香港童軍總會

童軍會
香港童軍總會
會明細
名	香港童軍總會
英文名	Scout Association of Hong Kong
總部	香港童軍中心
國	香港
開響	July 1915
創辦人	Vice Admiral R.H. Anstruther CMG
會員	110,771人（2007年9月）
香港總監	李家超
Scouting portal

香港童軍總會（英文：The Scout Association of Hong Kong）係香港嘅童軍組織。最初係一班商人響1909年搞起，之後到咗1914年，聖約瑟書院響英國童軍總會登記成立童軍旅，1915年正式成立。咁樣英國童子軍總會就成立咗香港分會。1977年，香港分會就由英國總會分咗出來，做咗世界童軍運動組織第111個成員，同埋香港法例1005章確定佢法律地位。

香港童軍總會開咗好多營地，好似基維爾營地、大潭童軍中心咁。家下總部就響九龍尖沙嘴香港童軍中心。成個會由香港總監負責，下面有5個地域分做35個區。2005年有制服成員78523人，2700個旅，係全香港最大嘅制服青少年團體。

歷史

起源

英國童軍運動響1907年開始，1909年帶到香港。1911年，英國商人同軍人就響香港搞童軍旅。響1912年4月16號上晝六點鐘，貝登堡坐 H.M.S. Lutzou 嚟到香港，重同港府官員響港督府食飯，傾下響香港搞個分會，同埋點樣響香港推行童軍推行。

1910年代

由零開始

香港童軍活動始於1909年。直至1911年，一啲英國商人以及軍人開始組織童子軍旅。

成立香港第1個旅團

1913年9月，聖約瑟書院嘅「香港第1旅」率先成立，並於1914年正式喺英國童軍總會註冊，成為香港童子軍史上嘅第一個旅團。

成立「香港童子軍總會」

「香港童子軍總會」（以下簡稱「總會」）喺1915年7月組成，負責統籌活動與訓練。

戰爭暫緩童子軍運動嘅發展

第一次世界大戰嘅爆發，當時駐港英軍，包括大部分童軍領袖要回國服役，因此香港嘅童軍運動被迫暫停。

香港首次童軍大會操

香港首次童軍大會操喺1915年舉行。

1920年代

戰爭後重組童子軍運動

1920年香港第1旅創辦人之一嘅寶雲中校（前少校）重臨香港重組香港童子軍總會。

戰後首次大會操

重組後嘅總會1921年1月8號喺花園道嘅瑪琍操場（現址係長江集團中心）舉行首次大會操。

舉行首屆威爾斯太子錦標賽

1922年4月6日，當時英國嘅威爾斯親王（後來嘅英王愛德華八世）訪問香港，並捐贈繡有「紋章」嘅錦旗畀香港童軍總會，作為童軍比賽錦標。首屆威爾斯太子錦標賽喺1923年舉行。

活動場地

借用「海員會所」

初時童軍總會冇固定嘅會址，多年來臨時借用舊政府大樓嘅房辦公同埋集會，平時活動要借用告士打道嘅「海員會所」。

第1個營地─「柴灣營地」

童軍總會用咗16,000港元買咗柴灣海旁（現址係柴灣公園）嘅一個營地，營地喺1929年開放使用，名為「柴灣營地」。

參加國際性童子軍活動之始

1929年，喺英格蘭西北部嘅伯肯赫德鎮舉行「第3屆世界童子軍大會」，當時香港亦有派童子軍領袖去參與，係香港參加國際性童子軍活動之始。

1930年代

香港童子軍參與抗戰行動

1937年，中國全面抗戰，大量難民湧入香港，童軍成員要救助難民，香港政府重要求童軍總會負責防空、傳訊和救護等工作，並成立童子軍傳訊隊。

首屆童子軍木章訓練班

首屆童子軍木章訓練班喺1936年柴灣營地舉行。

1940年代

次羅浮童軍大會

「羅浮童子軍」（1950年代中改叫「樂行童子軍」）早喺1922年嘅香港已經有活動，呢啲18歲以上，熱愛童子軍生活嘅年青人，響1940年8月港島聶高信山舉行首次全港羅浮童子軍大會。

