長髮姑娘

1910 年呢幅插圖描繪「長髮妹伸咗佢個頭出窗外」嘅情境。

《長髮姑娘》（粵拼：coeng4 faat3 gu1 noeng4；英文：Rapunzel）係《格林童話》有記載嘅一個童話故事。

個故仔嘅女主角係一個頭髮好長嘅女仔（長髮妹mui1），佢由細細個開始就畀一個女巫韞咗喺座高塔裏面，去唔到外面嘅世界。後嚟長髮妹遇到王子，最後脫離女巫嘅魔掌，同王子一齊得到大團圓結局。

呢個故仔有咁上下文化影響力。例如好出名嘅 2010 年迪士尼電腦動畫戲《魔髮奇緣》噉，就係改編自《長髮姑娘》嘅。

主角個名

2007 年影到嘅一樖漫遊風鈴草

以下講講女主角個名嘅意思。

《長髮姑娘》呢個故仔嘅女主角，原名叫 Rapunzel（德文音標： [ʁaˈpʊntsl̩]），呢隻字原先嘅意思係某啲蔬菜嘅名，不過具體嚟講「係指邊種菜」就似乎會視乎地區同時代而有異，有可能係指

• 漫遊風鈴草（學名：Campanula rapunculus），一種曾經廣泛分佈喺歐洲各地嘅根菜。
• 羊萵苣（學名：Valerianella locusta），一種喺歐洲成日畀人攞嚟整沙律嘅菜。

而傳到嚟中文，女主角嘅常見漢字名有長髮姑娘或者長髮公主呀噉，呢個名嚟自佢嗰頭好長嘅頭髮。

如果要廣東話化啲嘅話，亦都可以嗌佢做長髮妹mui1－喺廣東話入面，妹呢隻漢字可以有最少三種唔同讀法，以下用嘅拼音係粵拼：

• mui2－阿妹、細妹；
  
• mui4－妹妹嘅第一隻妹字；
  
• mui1－可以睇吓妹仔同𡃁妹等嘅字詞；
  

當中 mui1 呢個讀法成日畀人用嚟幫女仔改花名－啲人幫一個女仔改花名嗰陣，好多時都係嗌佢做乜乜妹mui1嘅，當中乜乜會係佢嘅某啲特性，例如一個好鍾意飲咖啡嘅女仔可能會畀人嗌佢做咖啡妹。

劇情大綱

原版《長髮姑娘》嘅情節大致係噉嘅：

主角嘅起源

好耐好耐以前有一對夫婦。佢哋兩公婆都好鍾意細路，但一路都生唔到。佢哋隔離屋住咗個法力高強嘅女巫，女巫個花園好靚，種滿嗮各種嘅花同蔬菜。個女人一路望住女巫種嗰啲 rapunzel 望咗好耐，愈睇就愈覺得啲 rapunzel 望落好新鮮好綠，好似好好食噉。佢渴望想食女巫種嗰啲 rapunzel，仲渴望到病咗。個男人睇到，想知自己老婆因乜事咁唔開心，就開口問。個女人噉樣答：

「我好想好想食隔離屋個女巫種嗰啲 rapunzel，但又食唔到。我渴望到想死咁滯喇。」

個男人見到佢老婆噉嘅樣，就好心痛。佢好驚個女巫，但為咗想老婆好返，就決定入女巫嘅花園偷菜。

當日天黑之後，個男人靜靜雞祟入女巫嘅花園，好快手噉摘咗啲 rapunzel，帶返屋企畀老婆。個女人見到就好開心，仲用咗啲 rapunzel 嚟整沙律，食得好滋味。但跟住第二日，個女人又話想食女巫種嗰啲 rapunzel，於是佢老公又偷偷哋走入女巫花園度想偷菜。點知佢摘完 rapunzel 想走嗰陣，就見到女巫企咗喺佢面前，睇到嗮佢做嘅一切。女巫望落好嬲噉嘅樣：

「你真係好沙膽呀。竟然走嚟偷我啲嘢！你一定要付出代價！」

「好對唔住呀，但我老婆好想食 rapunzel，唔食就會病添呀。」

「哼，噉呀，我啲 rapunzel 你鍾意摘幾多都得，但有個條件：你同你老婆生嘅頭一個細路要送畀我。放心，我會照顧佢，仲會當正佢係我親生嘅噉。」

個男人唔想得罪女巫，就答應咗女巫嘅要求。

過咗一排之後，個女人生咗個 BB 女。就喺個 BB 女出世嗰日，女巫就出現喺兩公婆面前，女巫幫 BB 女改咗個名叫 rapunzel，跟住就帶咗佢走。

被韞喺高塔

呢幅插圖描繪想像中長髮妹住嘅高塔。

12 年嘅時光話咁快就過咗。

女巫將佢個養女帶咗去一座喺森林深處嘅高塔嗰度。座塔冇門冇樓梯，不過女巫有一個方法可以進出高塔：高塔最頂樓有個窗，女巫 12 年嚟一直都冇剪過佢養女嘅頭髮，所以呢個女仔嗰頭金色嘅頭髮生到好長好長（跟住落嚟嘅篇幅，會開始稱呼佢做長髮妹）；每當女巫想進入高塔嗰陣，就會企喺高塔個窗下面，大聲噉講：

