檸檬茶

出自維基百科,自由嘅百科全書
熱檸檬茶
凍檸檬茶
販賣紙包飲品嘅自動販賣機

檸檬茶粵拼ning4 mung4*1 caa4)係一種用檸檬調味嘅紅茶嘢飲,起源於英國(有講法係俄羅斯),可熱飲或凍飲。

香港嘅檸檬茶[編輯]

檸檬茶喺香港一般簡稱為檸茶,係香港茶餐廳快餐店成日見到嘅嘢飲,分為熱飲同凍飲兩種,一般稱為熱檸茶凍檸茶,近年間中有凍檸Tea嘅叫法,但唔常用。

港式檸檬茶一般必定配三四塊大概厚3-5毫米切片檸檬喺杯入面,加入紅茶葉製造嘅港式紅茶,客人可用配備嘅茶匙或飲筒將檸檬拮搞嚟調節酸性。另外,熱飲會加糖嘅飲法同西方唔一定加糖嘅飲法有分別。

茶餐廳嘅檸檬茶[編輯]

檸檬茶喺香港嘅茶餐廳中經常作為餐飲(例如:早餐、午餐、快餐、下午茶餐同常餐),亦可以係奶茶咖啡之類,一般套餐收大概港幣20至30蚊,有時候係加錢配嘢飲嘅。如果淨係叫嘢飲(俗稱「散叫」),要收一個較貴嘅價錢,大概港幣7至15蚊不等,用來吸引一啲客人點較高價格嘅餐點同避免淨係叫一杯嘢飲而佔用佢哋嘅地方。因此,後來亦發展出「茶餐」,以嘢飲配一啲小食好似菠蘿包蛋撻,價格同散叫飲品嘅接近。

通常茶餐廳嘅伙計會用一啲速記符號,「0T」代表「檸檬茶」,因粵語「零」同「檸」音近,「T」同「TEA」同音。有啲舊式茶餐廳會用叫喊方式通知水吧落單,「凍檸檬茶」會被叫做「爆檸」。

包裝嘅檸檬茶[編輯]

由於檸檬茶需要一啲製作程序,有啲公司於是推出預先沖好嘅即飲檸檬茶嘢飲,其中以紙包包裝較受歡迎。

市面上嘅包裝檸檬茶主要包括:

  • 維他檸檬茶(維他奶公司出品)
    • 維他錫蘭檸檬茶
    • 維他青檸檸檬茶
    • 維他LIGHT檸檬茶
    • 維他茶字典冰紅茶嘢飲檸檬味
    • 維他菓然系茶冰震檸檬茶
  • 陽光檸檬茶
    • 陽光茶餐廳檸檬茶
    • 陽光茶餐廳檸檬茶少甜
  • 碧泉檸檬茶
  • 雀巢檸檬茶
  • 立頓檸檬茶
  • 康師傅冰紅茶檸檬味
  • 統一冰紅茶檸檬味
  • 鴻福堂凍檸茶
  • 華通檸檬Hi檸檬蜜茶

其他[編輯]

2007年香港中學會考中國語文科試卷二(寫作能力)度,有一題作文題目係「檸檬茶」。咁啱同蕭源早前筆記範文題目「凍檸茶」好似,被指貼中試題,引起香港社會熱烈討論。

睇埋[編輯]