大戰中協助警察工作

「第二次世界大戰」爆發時，一啲童子軍領袖或年長嘅童子軍成員喺各類民防單位做嘢，好似喺後備消防、後備警察、特務警察或者喺義勇軍中服役。喺香港保衛戰有貢獻，有啲隊員犧牲咗。

「國際童子軍支援服務隊」協助重組童子軍運動

日軍投降後，香港一片頹垣敗瓦，英國童子軍總會特別派咗一隊為數五個人嘅「國際童子軍支援服務隊」來港，幫手重建。童子軍運動再一次復活。

戰後嘅公開大集會

總會喺1946年4月28號喺港島半山植物公園舉行戰後首次全港童子軍聚會—聖佐治日會操，來自港九一共 672 個各級童子軍同埋領袖，接受軍政府總督菲士廷將軍檢閱。

成立「先進童軍」

英國童軍總會喺1946年10月成立「先進童軍」，至1950年代中改名「深資童子軍」，參加年齡係 15 至 18 歲，而「童子軍」嘅年齡仍維持11 至 18 歲。

「摩士小屋」

戰後得到軍部幫手，撥出花園道近山頂纜車站嘅一塊地攞嚟起新總部，由當年總會會長摩士爵士主持落成儀式，一間命名為「摩士小屋」嘅新總部喺1949年11月12號正式啟用。

1950年代

全港童子軍區由3個發展至5個

1951年初，當時英國總會負責英聯邦國家以及地區童子軍運動嘅巡迴總監杜爾先生，建議總會設立童子軍區。總會經檢討後，將香港劃分成為3個童子軍區；包括香港區、九龍區以及新界區。1952年，香港區以及新界區各自劃分為兩個童子軍區，連同九龍區，香港有5個童子軍區。

「地方」嘅成立

其後喺1958年將港島、九龍以及新界改為「地方」，並於各地方嘅管理範圍內劃分多個童子軍區。

新總部「摩士大廈」正式揭幕

隨住總會舉辦活動數量嘅急據上升，摩士小屋唔夠用。為此，得到摩士爵士捐助，同當時嘅「英皇御准香港賽馬會」嘅籌助，加上政府嘅資助，令總會嘅夢想得以實現，建成咗一所屬於自己嘅永久會所—九龍覺士道9號，命名為「摩士大廈」。摩士大廈喺1954年正式揭幕。

訓練和活動方面

• 成立「香港訓練隊」

1951年，「香港訓練隊」成立，專責領袖訓練。

• 成立「弱能童軍支部」

1956年8月1號總會正式成立「弱能童軍支部」，1967年改稱「特能童軍」。

• 舉行首次全港性嘅大露營

1957年10月19號至22號喺新界金錢村舉行首次全港性嘅「香港童軍大露營」，有1,300幾人參加。

• 舉行「第1屆基維爾聯誼會」

一批已領有木章嘅領袖，1958年喺新界將軍澳舉行「第1屆基維爾聯誼會」，目的係畀各領袖共同分享喺童子軍生活中所得到嘅歡愉和經驗，以及喺活動中所遇到嘅問題。

1960年代

開發營地

• 基維爾營地

踏入1960年代，童軍營地嘅需求更甚。後獲政府撥出九龍飛鵝山一塊大概200,000平方米嘅地用作童子軍營地，定名為「基維爾營地」。

• 下花山營地

其後再獲政府撥出位於荃灣西約嘅土地，名命為「下花山營地」，後因交通和水源問題不能解決，被迫於1977年12月交返香港政府。

「地方」上加設「地域」

於1958年成立「港島地方」、「九龍地方」以及「新界地方」後，於1967年，喺「地方」上加設「地域」，其後喺1973年改為只有地域以及區兩級制。

踏入國際領域

• 首次國際大露營

1961年係香港童軍成立50週年金禧紀念，1961年12月27號至1962年1月2號喺啟德機場附近嘅九龍仔（即家下嘅九龍仔公園）舉行咗首個喺香港舉行嘅國際大露營—「香港金禧大露營」，主題係「天下一家」，有2,732人參加。