「長髮妹呀，長髮妹，

放你啲頭髮落嚟畀我。」

－長髮妹聽到就會乖乖哋將佢嘅長頭髮掟出窗外，啲頭髮好長揼dam3得到落地面，跟住女巫就會捉實長髮妹嘅頭髮，畀長髮妹拉佢上去。

女巫一路都將長髮妹韞喺高塔入面，唔畀佢去外面嘅世界。如是者過咗幾年。有一日，有一個王子嚟到森林打獵，佢行到高塔附近嗰時，聽到一把好優美嘅女聲喺度唱歌，呢個女仔把聲靚到王子忍唔住停低聽，王子仲一路行去啲聲嘅來源。行行吓王子就見到長髮妹坐咗喺高塔個窗側邊唱歌－嗰把女聲正正就係長髮妹嘅。王子見到長髮妹生得咁靚把聲又咁甜美，就鍾意咗佢，想敲門同佢做朋友，但佢搵極都搵唔到門。於是王子就唯有死死哋氣噉返城堡。

返到屋企之後，王子一路都掛住長髮妹嗰把優美嘅聲，就忍唔住日日都走去森林高塔嗰度聽長髮妹唱歌。有一次，正當王子坐咗喺樹後面，聽長髮妹唱歌聽到入嗮迷之際，女巫返到嚟。女巫用佢不溜用開嘅方法叫長髮妹放啲頭髮落嚟－而成個過程都畀王子睇到嗮。

到咗第二日，王子又走咗去高塔，企正喺高塔個窗下面，大聲噉講：

「長髮妹呀，長髮妹，

放你啲頭髮落嚟畀我。」

－長髮妹真係放佢啲頭髮落嚟，於是王子就成功入到高塔。

長髮妹見到王子，第一個反應係嚇親（因為佢由細到大從來未見過男人）。不過王子對長髮妹展示善意，大讚話長髮妹把聲好甜美好好聽，話自己好仰慕佢所以先至咁想同佢面對面講嘢。兩個人傾咗陣之後，長髮妹都覺得對王子有好感，亦都對外面嘅世界有興趣。王子跟住仲向佢求婚。長髮妹噉答：

「我都想跟你走，但我唔識點樣落地面。不如噉吖，你每次嚟探我嗰陣，都帶啲絲綢畀我，噉我咪可以用啲絲綢嚟織一條梯囉。」

如是者，長髮妹同王子兩個人就開始日日都見面幽會，長髮妹期望佢有朝一日可以離開高塔。不過好景不常，有一日，長髮妹發現自己個肚開始變大－原來佢個肚畀王子搞大咗。女巫知道咗長髮妹喺度同王子幽會就大發雷霆，仲一嘢揸實長髮妹嗰頭長髮，一隻手攞起把鉸剪，剪斷咗長髮妹嘅頭髮，仲將長髮妹流放去一笪杳無人煙嘅荒野嗰度。

冇幾耐，王子唔知長髮妹畀女巫流放咗，就如常噉去高塔想幽會。女巫用剪咗落嚟嘅長髮拉王子上嚟。王子諗住可以見到長髮妹好興奮，但佢一上到去，第一時間見到嘅係女巫嗰塊想殺人噉嘅面。王子畀女巫嚇親，於是就由高塔嘅窗度跌咗出去。王子死唔去，但佢向下跌嗰陣跌正落啲有棘嘅植物度，畀啲棘插盲咗佢對眼。

最尾嘅結局

王子盲咗，又冇得見長髮妹，就一路喺森林入面流浪，食草同植物嘅根嚟維生，仲一路喺度喊好想見返長髮妹。

過咗幾年之後，王子行吓行吓，走咗去荒野度，仲聽到一把熟悉嘅女聲喺度唱歌。王子一聽到把聲，就即刻向住把聲嘅來源前進。把聲嘅來源原來係長髮妹－長髮妹生咗對孖胎，三仔乸就喺荒野度住咗幾年。長髮妹一見到王子，就即刻上前攬實佢。佢見到王子又盲又成身污糟邋遢噉好心痛，忍唔住喊咗出嚟。長髮妹喊喊吓，啲眼淚流咗落王子塊面度，其中兩滴滴咗落王子對眼。點知原來長髮妹啲眼淚有法力，王子對眼就噉好返嗮。

王子睇得返嘢，就帶住長髮妹同埋佢哋對孖胎返去佢座城堡，同時王子嘅屋企人又好開心見得返佢。於是所有人都開開心心噉生活落去，大團圓結局。

版本差異

睇埋：格林童話

《長髮姑娘》有唔少變種版本。

例如《格林童話》噉。啲人睇到原版《長髮姑娘》入面呢一段：

「長髮妹發現自己個肚慢慢噉變大。原來王子搞大咗佢個肚。」

覺得呢段非常唔啱細路睇。《格林童話》就將呢段改咗做：

「有一日，長髮妹如常噉拉女巫上嚟，但佢唔小心講咗句：

『阿媽你好重，王子一嘢就上到嚟...』

於是佢同王子幽會嘅事就穿咗煲。」

文化影響

1970 年代一塊長髮姑娘郵票

内文：魔髮奇緣

《長髮姑娘》嘅故事都算幾出名，時不時有畀廿世紀嘅人改編做歌劇、音樂劇或者電影等媒體嘅作品。講電影嘅話，可以睇吓

• 迪士尼嘅《魔髮奇緣》（Tangled）
• 《史力加 3》（Shrek the Third）用咗長髮姑娘做其中一個配角。
• 2014 年《魔法黑森林》（Into the Woods）用咗原版《長髮姑娘》入面嘅某啲情節。

... 呀噉。

睇埋

• 《格林童話》
• 《群王書》

「

我好奇想知，到底長髮妹點洗頭？佢每日要用幾多樽洗頭水同護髮素？

」

拎

• Rapunzel - Jacob and Wilhelm Grimm （英文），格林兄弟嗰個《長髮姑娘》故事嘅英文版
• Literature / Rapunzel （英文），TV Tropes 依頁講《長髮姑娘》。