楊潤雄

出自維基百科,自由嘅百科全書
跳去導覽 跳去搵嘢
Kevin Yeung Yun-hung
楊潤雄
Kelvin Yeung Yun-hung.png
Flag of Hong Kong.svg 香港教育局局長
前任吳克儉
教育局副局長
前任陳維安
繼任蔡若蓮
個人資料
出世 (1963-01-26) 1963年1月26號(58歲)
Flag of Hong Kong (1959–1997).svg 英屬香港
籍貫廣東東莞

楊潤雄JP(英文:Kevin Yeung Yun-hung1963年1月26號—)係香港官員,祖籍廣東東莞,2017年開始做教育局局長。

履歷[編輯]

楊潤雄喺香港出世,喺中華基督教會基華小學同埋九龍華仁書院畢業,之後喺香港大學完成社會科學學士課程,其後取得澳洲墨爾本皇家理工大學工商管理碩士學位。佢大學畢業後做過專業會計七年,1992年加入香港政府做政務主任,2010年調任食物及衞生局前,曾任民政事務局局長曾德成政務助理四年幾,並喺2004年晉升至首長級丙級政務官。

楊潤雄曾任職多個政策局同部門,包括食物及衞生局、民政事務局、九龍城區民政事務處及香港駐悉尼經濟貿易辦事處等。2012年11月5號,楊潤雄就任教育局副局長,成為政治委任官員[1]

楊潤雄在任教育局副局長期間因時任局長吳克儉在任期間不斷外訪,令佢要頻頻署任局長,所以曝光率一直高過其他副局長,亦需要真正處理局長職務。吳克儉在任期間,社會對教育政策爭議不斷,唔少教育團體都話,情願約見副局長楊潤雄,都唔想嘥花時間同吳克儉會面。學界對楊潤雄坐正教育局局長職位反應正面,除咗受惠於吳克儉離任,亦因為楊潤雄曾經親自處理唔少教育議題,令佢喺教育界人士中取得正面印象[2]。例如喺2015年底全港性系統評估風波期間,立法會教育事務委員會召開公聽會,吳克儉因家事而缺席,由楊潤雄以署理教育局長身份出席,對於會上幾乎一面倒嘅批評,楊潤雄曾經表明:「如果無法令學校停止操練,政府願意作出重大調整。」另外,喺2017年5月初,立法會為基本能力評估(BCA)召開公聽會,合共3節,但吳克儉只出席1節,改去出席汕頭商會慶祝回歸20周年活動,其餘2節公聽會由副局長楊潤雄頂上[2]。對於佢五年教育局副局長生涯,泛民主派立法會教育界議員葉建源亦評論楊潤雄有誠意兼肯溝通,亦讚佢表現穩妥[3]

2017年6月,楊潤雄被委任為教育局局長,接替離職嘅吳克儉[4]。佢喺2017年7月1號上任。

非議[編輯]

仔女唔喺香港就讀[編輯]

楊潤雄上任教育局局長之後,被質疑佢啲仔女唔係喺受香港教育制度規範嘅本地學校讀書,之後仲去咗澳洲升學。有啲輿論就話佢,講一套、做一套。楊潤雄回應話,香港教育制度較「複雜」,所以畀兩個仔女就讀國際學校。不過,法政匯思成員任建峰批評,話佢與其為自己嘅抉擇揾比粗口更難聽嘅藉口,不如承認連佢都認為香港嘅教育制度不堪。[5][6]

多次貶低粵語[編輯]

執掌教育局後,2018年教育局喺小學中文網上教學資源版面度,上載香港中文大學普通話教育研究及發展中心榮譽專業顧問宋欣橋一篇2013年發表嘅文,入邊話粵語只係漢語中嘅一種方言,重話普通話先至係香港人嘅母語[7]

教育局噉做惹起輿論指責。香港中文大學中文系前高級講師歐陽偉豪批評,教育局特登搵位唔係粵語研究領域嘅內地學者發表嘅文,替代粵語研究豐碩嘅香港學者,屬「引用權威未夠精準」。認為當局一系列行為,反映背後有矮化粵語,或壓抑粵語嘅強烈動機[8]。香港大學中文教育研究中心總監謝錫金亦引語言學定義,指父母所講語言係「母語」,所以大多數香港人母語係粵語[9]

