長髮姑娘

出自維基百科,自由嘅百科全書
1910 年呢幅插圖描繪「長髮妹伸咗佢個頭出窗外」嘅情境。

長髮姑娘》(粵拼coeng4 faat3 gu1 noeng4英文Rapunzel)係《格林童話》有記載嘅一個童話故事

故仔女主角係一個頭髮好長嘅女仔(長髮mui1),佢由細細個開始就畀一個女巫韞咗喺座高塔裏面,去唔到外面嘅世界。後嚟長髮妹遇到王子,最後脫離女巫嘅魔掌,同王子一齊得到大團圓結局[1]

呢個故仔有咁上下文化影響力。例如好出名嘅 2010 年迪士尼電腦動畫戲魔髮奇緣》噉,就係改編自《長髮姑娘》嘅。

主角個名[編輯]

2007 年影到嘅一樖漫遊風鈴草

以下講講女主角個名嘅意思。

《長髮姑娘》呢個故仔嘅女主角,原名叫 Rapunzel德文音標: [ʁaˈpʊntsl̩]),呢隻字原先嘅意思係某啲蔬菜嘅名,不過具體嚟講「係指邊種菜」就似乎會視乎地區同時代而有異,有可能係指[2]

而傳到嚟中文,女主角嘅常見漢字名有長髮姑娘或者長髮公主呀噉,呢個名嚟自佢嗰頭好長嘅頭髮。

如果要廣東話化啲嘅話,亦都可以嗌佢做長髮mui1-喺廣東話入面,呢隻漢字可以有最少三種唔同讀法,以下用嘅拼音係粵拼[3]

  • mui2阿妹細妹
  • mui4妹妹嘅第一隻字;
  • mui1-可以睇吓妹仔𡃁妹等嘅字詞;

當中 mui1 呢個讀法成日畀人用嚟幫女仔改花名-啲人幫一個女仔改花名嗰陣,好多時都係嗌佢做乜乜mui1嘅,當中乜乜會係佢嘅某啲特性,例如一個好鍾意飲咖啡嘅女仔可能會畀人嗌佢做咖啡妹[4]

劇情大綱[編輯]

原版《長髮姑娘》嘅情節大致係噉嘅[5]

主角嘅起源[編輯]

好耐好耐以前有一對夫婦。佢哋兩公婆都好鍾意細路,但一路都生唔到。佢哋隔離屋住咗個法力高強嘅女巫,女巫個花園好靚,種滿嗮各種嘅蔬菜。個女人一路望住女巫種嗰啲 rapunzel 望咗好耐,愈睇就愈覺得啲 rapunzel 望落好新鮮好綠,好似好好食噉。佢渴望想食女巫種嗰啲 rapunzel,仲渴望到病咗。個男人睇到,想知自己老婆因乜事咁唔開心,就開口問。個女人噉樣答:

「我好想好想食隔離屋個女巫種嗰啲 rapunzel,但又食唔到。我渴望到想死咁滯喇。」[註 1]

個男人見到佢老婆噉嘅樣,就好心痛。佢好驚個女巫,但為咗想老婆好返,就決定入女巫嘅花園偷菜。

當日天黑之後,個男人靜靜雞祟入女巫嘅花園,好快手噉摘咗啲 rapunzel,帶返屋企畀老婆。個女人見到就好開心,仲用咗啲 rapunzel 嚟整沙律,食得好滋味。但跟住第二日,個女人又話想食女巫種嗰啲 rapunzel,於是佢老公又偷偷哋走入女巫花園度想偷菜。點知佢摘完 rapunzel 想走嗰陣,就見到女巫企咗喺佢面前,睇到嗮佢做嘅一切。女巫望落好嬲噉嘅樣:

「你真係好沙膽呀。竟然走嚟偷我啲嘢!你一定要付出代價!」
「好對唔住呀,但我老婆好想食 rapunzel,唔食就會病添呀。」
「哼,噉呀,我啲 rapunzel 你鍾意摘幾多都得,但有個條件:你同你老婆生嘅頭一個細路要送畀我。放心,我會照顧佢,仲會當正佢係我親生嘅噉。」

