本港台

本港台
邊位屬下	亞洲電視
開播	1963年9月30號
停播	2016年4月2號
廣播語言	粵語
口號	亞洲電視　繽紛新一頁
總部位置	香港新界大埔 大埔工業邨大盛街25～37號
前稱	麗的呼聲中文台（1963～1973） 麗的一台（1973～1982） 亞洲電視中文台（1982～1987） 亞洲電視黃金台（1987～1989） 亞洲電視本港台（1989～2016）

 亞洲電視本港台（粵拼：aa3 zau1 din6 si6 bun2 gong2 toi4） （簡稱本港台，英文：ATV Home）係香港亞洲電視提供嘅免費綜合頻道，主要以粵語播放劇集、綜藝、資訊等節目，亦都有部份以麗音廣播（NICAM，模擬版本）或者係多重AC-3位流（數碼版本）作多種語言廣播嘅普通話、韓文、英文跑馬節目。本港台主要喺平日黃金時間播放自製同埋外購嘅劇集，黃昏就播放卡通動畫，而週日多播放資訊性節目，以吸引友台（無綫電視翡翠台）嘅觀眾。本港台嘅主要對手係無綫電視翡翠台，因為慣性收視嘅關係，翡翠台嘅收視率比本港台經常超出2倍以上（平均收視最高去唔到15點），所以本港台最近改變策略，吸引中國內地觀眾收睇，吸引內地廣告商喺非黃金時段喺本港台放廣告。

歷史

内文：亞洲電視

亞洲電視本港台早喺1963年9月30號開始播放，嗰時佢係麗的映聲嘅中文頻道，亦都叫做中文台，係當時嘅收費電視頻道。喺1973年4月6號，麗的映聲為咗面對無綫電視嘅競爭，決定由有線收費廣播變做免費無線廣播，麗的映聲亦都改名做麗的電視，設有「麗的中文台」同埋「麗的英文台」兩個頻道，同年12月，改做彩色廣播。1978年3月14號開始24小時播放。第一次改名係喺1987年1月，嗰時已經被易手同埋改名做亞洲電視嘅麗的電視，將「中文台」改名做黃金台，以對抗競爭對手翡翠台。喺經過多次易手之後，喺林百欣嘅帶領下，「黃金台」再次改名做而家嘅「本港台」。跟住喺2001年去到2004年間，喺由九巴設立嘅路訊通播放節目精華片段。2007年9月，亞視同埋無綫電視達成協議，喺同月29號起破天荒聯合提供佢哋旗下嘅中文頻道原本由香港電台電視部佔用嘅黃金時段，兩間電視台將會喺有關時段播番佢哋製作或者重新包裝嘅節目，但係播放嘅節目需要由兩間電視台共同協商決定（因呢啲時段係由亞視同埋無綫共同提供同管理）。根據同無綫電視達成嘅協議，本港台喺星期六、日有關時段播放嘅第一批節目分別係時事追擊、全日本爭霸大攻略（外購）、金錢世界同埋地球深度行IV之鐵証待判。

停播之後

2016年4月1號深夜（UTC+8），亞洲電視屬下所有頻道就快熄機時，原訂會播出一張卡，但後嚟走咗數。係因為嗰晚《夜間新聞》嘅主持吳泳茵喺Facebook發文話驚住「相關部門」交接唔順利，話喺23:00到00:00停播前嘅節目播放特別緊張，所以最後唔可以有亞視撈稿或其它特別型式嚟講拜拜，即使亞視希望臨時改播佢喺2016年3月主持嘅《今日亞洲》污水處理特輯都唔得，重批評政府點解重要向電視台搞咁多限制。而程啟光講嘅「一張卡」實際係嗰晚夜間新聞播嗮之後出現嘅「亞洲衛星電視　亞洲網絡電視　開創亞洲電視新紀元」呢張，之後臨時插播成《亞洲電視新一頁》嘅節目，話吳泳茵訪問亞視股東代表何子惠嘅片。雖然之後播《Miss Asia 25th. 亞姐瑰麗巡迴》節目諗住播到發射站切斷信號為止，但節目未播嗮就被切斷信號，變成藍屏畫面，隨後變成雪花或黑屏（部份電視機重係保持藍屏）。隨後無耐，收到本港台嘅地區出現唔同嘅變化：

