悠仁

悠仁
	親王
	2020年
私人明細
父	秋篠宮文仁親王
母	文仁親王妃紀子
出世	2006年9月6號（18歲）; 平成十八年; 日本東京都港區南麻布愛育醫院
宗教	神道
出世名	神道

悠仁親王（日文：悠仁親王／ひさひとしんのう ^{Hisahito Shinnō}；2006年 9月6號—），日本皇室成員，係日本天皇第二順位繼承人^[1]，老豆係皇嗣文仁親王，阿媽係紀子，家姐係小室真子同埋佳子內親王。

生平

2006年9月6號上晝8點27分，悠仁響東京都港區南麻布愛育醫院以剖腹產嘅形式出世。出生嗰陣身高48.8厘米，體重2558克（5.64磅）^[2]。悠仁係第一位唔響宮內廳醫院或皇宮出世嘅皇室成員，第一位以剖腹產嘅形式出世嘅皇族，亦係明仁天皇唯一一個男孫。

9月12號，老豆秋篠宮文仁親王響命名之儀中改佢個名叫「悠仁」，期望佢「可以悠然自得咁走過長久嘅人生」。徽印係「高野槙」（日文：高野槙コウヤマキ^(Kōyamaki)），期望佢好似高野槙咁過得又高壯又筆直。

2010年入讀御茶水女子大學附屬幼稚園。

2011年11月3號，進行着袴之儀。本身着袴之儀打算響年初搞，但因為東日本大地震而延期到11月。

2013年4月，宣佈入讀御茶水女子大學附屬小學，係現行皇室典範之下第一位唔響學習院初等科讀書嘅皇室成員。

2019年4月，升讀御茶水女子大學附屬中學。同月26號，發生咗佢嘅座位畀人放咗把水果刀嘅事件^[3]。疑犯響同月29號喺神奈川縣平塚市一間酒店畀警察拉咗^[3]，犯案動機係反對天皇繼承制度^[3]，2020年疑犯畀人判坐監。

2019年5月1號，隨住伯伯德仁成為天皇，悠仁成為皇位繼承順位第2位，排響老豆文仁後面。同年8月，佢跟住老豆阿媽一齊去不丹旅行，係悠仁第一次海外訪問^[1]。

2021年，參加北九州市立文學館主辦嘅文學獎，題目係「訪問小笠原諸島」，悠仁嘅作品成為中學部佳作^[4]。2022年2月，佢嘅作品畀人指出內容引用唔合理，加上陷入抄襲風波，惹嚟唔少批評^[5]^[6]。2022年4月8號，宮內廳話悠仁並冇抄襲^[5]，並且響原先嘅作品上追加返引用同註釋，將修改版本畀返北九州市立文學館^[7]。4日後，北九州市立文學館公開修改後嘅版本^[8]。

2022年4月，通過御茶水女子大學附屬中學同筑波大學附屬高中合作嘅「提攜校進學制度」，入讀筑波大學附屬高中^[9]^[10]。

繼承問題

參見：日本皇位繼承問題（日文：皇位継承問題 (平成)）

皇位繼承順位（令和元年〈2019年〉5月1號-）
順位	皇位繼承資格者	讀音		性別	生世年月日/年紀	同天皇嘅親戚關係（日文：続柄）
第1位	秋篠宮文仁親王	あきしののみや	ふみひと	男	(1965-11-30) 1965年11月30號（58歲）（昭和40年）	皇弟 / 上皇之第2皇男子
第2位	悠仁親王		ひさひと	男	(2006-09-16) 2006年9月16號（18歲）（平成18年）	皇姪 / 秋篠宮文仁親王第1男子
第3位	常陸宮正仁親王	ひたちのみや	まさひと	男	(1935-11-28) 1935年11月28號（88歲）（昭和10年）	皇叔父 / 昭和天皇第2皇男子

根據1947年起修訂並且實施嘅《皇室典範》，天皇皇位只可以由皇族男性同埋佢嘅男性後人繼承。但係平成時代前期，天皇明仁嘅兩個仔（大仔皇太子德仁親王、二仔秋篠宮文仁親王）長期淨係得女，皇室已經有四十一年冇其他可以繼承皇位嘅男性後人出世，所以當時有人提出修改《皇室典範》，一係畀女性後人做天皇，一係恢復嗰班響1947年脫離皇籍嘅舊宮家嘅皇族身份。而悠仁響2006年嘅出世，令當時準備修改《皇室典範》嘅行動好快就停止咗。