個男人唔想得罪女巫,就答應咗女巫嘅要求。

過咗一排之後,個女人生咗個 BB 女。就喺個 BB 女出世嗰日,女巫就出現喺兩公婆面前,女巫幫 BB 女改咗個名叫 rapunzel,跟住就帶咗佢走。

被韞喺高塔[編輯]

呢幅插圖描繪想像中長髮妹住嘅高塔。

12 年嘅時光話咁快就過咗。

女巫[註 2]將佢個養女帶咗去一座喺森林深處嘅高塔嗰度。座塔冇門冇樓梯,不過女巫有一個方法可以進出高塔:高塔最頂樓有個窗,女巫 12 年嚟一直都冇剪過佢養女嘅頭髮,所以呢個女仔嗰頭金色嘅頭髮生到好長好長(跟住落嚟嘅篇幅,會開始稱呼佢做長髮妹);每當女巫想進入高塔嗰陣,就會企喺高塔個窗下面,大聲噉講[6]

「長髮妹呀,長髮妹,
放你啲頭髮落嚟畀我。」

-長髮妹聽到就會乖乖哋將佢嘅長頭髮掟出窗外,啲頭髮好長dam3得到落地面,跟住女巫就會捉實長髮妹嘅頭髮,畀長髮妹拉佢上去。

女巫一路都將長髮妹韞喺高塔入面,唔畀佢去外面嘅世界。如是者過咗幾年。有一日,有一個王子嚟到森林打獵,佢行到高塔附近嗰時,聽到一把好優美嘅女聲喺度唱歌,呢個女仔把聲靚到王子忍唔住停低聽,王子仲一路行去啲聲嘅來源。行行吓王子就見到長髮妹坐咗喺高塔個窗側邊唱歌-嗰把女聲正正就係長髮妹嘅。王子見到長髮妹生得咁靚把聲又咁甜美,就鍾意咗佢,想敲門同佢做朋友,但佢搵極都搵唔到門。於是王子就唯有死死哋氣噉返城堡

返到屋企之後,王子一路都掛住長髮妹嗰把優美嘅聲,就忍唔住日日都走去森林高塔嗰度聽長髮妹唱歌。有一次,正當王子坐咗喺樹後面,聽長髮妹唱歌聽到入嗮迷之際,女巫返到嚟。女巫用佢不溜用開嘅方法叫長髮妹放啲頭髮落嚟-而成個過程都畀王子睇到嗮。

到咗第二日,王子又走咗去高塔,企正喺高塔個窗下面,大聲噉講:

「長髮妹呀,長髮妹,
放你啲頭髮落嚟畀我。」

-長髮妹真係放佢啲頭髮落嚟,於是王子就成功入到高塔。

長髮妹見到王子,第一個反應係嚇親(因為佢由細到大從來未見過男人)。不過王子對長髮妹展示善意,大讚話長髮妹把聲好甜美好好聽,話自己好仰慕佢所以先至咁想同佢面對面講嘢。兩個人傾咗陣之後,長髮妹都覺得對王子有好感,亦都對外面嘅世界有興趣。王子跟住仲向佢求婚。長髮妹噉答:

「我都想跟你走,但我唔識點樣落地面。不如噉吖,你每次嚟探我嗰陣,都帶啲絲綢畀我,噉我咪可以用啲絲綢嚟織一條梯囉。」

如是者,長髮妹同王子兩個人就開始日日都見面幽會,長髮妹期望佢有朝一日可以離開高塔。不過好景不常,有一日,長髮妹發現自己個肚開始變大-原來佢個肚畀王子搞大咗[7]。女巫知道咗長髮妹喺度同王子幽會就大發雷霆,仲一嘢揸實長髮妹嗰頭長髮,一隻手攞起把鉸剪,剪斷咗長髮妹嘅頭髮,仲將長髮妹流放去一笪杳無人煙嘅荒野嗰度。