所在地	頻譜變為
香港	藍屏→雪花→港台電視31A
廣州	（珠江寬頻）風景畫，帶有「信號傳輸故障，請稍後……」嘅字樣→藍底白字，上邊有「節目信號中斷」嘅宋體字→測色板→藍底帶「本港台和國際台由於牌照到期已停播」嘅白字 （白雲有線）風景畫，帶有「信號傳輸故障，請稍後……」嘅字樣→藍底白字，上邊有「節目信號中斷」嘅宋體字→測色板→無限循環播白雲新聞 （廣東有線）直接藍底白字，上邊有「節目信號中斷」嘅宋體字（有洩漏過「RTHK 31A」嘅字樣，但無耐消失咗）→風景畫，帶有「信號傳輸故障，請稍後……」嘅字樣→藍底帶「本港台和國際台由於牌照到期已停播」嘅白字 （番禺有線）藍底白字，上邊有「節目信號中斷」嘅宋體字→彩條信號→藍底帶「本港台和國際台由於牌照到期已停播」嘅白字
深圳	（天威視訊）循環播名為「今日香港」嘅短片，音效播中華人民共和國國歌→出現藍底，帶「本港台和國際台由於牌照到期已停播」嘅仿宋體白字 （羅湖有線）拍同歐洲別墅建築有關嘅動畫→藍屏
惠州	風景畫，帶有「信號傳輸故障，請稍後……」嘅字樣→出現藍底，帶「本港台和國際台由於牌照到期已停播」嘅仿宋體白字
珠海	直接出現藍底白字，上邊有「節目信號中斷」嘅宋體字。→出現藍底，帶「本港台和國際台由於牌照到期已停播」嘅仿宋體白字
江門	除咗新會轉播推介垃圾廣告之外，其它地方都轉播CCTV-1。
肇慶	插播肇慶當地廣告
清遠	插播清遠當地廣告
韶關	直接出現藍底白字，上邊有「節目信號中斷」嘅宋體字。
佛山	佛山景區宣傳視頻
汕頭	變成中阿衛視節目成1～2分鐘→汕頭當地廣告→測色板→出現藍底，帶「本港台和國際台由於牌照到期已停播」嘅仿宋體白字

註：喺廣東地區，省線喺電視台就快停播之前嗰1分鐘出現事先錄定嘅香港政府宣傳片；部分唔受當地廣電部門猛咁插播廣告影響嘅城市，甚至出現未到羅霖講「特別係經濟獨立」時直接出現「節目信號中斷」嘅畫面；羅湖有線收到嘅信號喺停播之前出現歐洲嘅別墅建築之後出現黑屏畫面。廣東有線屬下管轄嘅電視地區，就長時間出現藍底，帶「本港台和國際台由於牌照到期已停播」嘅仿宋體白字形式出現，跟住廣州有線喺2016年4月5號都轉播咗廣東有線畀出嘅界面。而用模擬電視或數字電視收唔到本港台嘅居住粵港澳以外地區人士，喺2016年3月31號深夜，原先本港台嘅網絡直播平台信號變成中天綜合台。喺廣州白雲有線屬下嘅本港台，重喺屏幕下邊打出咗「因經營不善，所以本港台同國際台從2016年4月2號開始正式停播，敬請諒解。」嘅跑馬字幕。

喺廣東，唔係蛇口有線或羅湖有線接收香港電視嘅用戶，由於收到viuTV喺4月6號開播嘅關係，2016年4月2～5號一度猛咁打電話同網上投訴點解重未調整電視信號，後嚟廣東有線出嚟解釋話暫時未收到允許轉播新頻道嘅通知而未轉播到。

2016年4月6號，湛江部分地區用華娛同星空頂咗原嚟嘅亞視兩個頻道位，甚至有部分地區變成測試頻道。

2016年4月12號，廣州地區嘅本港台頻譜播「本港台和國際台由於牌照到期已停播」嘅公告變咗宋體字體；而白雲有線重喺度無限播區級新聞；喺深圳部分地區已經改播購物頻道，羅湖嗰邊已經改播NOW屬下嘅頻道；廣東其它地區有部分地方已經改播珠江電影頻道或直接刪台嘅處理。三日後，廣州、茂名、佛山有線同深圳天威嘅本港台畫面變成藍屏無字嘅畫面，部分地區直接刪咗台，而增城有線屬下嘅電視頻道位變成測試頻道。

2016年4月19號，江門地區用浙江衛視頂住原先本港台嘅位。

2016年4月26號，汕頭地區用旅遊衛視頂住原先本港台嘅位。

2016年5月12號，廣州嘅白雲有線唔單止循環播白雲新聞之外，甚至重改成轉播重慶電視台時尚購物頻道；番禺有線將本港台嘅信號位改成中國氣象頻道。

2016年5月底，茂名地區將原先亞視本港台嘅頻道位變成黑屏。

2016年7月1號，新會地區用澳亞衛視頂住原先本港台嘅位。

2016年7月底，廣州嘅白雲有線將原先無限循環插播白雲新聞嘅本港台位改成新疆漢語衛視，但2個月後又打回頭。

2016年8月11號，茂名有線用茂名電視台購物頻道頂住原先本港台嘅位。同日喺潮州潮陽區嘅有線，用咗遼寧衛視頂住原先本港台嘅位。而陽江銀視利用除01:00～07:30時段外嘅其它時段播劇集。

