青衣山

青衣山
青衣山
海拔	334米（1,096英尺）
位置	香港青衣島
座標	22°20′14″N 114°06′01″E
青衣山 呢座山喺香港嘅地理位置

青衣山（Tsing Yi Peak）喺香港青衣島南面嘅，係由一排三個峰砌成。因為遠睇似三支香一排，所以又叫做三支香（Sam Chi Heung）。青衣山喺古代地理有另一種意思，就係海上面嘅山，即係青衣島咁解。

青衣山佔個青衣島一大半，同島西北寮肚山隔個山拗。青衣山三個峰由北向南矮至高咁排，最高嘅南峰有334米。因為個山三面都係海，所以極之好景，可以晒到成個維多利亞港西半，亦都隔住四圍嘅海峽，望到成個荃灣新市鎮。

青衣山已經有鋪好嘅山路畀人行，所以係行山熱門路綫。不過為個山唔係諗住發展，所以亦都無車路上山。不過佢底下就穿咗長青隧道同南灣隧道。前面嗰條就響北峰底，而後面啲條就打斜穿個三個峰底。

青衣山唔發展，因為佢有特殊作用。青衣新市鎮發展集中晒響東北角，而西面同南面都有好多油庫，好多重工業。萬一有大災難，青衣山就好似屏風咁隔開兩邊。

北峰

青衣山（TSING I. PK.）喺青衣島（TSING I.）南面（1936年地圖）。

青衣山個北峰叫做大山尾（Tai Shan Mei），係三峰之中最矮，海拔261米。佢係原居民山地。只可以畀島上原居民葬響度。個山地多數響個山東北面高啲嘅地方。山峰東北低啲嘅地方有配水庫，上面重有波地。好近長青邨同長康邨，長青巴士總站有車路行上去。另外重有條山路，畀人由美景花園近青康路嗰邊行上去。

大山尾頂有個亭，亦都有三角測量站。呢度望東望東北睇晒青衣島、荃灣同葵涌市區。望西北見到寮肚山、馬灣海峽、同青馬大橋，望西就去到大嶼山同香港迪士尼樂園。

跟住山脊向南行就上到中峰。

中峰

中峰叫做大山頂（Tai Shan Teng），係三個峰之中次高，海拔310米，個樣似錐形。呢度有好多蝕到古靈精怪嘅大石。因為青衣島係飛機升降赤鱲角機場必經之路，所以民航處亦都響石之間導航證題示，上面叫呢度做六號山。

大山頂其實重可以喺香港專業教育學院青衣分校行山路上山。條山路可以到達中峰到北峰之間。山腰中間有條涌，重有人種田。後面陳氏山地就提示人上之路。

跟住山脊向南行就上到南峰。

南峰

南峰叫做南灣山，係三個峰之中最高嘅，海拔333米。由於青衣島以前名為春花落，所以青衣山最高峰曾經被命名為春花山（Chung Hue Peak）。山頂比較平，最高點有三角測量站。同中峰一樣，一樣有導航證警告飛機唔同飛咁近。民航署叫呢度做五號山。

南灣山南面山坡有難得一見嘅香港巴豆，呢隻巴豆自從上個世紀，喺薄扶林發現之後就無見過。後尾畀漁農處響呢度發現返，家下劃咗做具特殊科學價值地點，保護呢個品種。

喺南灣山山頂可以睇藍巴勒海峽同維多利亞海。響好天日子，呢度就好似畀羣山羣島抱住咁。九龍半島、昂船洲、香港島、交倚洲、坪洲、大嶼山、燈籠洲同馬灣。海面有百船響水上面。

佢東南山腳底係九號貨櫃碼頭，係葵青貨櫃碼頭一部份。其他部份全部響葵涌嗰邊。

向西南行有路落五層樓頂。

參考

• Geographic Section, General Staff (1936), Hong Kong and The New Territories, War Office