廉政公署 (香港)
(由ICAC跳轉過嚟)
廉政公署（英文：Independent Commission Against Corruption，簡稱：ICAC），俗稱「老廉」，係香港一個專門打擊貪污嘅獨立執法機構，響1974年2月14號成立，香港主權移交前全名叫做總督特派廉政專員公署。直至到公署成立，香港政府部門貪污問題好嚴重，尤其係負責執法嘅警隊至嚴重，根本無部門可以對抗貪風，因此當時香港總督麥理浩先至會建立廉政公署。直接用港督個名同權來打擊貪污。
未有公署之前，警隊都曾經有一個反貪污小組，但係鑑於警隊貪污嚴重，如果對某人作出調查，有機會連調查員自己亦會被揪出嚟，因此佢嘅效力實際上只係好細。而事實上，唔少警員亦因為各種原因而被逼對貪污妥協，加入行賄同受賄嘅行列。
廉政公署成立初時，民眾本來對廉署冇任何期望，事關過去政府有關反貪污嘅行動都係以失敗告終。但係呢次成立廉政公署，由於係直接向港督負責，因此喺行動上得到唔少方便，以致好快就喺民間建立聲譽同埋威信。但初期對於警隊嘅調查，由於牽連甚廣，令到警隊內人心惶惶，最終引起警員嘅不滿，因此當時廉署人員成日同警員發生衝突。及後宣佈喺1977年以前貪污較輕嘅可以獲得特赦，衝突先至平息。