• 參與國際性童軍會議

1964年香港代表團以觀察員身份參加喺馬來西亞舉行嘅「第4屆遠東區童軍會議」。翌年香港總監羅徵勤太平紳士用「英國代表團成員」身份參加喺墨西哥舉行嘅「世界童軍會議」。1966年香港更派出代表團參加喺英國舉行嘅「第4屆世界童軍訓練會議」。種種努力旨在令香港童軍運動達至國際水平，亦係踏入國際領域嘅第二步。

推出「五年拓展計劃」

1967年初，總會開始推出一個「五年拓展計劃」。計劃針對本港社會嘅實際需要，目的係擴展童子軍運動，令更多兒童可以喺各樣活動中得到有系統嘅指導。

總會改名

由1967年起，總會正式由「童軍總會香港分會」改名「香港童軍總會」。

成立「童軍知友社」，擴展服務至非童軍青少年

喺1969年組織直屬總會監督嘅「童軍知友社」，專責為香港非童軍青少年提供各類型康樂活動同埋訓練。

各支部名以及參加年齡嘅新規定

1967年跟隨英國母會嘅「未來動態報告書」轉行新制，1969年香港童軍全面性採納新制，「小狼支部」改為「幼童軍支部」；「童子軍支部」改為「童軍支部」，參加年齡則改為11-16歲；「深資童子軍支部」改為「深資童軍支部」，參加年齡則改為16-20歲，而「榮譽童軍獎章」只得深資童軍團嘅成員班可以考；至於「樂行童子軍支部」就喺新制中取消。

1970年代

開發營地

• 大潭營地

為配合日益膨漲嘅童軍運動，喺1970年代，得政府撥地之助，總會先後再增添兩個童軍營地。首先係1972年9月開放啟用嘅，位於香港島東南面，石澳同龜背灣之間嘅「大潭營地」（即現時嘅大潭童軍中心），個營地係用柴灣營地交換得來。

• 香港童軍訓練中心

其次係1975年3月9號正式啟用嘅「香港童軍訓練中心」（即現時嘅「洞梓童軍中心」）。

香港童軍鑽禧年慶祝活動

1971年係香港童軍鑽禧年，童軍總會喺新界青山（即屯門大興邨位置）舉行一連7日嘅「鑽禧大露營」。營期原定喺7月22至28號舉行，由於7月22號颱風襲港，營期順延一日，改喺7月23至29號舉行。大露營主題係「大同」，希望藉此發揚童軍天下一家，情同手足嘅精神，近5,000人參加。接住而嚟嘅慶祝活動，係首次喺香港舉行嘅「第2屆世界童軍公共關係研討會」以及「第5屆英聯邦童軍會議」，奠定香港童軍喺國際上嘅地位。

首期《香港童軍》面世

童軍總會刊物《香港童軍》首期喺1973年面世。

成立深資混合團

1975年以試驗性質成立由男深資童軍以及深資女童軍組成嘅混合團，1978年7月開始，總會正式接納女性為深資童軍支部成員。

成立第4個地域

1976年，東九龍地域成立為第4個地域。

昂然晉身為世界童軍組織會員

1975年3月17號，英聯邦總監羅保爵士訪港，並建議香港加入世界童軍組織，成為一個獨立會員。1977年4月16號總會脫離英國童軍總會，成為世界童軍組織嘅第111名會員，行政亦正式獨立，有自決自主嘅權利，自負權責。新會名為「香港童軍總會」。

國際活動

1978年「第11屆亞太區童軍會議」由香港主辦。成為香港自晉身世界童軍組織成員後，首次舉辦嘅一項國際性童軍活動。一連7日嘅會議以「八十年代之童軍運動」為主題，參加者來自19個亞洲太平洋區嘅童軍代表，達300幾人。

1980年代

第1屆全港總監政務會議

「第1屆全港總監政務會議」喺1980年5月25號舉行，主題係「八十年代嘅香港童軍運動」，並定下一系列方針，令香港童軍更能適應當時嘅環境以及社會嘅演變。

天虹計劃

總會喺1982年3月成立「天虹計劃」工作小組以及實驗旅團，目的係將童軍活動推廣至童軍以及幼童軍支部年齡嘅女性同埋8歲以下嘅兒童。基於試驗結果以及工作小組之建議，總會喺1984年10月正式進行「天虹計劃」。1985年，小童軍支部正式成立，參加年齡為6-8歲。幼童軍團如果符合基本條件，可兼收女性成員，至於童軍團就延長一年試驗期限。

