集體絕種

集體絕種（mass extinction）係指喺一個相對短暫嘅地質時代入面，喺一個好大嘅地理範圍入面嘅宏觀生物數量同埋種類都跌得好快嘅事。有科學家推測，自地球誕生以嚟，曾經出現過嘅生物已絕種咗超過98%。

造成生物集體絕種嘅可能原因好多，例如隕石撞咗落地球、超級火山爆發、氣候變化、海平面突然上升或者下降同埋缺氧等等，但都依家為止重未有完全嘅定論到底點絕種。每次嘅大滅絕事件都可以喺相對短時間入面令到80%－90%以上嘅物種絕種。但係，仍然有啲生命力強嘅物種可以生存到。同時，災變引起嘅環境變化亦都促使咗新物種嘅誕生。大絕種期間倖存嘅或者新生嘅物種喺絕種事件之後開始復蘇同埋發展，所以喺每次全球性嘅滅絕事件之後，都會伴隨住生物嘅復蘇同發展。

歷史上曾經有五次比較出名嘅集體絕種，分別係：

1. 奧陶紀-志留紀嘅集體絕種
2. 泥盆紀後期嘅集體絕種
3. 二疊紀-三疊紀嘅集體絕種—最嚴重嘅滅絕事件
4. 三疊紀-侏羅紀嘅集體絕種
5. 白堊紀-古近紀嘅集體絕種

近年提出人類活動造成緊第六次集體絕種。