哥德式故仔

「陰森古堡」係哥德式故仔嘅常見故事舞台。

哥德式虛構故仔（英文：Gothic fiction），簡稱哥德式故仔，又有叫哥德式恐怖（Gothic horror），係源自18世紀嘅英文文學流派，特點包括興運用吸血鬼、狼人、神秘同超自然力量等嘅橋段。

概論

哥德式故仔俾人指係一種「結合恐怖、死亡同浪漫」嘅體裁。哥德式恐怖源自 18 世紀嘅英格蘭，受到當時盛行歐洲文壇嘅浪漫主義影響，鍾意講人對未知事物嘅恐懼，用 macabre 等嘅美學，仲會加入同當代社會相關嘅主題，例如貴族就係哥德式恐怖成日用到嘅橋段，而傳統上同歐洲貴族相關嘅城堡同哥德式建築等嘅嘢亦都自然跟住成為哥德式恐怖愛好嘅嘢。被指為哥德式恐怖嘅例子有 1764 年出嘅哥德小說《奧特蘭托堡》（The Castle of Otranto）、1818 年嘅《科學怪人》（Frankenstein）以及 1897 年嘅《德古拉》（Dracula）等等；就算到咗廿一世紀，有好多創作者都仲係會因為仰慕哥德嘅美學而寫哥德式恐怖作品，例如《惡魔城》（Castlevania）呢個電子遊戲系列當中嘅故仔－包括遊戲本身同相關嘅動漫作品－就俾人指係用咗哥德式恐怖嘅美學。

例子

• 《奧特蘭托堡》（The Castle of Otranto）
• 《科學怪人》（Frankenstein），情節講到主角弗蘭肯斯坦因為好奇而創造咗一隻恐怖嘅怪獸出嚟，隻怪獸有能力諗嘢，而且佢仇視弗蘭肯斯坦，打後仲直接間接噉殺咗弗蘭肯斯坦嘅幾個親人朋友。
• 《德古拉》（Dracula）
• 《化身博士》（The Strange Case of Dr. Jekyll and Mr. Hyde）