2016年11月28號，廣州市區屬下嘅珠江寬頻同埋甜果時光，用咗呢個頻道位開播花城頻道。

節目

由本港台嘅前身，麗的映聲中文頻道去到而家亞洲電視本港台嘅四十幾年間，本港台製作出唔少令觀眾深刻同震撼香港嘅節目，亦都曾經打破慣性收視嘅紀錄。以下係其中一啲節目：

• 大儒俠史艷文配音劇（2001年－2002年）配音台灣木偶劇
• 賽馬直擊（1967年－1997年，2001年－2015年）亞洲電視最長壽節目之一。
• 沙灘小姐選舉（1973年）
• 六合彩（1976年－1997年，2001年－2015年）
• 百萬跳（1977年）64個鐘嘅馬拉松式跳舞，幫公益金籌到一百萬，做咗轟動一時嘅創舉
• 大地恩情（1980年）同翡翠台嘅節目打成平手，打破無綫慣性收視嘅規律
• 亞洲小姐（1985年－2000年、2004年－2015年）新嘅選美準則，引起關注（2006年一屆最高收視51%）
• 電視先生選舉（1986年）首次男性選舉，開創先河
• 今日睇真D（1994年－2000年）以補充新聞時段不足嘅資訊節目，大受觀迎
• 十大電視廣告頒獎典禮（1995年－2010年）成為廣告業一大盛事
• 我和殭屍有個約會（共3輯，分別喺1998年、2002年同2004年播放）新鮮嘅題材深受年輕人愛戴，第2輯嘅結局更加打破無綫慣性收視嘅規律
• 藍色生死戀Ⅰ、藍色生死戀Ⅱ（2002年）刮起韓劇熱潮
• 百萬富翁（2001年－2004年）掀起知識資訊節目熱潮
• 開心大發現（2004年－2005年同2011年）改編自日本收視冠軍節目
• 六點鐘新聞喺2005年12月17號創下51%收視
• 亞洲先生（2005年）第一個用亞洲地區做主題嘅選美盛事
• 香港電影金像獎（2010年－2011年）攞到香港地區嘅免費電視轉播權，2010年嗰屆最高收視15.2點，收視百分比有55%，比翡翠台嘅節目高。
• 觸動‧陳奕迅同陳奕迅在陌生人的皮膚下品嘗大氣音樂會（2011年），打破亞洲電視唔可以幫香港歌手做節目。

有關本港台嘅節目，請睇亞洲電視節目一覽。

本港台全港模擬電視訊號發射頻道同頻率

發射站	頻段	頻道
慈雲山（主）	UHF	第23頻道
九華徑	UHF	第22頻道
坑口村、虎地、元朗374	UHF	第24頻道
西貢對面海、深井、營盤、東涌數村、長洲	UHF	第26頻道
將軍澳村	UHF	第30頻道
馬灣田寮村	UHF	第31頻道
中西區	UHF	第32頻道
大澳、薄扶林、元朗新時代廣場	UHF	第39頻道
鴨脷洲及香港仔	UHF	第40頻道
荃灣、茶果嶺	UHF	第41頻道
青山、飛鵝山、赤柱、石壁、元朗安樂路	UHF	第42頻道
金山、南朗山、砵甸乍山、康樂園、沙田駿景園、藍地	UHF	第43頻道
屯門數村	UHF	第45頻道
大埔泮涌村	UHF	第48頻道
葵涌大白田	UHF	第49頻道
柴灣、聶高信山、筆架山、大嶼山275、上洋山、大欖涌141	UHF	第52頻道
九龍坑山、南丫島、琵琶山、照鏡環山、橫洲、石崗、大埔仔、沙頭角	UHF	第53頻道
紅花嶺、元朗297	UHF	第57頻道
馬灣、青衣	UHF	第60頻道

本港台喺美洲

亞洲電視本港台喺2002年初，推出24小時廣東話衛星頻道，亞視本港台（美洲版）。呢條頻道由Echostar旗下嘅DISHNetwork提供服務。亞視本港台（美洲版）主要播放同香港同步嘅新聞報導同時事節目、經典劇集同埋綜藝節目。

參考

• 香港電視廣播服務頻率表 [1]

睇埋

• 自製劇集︰亞洲電視劇集一覽、本港台電視劇集一覽 (2007年)
• 外購劇集︰亞洲電視外購劇集一覽
• 外購動畫：亞洲電視外購動畫一覽

註同攷

註

攷

出面網頁

• 亞洲電視
• 亞洲電視本港台