冇幾耐,王子唔知長髮妹畀女巫流放咗,就如常噉去高塔想幽會。女巫用剪咗落嚟嘅長髮拉王子上嚟。王子諗住可以見到長髮妹好興奮,但佢一上到去,第一時間見到嘅係女巫嗰塊想殺人噉嘅面。王子畀女巫嚇親,於是就由高塔嘅窗度跌咗出去。王子死唔去,但佢向下跌嗰陣跌正落啲有嘅植物度,畀啲棘插盲咗佢對眼。

最尾嘅結局[編輯]

王子盲咗,又冇得見長髮妹,就一路喺森林入面流浪,食草同植物嘅根嚟維生,仲一路喺度喊好想見返長髮妹。

過咗幾年之後,王子行吓行吓,走咗去荒野度,仲聽到一把熟悉嘅女聲喺度唱歌。王子一聽到把聲,就即刻向住把聲嘅來源前進。把聲嘅來源原來係長髮妹-長髮妹生咗對孖胎,三仔乸就喺荒野度住咗幾年。長髮妹一見到王子,就即刻上前攬實佢。佢見到王子又盲又成身污糟邋遢噉好心痛,忍唔住喊咗出嚟。長髮妹喊喊吓,啲眼淚流咗落王子塊面度,其中兩滴滴咗落王子對眼。點知原來長髮妹啲眼淚有法力,王子對眼就噉好返嗮。

王子睇得返嘢,就帶住長髮妹同埋佢哋對孖胎返去佢座城堡,同時王子嘅屋企人又好開心見得返佢。於是所有人都開開心心噉生活落去,大團圓結局

版本差異[編輯]

睇埋:格林童話

《長髮姑娘》有唔少變種版本。

例如《格林童話》噉。啲人睇到原版《長髮姑娘》入面呢一段[7]

「長髮妹發現自己個肚慢慢噉變大。原來王子搞大咗佢個肚。」

覺得呢段非常唔啱細路睇。《格林童話》就將呢段改咗做[5][8]

「有一日,長髮妹如常噉拉女巫上嚟,但佢唔小心講咗句:
『阿媽你好重,王子一嘢就上到嚟...』
於是佢同王子幽會嘅事就穿咗煲。」

文化影響[編輯]

1970 年代一塊長髮姑娘郵票
內文:魔髮奇緣

《長髮姑娘》嘅故事都算幾出名,時不時有畀廿世紀嘅人改編做歌劇音樂劇或者電影等媒體嘅作品。講電影嘅話,可以睇吓

... 呀噉。

睇埋[編輯]

我好奇想知,到底長髮妹點洗頭?佢每日要用幾多樽洗頭水護髮素[9]

註釋[編輯]

  1. 有版本話成件事都係女巫搞出嚟嘅,話佢對兩公婆落咗咒,所以個女人先至咁想食 rapunzel。
  2. 有版本話長髮妹會稱呼女巫做 Gothel

[編輯]

  1. Zipes, Jack (1991). Spells of Enchantment: The Wondrous Fairy Tales of Western Culture. Viking. pp. 794.
  2. Grimm, Jacob Ludwig Karl; Grimm, Wilhelm; Crick, Joyce (2005). "11. Rapunzel". Selected tales. Oxford world's classics. Oxford: Oxford University Press. p. 51. "...when she noticed a bed planted with the most beautiful rampions, or rapunzels..."
  3. . CantoDict.
  4. Chan, M. K. (2022). 11 My Unfair Lady. Humour in Asian Cultures: Tradition and Context. p. 264 "Kan4 lik6 mui1 勤力妹"
  5. 5.0 5.1 Rapunzel. Jacob and Wilhelm Grimm.
  6. 英文版:"Rapunzel, Rapunzel,
    Let down your hair to me."
  7. 7.0 7.1 Maria Tatar (1987). The Hard Facts of the Grimms' Fairy Tales, Princeton University Press, p. 18.
  8. 7 Parts Of 'Rapunzel' That Were Really Messed Up. Bustle.
  9. i wonder how does rapunzel washes her own hair and how many bottles of shampoo and conditioner does she need to use ? lol. WordPress.com,呢篇英文文章屬惡搞性質。

[編輯]