獲頒授「國際青年年傑出活動」獎

1985年，為響應聯合國訂定嘅「國際青年年」，總會舉辦咗多項活動慶祝。同年7月香港童軍總會喺西德慕尼黑舉行嘅第30屆世界童軍會議中，獲頒授「國際青年年傑出活動獎」，以表揚佢喺推行參與社區發展嘅成就。

紀念香港童軍75週年

1986年係香港童軍運動嘅75歲生辰，250幾名童軍領袖以及做過童軍領袖嘅人士聚集柴灣公園（前身係柴灣營地），參加為紀念香港童軍75週年樹立牌扁嘅揭幕儀式。

香港鑽禧大露營

「香港鑽禧大露營」─1986年12月27號至1987年1月1號喺西貢大埔仔（家下香港科技大學嘅位置）舉行。呢次大露營以「邁進」為主題，意思喺童軍運動正邁步向前，與時代並進，邁進另一個新紀元。營友來自世界各地13個國家嘅童軍，多達5,143人參加。

模範童軍

1987年首次舉行「模範童軍」選舉，以選拔一啲喺童軍訓練、學業、社區服務、同家庭成員關係等各方面有傑出表現嘅童軍成員予以表揚，為童軍成員樹立典範。

1990年代

新總會總部「香港童軍中心」

1991年係香港童軍80週年慶典，香港童軍總會舉行多項紀念活動。同年舉行新總部大廈「香港童軍中心」嘅奠基典禮。總會喺1994年6月由摩士大廈搬去香港童軍中心，摩士大廈亦喺1994年6月交返政府。

拓展童軍運動

總會喺1991年定下拓展童軍運動目標，由當時嘅56,172名童軍成員，到2002年增至83,000名。

開拓「延續教育」服務

1995年4月，童軍總會會開拓「延續教育」嘅服務，成立「延續教育中心」，為有需要人士提供非正規學習嘅機會，開辦學術、商科以及文化藝術嘅課程。

香港童軍運動85週年紀念

1996年適逢香港童軍運動85週年紀念，童軍總會藉此籌募超過100萬港元，用作資助童軍成員參加世界大露營嘅經費。

許招賢先生獲委任為香港總監

1997年1月1號起，許招賢先生獲委任為香港總監，接替卸任嘅周湛燊博士。周博士帶領香港童軍運動邁向新紀元，佢策劃起樓高25層嘅香港童軍中心，為童軍總會成為一個自給自足嘅制服服務機構。許總監亦喺上任後訂定一連串發展計劃，以配合拓展童軍運動嘅工作以及提高質素，期望喺2002年達成拓展成員人數至83,000嘅目標。

第19屆亞太區童軍會議

1998年「第19屆亞太區童軍會議」喺香港童軍中心舉行，主題係「童軍邁向新紀元」，係有史以來第一個完全喺童軍物業內舉行嘅國際性大型童軍會議。

香港童軍跨世紀大露營

「香港童軍跨世紀大露營」於1999年12月28號至2000年1月2號舉行，地點係西貢郊野公園灣仔半島。主題係「邁向新紀元，同享大自然」，達3,350人參加。喺營期其中一日（1999年12月30號），參加者更喺5分鐘內造出世界最長嘅平結鍊，當中共有4,500個平結，全長6,858米。

香港童軍邁向21世紀

為進一步拓展香港童軍運動以及提高質素，喺1999年推出《香港童軍邁向21世紀》小冊子，介紹一連串嘅發展計劃，包括加強內部溝通、強化內部組織、給予前線工作單位嘅支援、提升童軍形象以及拓展童軍運動。

