靈洲山

靈洲山（粵音：ling⁴ zau¹ saan¹），亦寫做靈洲，係中國廣東一座山，喺家下南海官窯。靈洲山並唔係一般江水沙洲，而係石英砂岩來，石好硬。喺大明之前，呢度江面好闊，靈州山係好似條柱咁樣棟喺江中心，所以係大宋時嘅羊城八景之一，靈洲鰲負。

史

靈洲山呢處，曾經係海來，不過幾千年由北江帶沙落來，漸漸積成平地。原本大漢時重北江有叉條水落去石門水，即係家下叫嘅樂排水（又叫落排水）同下游白泥水。而過石門水就可以入番禺城，即係家下廣州城。漢樓船將軍就經呢條路打南越國。去到大宋，經已通唔到大船。

取而代之係南便蘆包水出去石門水。嗰陣江面好闊靈洲棟喺江中心。大晉已出名。大時唐有麓頸海，又叫六頸海，可見呢度水面好闊。側邊有官窯鎮，大唐係陶瓷重地，尤其呢度近水，方便陶瓷散貨。而另有金利鎮，有麻奢水避開尋峽（今潯岡）同石門之險。呢帶去到大宋盛極一時，北江船隻聚集喺處入城。

大明時蘆包水都唔係時時有水，去唔到省城。於是改由西南鎮入三江水代替，三江水入靈洲山出石門。但係三江水最後又係無咁多水，所以又叫西南涌。靈洲山呢帶沒落。因為水量無以前咁大，闊江面變成灘流，彎彎曲曲，新地畀人圍成田。靈洲山東便首先積沙，畀山上寺種田。後尾南便水道水弱，去到民國已變成小涌，1957年正式連埋南岸，唔再喺江中。

西南鎮因為水道塞，最後畀佛山涌代替，造就佛山鎮繁榮。之後佛山涌又塞，再無條闊水道入省城。

靈洲鰲負

靈洲鰲負係大宋時羊城八景之一。當時江面好闊，靈洲好似條柱咁，喺江中心。船隻喺度穿插。因為咁，靈洲就比喻為，底下有條鰲魚，揹起靈州突起江中，。鰲呢種比喻法，喺古代都好常見，當時叫呢類做鰲峯。大清初年，西江、北江入省城，有四個鰲峯，首先係靈洲，其次係海珠，跟住係海印，再來係禺珠，全部都係水中心。四個之中，靈洲最高大，山腳好似鼎腳。西叫象嶺，又叫三台。南叫鹿馬，又叫鉢盂。北叫讀書岡，上便有寶陀院，同埋超然、妙高兩台。

靈洲呢種情景，有人用佢同長江金山比。所以靈洲山又叫小金山。大宋詩人楊誠齋有寫『北江西水兩相逢，胥江波濤特地雄。急流欲上人聲鬧，近岸還移牽路窮』。係講呢處繁華。其實重有唔少名人到此留名，蘇東坡係其中一個。