster Joe不用理會別人 做一個良心好記者』，將游莨維嘅別名『Master Joe』寫成『Monster Joe』。

2022年利穎怡未經授權非法採訪日本採訪譚仔米線當地分店

2022年6月，利穎怡被《東張西望》委派去採訪自武漢肺炎疫情以來，由香港飛到日本嘅第一個旅行團，其中包括到日本嘅譚仔米線做採訪。不過事後有網民質疑《東張西望》用旅遊簽證非法從事採訪工作，而且未經授權強行拍攝，當中嘅受訪者事後亦喺網上投訴話自己唔知道接受緊無綫採訪，成間鋪亦無人知道無綫嚟拍嘢，感到不滿。唔少網民都留言批評《東張》做法不當，唔尊重店方同店員，拍攝前應得到對方同意係基本嘅尊重。有網民指出喺日本有肖像權，咁樣未得對方同意拍攝，仲攞嚟喺電視節目公開播放，有違法之嫌。

發佈假新聞

《東張西望》亦曾經唔止一次喺節目入面，發布未經證實嘅假新聞：

• 喺2016年9月26號，《東張西望》有兩名主持引述網上虛假消息發佈蛇夫座謠言，話美國太空總署已經新增星座「蛇夫座」，並將十二星座重新劃分為十三星座。但有關消息已經被其他媒體廣泛報道係假。
• 喺2020年4月12號，《東張西望》播出咗一段由觀眾提供，內容主要係街頭歌手表演同市民圍觀嘅情況。喺未經求證嘅情況下，主持人聲稱有市民喺「上星期六」喺中環碼頭唔理政府因應武漢肺炎疫情持續而喺3月29號起實施嘅限聚令，四人以上喺公眾地方聚集。街頭歌手龍婷喺當晚11點喺Facebook發表聲明，批評《東張西望內容失實》，澄清片段拍攝嘅係佢喺3月14號嘅演出，並無違令聚眾街演。亦有網民指出，影片片段可能係源自YouTube頻道「mk 61」喺3月14號上載嘅一條影片嘅片段。2020年4月13號，《東張西望》喺節目尾段作出道歉同澄清，但又讚揚提供片段嘅人係熱心觀眾。
• 2022年2月初，政府就控制武漢肺炎香港疫情，宣布24號起，香港市民要用安心出行先可以進入商場。不過，東張西望就多次發表虛假資訊，話2月10號已經要咁做，結果被部分網民批評。
• 喺2023年鑽石山荷里活廣場斬人案入面，多個親中派媒體以及《東張西望》都先後發放受害人同兇手有關嘅假新聞，結果受到批評。

被指盜用他人短片

喺2021年10月，前無綫、商台主持人陳慧儀喺社交媒體開直播節目，同趙汝威討論「浸稀釋漂白水改善濕疹」嘅問題。同年11月，陳慧儀就喺社交媒體入面，指控《東張西望》未經同意同諮詢，就剪咗佢嘅直播節目片段入自己嘅節目入面，仲要串連埋其他植入式廣告。陳慧儀批評，無線嘅做法令人感到混亂同埋有所誤會。佢又強調，無綫喺節目入面宣傳嘅產品（卡倫萬用膏），同佢哋無關係。

硬銷政府政策同決定

有部份人抨擊《東張西望》不時猶如政府上身，為政府政策推銷。例如：

• 喺2013年碼頭罷工風潮，《東張西望》嘅「記者」極度偏頗嘅選擇性報導，引起廣泛不滿。
• 喺電視牌照發牌風波入面，香港電視網絡攞唔到牌照，而政府亦冇解釋原因。但《東張西望》就大花章節為政府解釋保駕護航。
• 喺2017年，喺高鐵實施一地兩檢嘅問題上，《東張西望》有兩名主持就喺度一面倒唱好一地兩檢同高鐵嘅好處，完全忽略網絡世界對一地兩檢嘅批評同埋涉及嘅法律問題。

對社會問題抱有偏頗預設立場嘅爭議

除咗為政府進行政策硬銷之外，《東張西望》不時喺討論一啲社會問題嘅時候都有偏頗預設立場，甚至用上帶有批評攻擊性嘅字眼形容部分喺呢啲議題入面牽涉嘅人。例如：

• 喺2015年3月，佢哋曾經有一個關於露宿者嘅專題節目預告，但預告入面形容露宿者為「香港橋霸」，結果被部分網民指責，話佢哋冇諗過呢啲露宿者都唔想，而係走投無路，而節目預告聲稱露宿者霸佔嘅天橋，本來使用率本身已經低，幾個月前更被鐵絲網封閉，形同棄用。
• 喺2017年3月8號，佢哋播出以探討餵哺母乳為主題，但內容被香港母乳育嬰協會同一啲媽媽批評。例如，香港母乳育嬰協會批評《東張西望》抹黑母乳餵哺，話佢哋係「追潮流」，只聚焦餵哺母乳嘅困難，又斷章取義話奶粉嘅營養價值同母乳相若，又只係訪問由香港奶粉生產商所成立嘅香港嬰幼兒營養聯會，甚至喺選擇母乳定係奶粉嘅問題上，將唔同媽媽分為對立兩派。當香港母乳育嬰協會要求接受訪問，無綫更加以希望「避免跟奶粉商對立」而拒絕，明顯係有商業考慮。香港母乳育嬰協會之後表明，會去信通訊事務管理局投訴。截至3月10號，通訊局已接獲141宗相關投訴。

被指剝削外判合約工

喺2022年7月尾，有網民喺網上爆料，指控負責攝影嘅外判公司老闆係吸血鬼，而節目組亦處事不公，知情包庇。呢啲指控主要包括員工無保障無合約無勞保無假期，老屈員工係自僱人士可以隨時被炒，而且要倒貼返工，仲要連糧單都無。控訴者又話，如果東張西望咁鍾意搵陸大狀為民請命，不如問下陸大狀到底呢間外判公司違反咗幾多罪。

誤導香港人擅闖青山靶場

喺2017年4月，《東張西望》介紹人去位於軍事禁地青山靶場嘅菠蘿山遊覽，結果引來一啲市民誤闖禁區。當時時事評論員黃世澤批評，《東張西望》嘅做法罔顧市民安危。

外間批評

對於《東張西望》入面討論社會問題嘅做法，香港中文大學專業進修學院媒體研究客席講師陳龍超喺2014年接受明光社刊物《燭光網絡》嘅時候話，《東張西望》呢類型資訊娛樂節目內容嘅真確性同公眾利益息息相關，就算做嘅唔係新聞報導，採訪嘅唔係專業記者，亦應該要有專業態度。

另外，喺2022年，游莨維喺雲咸街槍擊案記者會同正規記者衝突後，前新聞主播李鴻彥喺社交媒體炮轟無綫將港聞娛樂化，搵完全無經驗嘅藝員做記者，事前唔做功課唔熟書只求畫面好惡。反之，港聞政治新聞都需要非常專業嘅處理，如果唔係香港各大學就唔會有新聞系。佢又以2013年香港電視網絡攞唔到牌照為例，指喺未有雨傘運動等政治事件嘅時候《東張西望》已經被大量投訴，同黃絲仇視無關，而係無綫作為既得利益者用咗成集《東張西望》為政府護航。佢亦批評，本身定位都唔係專業新聞嘅節目，就唔好講到自己捍衛緊新聞自由或者第四權。

睇埋

• 文匯大公傳媒發佈假新聞爭議