2000年代

成立第5個地域

為配合新界地區嘅未來發展，新界地域喺2000年4月1號擴展為兩個地域，分別名為「新界地域」以及「新界東地域」。新界東地域亦成為第5個地域。

發展學校旅團計劃

2000年總會推出「發展學校旅團計劃」，計劃喺兩年內協助全港學校開辦童軍旅團或擴展現有童軍旅團嘅規範，令更多學生能夠有機會參與童軍活動。

確定「抱負」、「使命」以及「價值觀」

喺2000年10月確認咗香港童軍總會嘅「抱負」、「使命」以及「價值觀」，為70,000幾名成員以及即將加入嘅其他人士，提供清晰方向。

延續教育中心成為註冊學校

延續教育中心喺2001年9月1號起註冊成為學校，正式改名為「香港童軍總會綜合教育中心」。

香港童軍90週年紀念大露營

「香港童軍90週年紀念大露營」2001年12月23號至26號喺西貢郊野公園灣仔半島舉行，以「竭盡所能」為主題，超過3,500人參加。

第45屆貝登堡會士會盟

喺2002年4月26號至28號期間，協助世界童軍基金會於香港舉行「第45屆貝登堡會士會盟」，瑞典國王卡爾十六世‧古斯塔夫親臨香港童軍中心出席。呢次活動為世界童軍基金會籌得385,000美元，更獲瑞典國王嘅高度讚揚，進一步肯定香港童軍對世界童軍運動嘅貢獻。

參與世界童軍運動管治工作

副香港總監（支援）許宗盛先生，MH 2002年7月15號至19號期間喺希臘舉行嘅第36屆世界童軍會議中被推選為世界童軍委員會委員之一，成為第2位被選擔任呢個要職嘅香港童軍成員，參與世界童軍運動嘅管治工作。許宗盛總監更喺2005年9月5號至9號喺北非突尼西亞舉行嘅第37屆世界童軍會議中獲選為世界童軍委員會主席。

超額完成1991年成員增長目標

童軍成員人數喺2002年底已達89,925人，遠超於1991年訂下達到83,000人嘅目標。截至2005年底，童軍成員人數已增至超過10萬人。

香港衛生先鋒抗疫大行動

自2003年非典型肺炎喺香港爆發，加強保障個人以及公共衛生成為抗禦傳染病蔓延嘅首要任務。為支持政府推行「全港每月清潔大行動」，童軍總會特別發動「香港衛生先鋒抗疫大行動」，以喚起全港市民對清潔香港嘅關注，並於2003年6月15號舉行啟動禮。行動得到30,000幾名童軍成員同埋親友嘅響應。

援助受南亞海嘯影響嘅國家

2004年12月26號發生嘅南亞海嘯，導致多個國家損失慘重。童軍總會喺海嘯發生後嘅第3日舉辦「童軍相處如手足、伸出援手—每人$10」嘅籌募運動，之後更推出「童軍賑災籌款章」。籌款活動為災民籌得超逾港幣129萬。善款已送交世界童軍組織嘅「Tsunami Scout Aid」基金，用嚟協助災民早日重建家園，為當地社區進行重建工作。

內地露營活動

「露營」係童軍主要嘅活動之一，童軍總會特登喺2004年1月24號至27號喺深圳舉辦「深港青少年交流營」，藉此向內地青少年介紹童軍別具特色嘅訓練和活動，亦令童軍成員有機會加深對祖國嘅認識以及了解。呢次露營活動以「攜手邁進2004」為主題，係童軍總會首次同深圳市青年聯合會以及深圳市少先隊工作委員會合辦嘅交流營活動，共有490名香港童軍及360名深圳市青少年參加。2005年，童軍總會5個地域更突破性喺暑假期間到內地偏遠地區進行唔同形式嘅小隊露營，足跡遍及新疆、甘肅、青海、吉林同埋內蒙古，超過300名香港童軍參加。

「大都會露營」

2006年係童軍運動喺香港發展嘅第95年。呢年童軍總會舉辦咗逾20項慶祝活動，包括嘉年華、競技、演唱會、交流營、攝影比賽、晚會等。喺2006年12月27號至2007年1月1號期間，童軍總會更喺即將發展為西九龍文娛藝術區嘅地方舉行「2006年香港童軍95周年紀念暨2007年世界童軍100周年紀念大露營」（「大都會露營」），不但將整年嘅95周年慶祝活動推向高峰，更為2007年世界童軍運動100周年紀念活動揭開序幕。呢項活動創下咗多項第1次，包括首次喺城市中心露營、首次邀請內地偏遠省市嘅青少年參與香港童軍嘅國際性露營、亦係首次開放營地畀非童軍人士參觀。呢次大露營共有4,221名來自本港、澳洲、加拿大、韓國、蒙古、星加坡、台灣、泰國、澳門嘅童軍以及重慶、江蘇、嘉慶以及深圳嘅青少年參加，參與開放日嘅人數超過3,000人。大露營嘅重頭戲係同香港電台合辦嘅除夕倒數音樂會。

