作曲

2013 年兩個人喺度作曲；佢哋一路試彈唔同嘅段落，諗到段啱心水嘅就搵紙筆寫低。

作曲（粵拼：zok3 kuk1 / 英文：composition）係指創造一首原創音樂嘅過程。搞作曲嘅人叫作曲家，歷史上出名嘅作曲家有貝多芬、莫札特同柴可夫斯基呀噉。喺最基本上，作曲家可以攞自己鍾意嘅樂曲，將啲樂曲入面嘅某啲片段剪出嚟再將剪咗出嚟嗰啲片段砌埋一齊做一首曲；不過喺現實應用上，作曲家都要用樂理上嘅知識嚟創造原創嘅作品，佢哋要能夠明白一首音樂可以有咩特性（音高、音階同節奏等），同埋係呢啲特性嘅唔同組合會令聽眾有啲乜嘢感受。

樂曲，有時就咁叫「曲」，係種音樂作品，主要指用樂器奏而唔係用聲唱嘅歌，或者係一首歌樂器聲嗰部份（除非首歌係無伴奏合唱）。

工序

睇埋：樂理

作曲嘅過程概念上可以分成幾個步驟，每個步驟都要用到樂理上嘅知識，但係唔識樂理都可以作曲。

• 設定首音樂嘅界限
• 砌主旋律（如果有主旋律）
• 和音化（如果唔係單音）
• 填詞（如果要有歌詞）

不過，呢啲步驟其實並冇一定嘅次序，例如好多聖詩其實係先有詩詞，後有旋律；粵語嘅歌講叶韻，詞同旋律亦同樣會互相影響。另外嘅有啲樂曲，首先決定嘅亦唔係旋律而係和弦進行甚至係質感；例如，有啲音樂首先作嘅會係頻現句（意大利文：ostinato），一層一層咁叠上去，好可能係叠咗幾層先會諗和弦進行。

喺現實中，好多步驟實際上係同步進行，尤其係喺發明咗 DAW 之後，有啲音樂人會直接喺 DAW 上面作曲（而唔係先寫樂譜），令到個過程更加容易係非線性。

設定首音樂嘅界限

作曲家好多時第一步就會設定一啲整體性嘅特性，例如音階（睇埋調號）、速度、拍號同埋「首音樂預咗係由邊種樂器嚟奏」（睇埋音色）呀噉​——​呢啲特性都係會影響成首曲或者成段樂章嘅；由前人做嘅樂理研究已經知道唔同音階唔同速度會造成唔同嘅效果，例如

• • C 大調嘅音階俾好多人認為係聽落開心或者最少係正面嘅（前人做嘅研究），所以如果作曲嘅人想作一首哀愁嘅樂曲嘅話，通常就唔會揀用 C 大調，而係比較傾向會揀用啲小調（按前人嘅研究結果做嘅決定）；
  • 除咗情緒之外，作曲嘅人仲需要諗埋首曲嘅用途，例如如果有首曲作嚟係想俾人攞嚟跳華爾滋嘅，首曲就理應要用三拍子（作曲家做嘅決定）​——​因為華爾滋音樂定義上實係三拍子嘅，而呢樣工作經已要求作曲家能夠理解拍號等嘅節奏概念；

砌主旋律

其中一種做法係攞住自己識彈嘅樂器嚟作首主旋律出嚟，用某種方法（例如紙同筆、錄音機等等）記低，一路嘗試諗串音符（睇樂句），再即場彈串音符出嚟，聽吓串音符令自己有乜嘢感覺（達唔達到自己想要嘅效果），通常第一次都係搵唔到啱心水嘅音符串，跟住佢就要再諗過，一路重複「諗→試彈」噉嘅過程，直至搵到一段啱心水嘅音符串；當中「諗音符串」嘅過程經已實會要求佢對自己寫嗰隻曲種有返咁上下熟，知隻曲種用開咩樣嘅音符串（可以睇埋樂想嘅概念），而且佢實要識睇樂譜先有可能做到呢樣嘢。

和音化

所謂和音化傳統上係指有咗旋律或者旋律嘅雛型之後，決定同佢同時出現嘅聲應該點擺（即係做和音），包括決定用乜嘢終止式等等。

不過，喺現實，呢個未必係獨立嘅工序，亦唔一定係指伴奏。例如，用對位法寫嘅曲亦同樣係做緊和音，但係個個聲部都係旋律。又例如，自從2010年代，電影音樂好多時只係質感，並冇所謂旋律同伴奏，但係寫嘅時候，到咗某個階段，仍然係要諗寫嘅嘢喺和音上合唔合理。

填詞

上述嗰啲工序係絕大多數音樂​——​包括器樂（指預咗齋靠樂器奏嘅樂曲）​——​都會用嘅；如果作緊嗰首音樂係歌（指作嚟預咗會有人聲唱嘅音樂），創作人仲要做埋填詞嘅工序；填詞都可以複雜得好交關​——​創作人做填詞嗰陣，要諗吓啲歌詞表唔表達到首歌要表達嘅嘢（例：歌好多時係用嚟表達故仔），而且仲要諗啲歌詞嘅每個音節同首曲嗰啲音符夾唔夾得埋；填詞呢家嘢專業到音樂創作上有陣時仲會將填詞人當係一個獨立嘅工作崗位噉嚟睇。

睇埋

• 幻想曲
• 即興音樂
• 聲設計
• 創意

書目

• 課程發展處藝術教育組 (2023年9月)。〈音樂科學與教常用英漢辭彙〉 (PDF) (英文、香港中文)。教育局。喺2024年7月22號搵到。

出面網頁

• How to Compose Music – artofcomposing.com.
• A Beginner's Guide to Composing – an online feature from Bloomingdale School of Music (February 2008)
• A Practical Guide to Musical Composition.