2018年10月,楊潤雄喺港台節目《舊日的足跡》度又話,喺全球以普通話為主學習中文嘅趨勢下,港人未來仍用廣東話學中文可能欠缺優勢。楊潤雄回應宋欣橋嘅文章咁講,有關文件並唔係最近上載,已經上載咗幾年,形容呢一系列文件,「提供予老師或界別人士,去睇社會唔同學者或唔同人士意見,對母語嘅睇法」[10]

有關言論隨即惹來爭議,楊後尾上 Facebook 度出文,話自己冇質疑用廣東話學中文,只係認為長遠來睇,中文教學如何發展,可交由專家研究,重申「廣東話對香港來講係優勢,例如古詩歌賦用廣東話唸更有韻味」。喺商業電台嘅節目中,佢話自己母語係廣東話,話廣東話係最自然嘅,表明「我撐廣東話」,但係用廣東話教學會否失去優勢需要再研究,如結果係會失優勢亦唔代表香港一定要推行普教中。不過,對於楊潤雄嘅言論,早前提交予立法會嘅研究報告顯示:「未有確實證據,證明以普通話學中文嘅學生嘅一般中文能力會較高」,亦即係話,用普通話學中文較用廣東話學中文,並冇優勢[11]

歐陽偉豪再對楊言論評價,話如果廣東話唔能夠長遠發展,就應該更加致力於幫助發展廣東話而唔係捨棄佢,面對廣東話發展危機,作為教育局局長,應該要去拯救廣東話,而唔係不斷貶低同埋矮化廣東話。歐陽偉豪又認為香港應有創意,應令廣東話學中文成為最優質嘅學習方法,畀世界跟住,如果乜嘢都跟住個世界走,缺乏創意精神,高錕教授亦發明唔到光纖[12]

以歷史科試題批鬥考評局[編輯]

內文:2020年香港中學文憑試歷史科題目風波

喺2020年香港中學文憑試,歷史科一條有關中日關係嘅試題陷入爭議。被包括楊潤雄在內嘅政府官員,新華社香港親中媒體先後批評,引起咗坊間好大爭議,教育界批評政府咁做係對教育界發動文革式嘅政治批鬥[13][14],而最終考評局將嗰條題目作廢。

出面網頁[編輯]

參考[編輯]

  1. "兩副局長及五政助獲聘任". 香港政府. 2012-10-31. 原著喺2012-12-18歸檔.
  2. 2.0 2.1 "楊潤雄由經常署理至坐正教育局長 分配資源、安撫學界挑戰不簡單". 香港01. 2017-06-21.
  3. "隔牆有耳:教育界撐楊潤雄做局長". 蘋果日報. 2017-05-11.
  4. "新班子:4副局升呢局長 楊潤雄取代吳克儉". 東方日報. 2017-06-21.
  5. 潘希橋 (2017-10-25). "子女均讀國際學校 楊潤雄稱因港教育制度「複雜」". 香港01 (中文). 喺2020-12-31搵到.
  6. "任姓家長:楊潤雄應怎回應把子女送去國際、海外學校?". HAPPY PAMA 教得樂 (中文). 2018-10-19. 喺2020-12-31搵到.
  7. "教局網站文章:粵語非母語 Ben Sir質疑引用權威失當、矮化粵語". 香港01. 2018-05-02.
  8. "【短片:粵語非母語?】Ben Sir質疑矮化粵語 斥教局引內地學者替代港學者 (12:39) - 20180502 - 港聞". 即時新聞 instant news. 2018-05-02.
  9. "【網上熱話】粵語只是方言?港大謝錫金:父母說的就是母語 (23:18) - 20180501 - 港聞". 即時新聞 instant news. 2018-05-01.
  10. "楊潤雄質疑用廣東話學中文長遠會否失優勢 - RTHK". rthk.hk. 2018-10-07.
  11. "「廣東話是否長遠論」惹爭議 楊潤雄嘆被社會部分人誤會 稱全無質疑廣東話學中文". 明報. 2018-10-07.
  12. "「成個世界中文發展以普通話為主」貶低廣東話 楊潤雄辣火頭". 蘋果日報. 蘋果日報. 2018-10-08.
  13. "教育局破天荒迫考評局取消中日爭議試題 又派專組調查 葉建源評為文革做法". RFI - 法國國際廣播電台 (中文). 2020-05-16. 喺2020-12-30搵到.
  14. "借試題事件中共在港掀批鬥風 整治教育界 考評局還可以撐多久? | 立場報道 | 立場新聞". 立場新聞 Stand News (英文). 喺2020-12-30搵到.