「王兆生領袖訓練學院」

香港童軍總會籌建多年嘅「王兆生領袖訓練學院」喺2007年初啟用。學院唔單止為領袖訓練提供完善而專業嘅設施以及訓練場地，更為香港童軍運動奠定重要嘅里程碑。學院喺西貢沙咀，除咗有多項基本配套設施，重包括多用途禮堂、講室、營舍、食堂、洗滌間、浮橋以及戶外活動場地，重有歷奇活動設施。學院啟用初期主要為領袖木章訓練班提供訓練場地，跟住發展方向喺舉辦領導才訓練課程。

慶祝童軍百周年世界同步大露營

2007年係世界童軍百周年，童軍總會除咗喺2007年7月底派出歷來最龐大嘅香港代表團，超過600人參加喺童軍運動發源地英國舉行嘅第21屆世界童軍大露營，亦喺7月29號至8月2號於香港西貢萬宜水庫西壩舉行「慶祝童軍百周年世界同步大露營」，呢次活動採用「團隊挑戰」形式，要求營友用小隊制度完成各項活動，包括「水陸挑戰」同埋「終極挑戰」，鼓勵營友透過小隊挑戰活動嚟提高合作精神，同埋享受童軍生活及露營嘅樂趣。呢次露營活動吸引咗超過1,500名香港童軍以及內地青少年參加。大會亦喺8月1號上晝8時喺營內舉行「世界同步日出禮」，紀念一百年前童軍運動創辦人貝登堡勳爵喺英國白浪島首次吹響號角，舉行第一次實驗露營。

「領導及管理文憑」課程

香港童軍總會同香港理工大學專業進修學院合作推出嘅「領導及管理文憑」喺2007年9月推出，由30個學分組成，「領袖木章訓練系統」佔其中9個學分。課程內容融合領導才能理論、實踐以及現代管理模式，目的除鼓勵童軍領袖以考取木章為獲得具大專院校認可嘅學術資格、自我增值以及持續進修之外，並有助童軍運動以及領袖嘅個人發展。呢個係香港首個亦係當時唯一由青少年制服團體同本地大學合作開辦嘅認可文憑課程，今次合作係香港童軍發展嘅一個重要里程碑，亦係童軍訓練與正規教育制度接軌嘅轉捩點。

總領袖及總監

香港總領袖喺1997年香港主權移交前，一直由香港總督作為英女王嘅代表，香港主權移交後就由香港特別行政區首長做。

歷屆香港總監

任數	姓名	年期
1	Alexander Anderson McHardy（麥夏德少校）	1914年～1915年
2	Robert Hamilton Anstruther（安史導中將）	1915年～1920年
3	F.J.Brown（寶雲中校）	1920年～1921年
4	George Turner Waldegrave（華德利牧師）	1921年～1934年
5	Nelson Victor Halward （侯利華會督）	1934年～1950年
6	柯昭璋	1950年～1953年
7	陸榮生	1953年～1954年
8	高本	1954年～1963年
9	羅徵勤 ，JP	1963年～1973年
10	馬基 ，JP	1973年～1984年
11	周湛燊 ，OBE，JP	1985年～1996年
12	許招賢 ，BBS	1997年～2003年
13	鮑紹雄 ，SBS	2004年～2007年
14	陳傑柱 ，PMSM	2007年～2011年
15	張智新	2011年～2015年
16	吳亞明	2015年～2019年
17	劉彥樑	2019年～

出面網頁

• 香港童軍總會網頁
• 新界地域網頁
• 新界東地域網頁
• 香港基維爾營地
• 大潭營地
• History of Hong Kong Island Region（中文）
• First Hong Kong Group（St. Joseph's College）