李靜 (乒乓球員)
想搵第二個意思嘅話，請睇李靜。| 李靜 | |
|---|---|
| 國籍 |  中國（香港） |
| 出生 | 1975年3月7號[1] 中華人民共和國廣東省佛山地區斗門縣 |
| 最高排名 | 第10位（2008年6月）[2] |
| 俱樂部 | 八一大商乒乓球俱樂部（2006） |
| 身高 | 1.65米（5呎5吋）[1] |
| 體重 | 56公斤 （123磅，112市斤）[1] |
李靜，MH（英文：Li Ching，1975年3月7號—），係一位香港退役嘅男子乒乓波選手。佢曾經夥拍高禮澤代表香港喺2004年夏季奧林匹克運動會嘅男子乒乓波雙打比賽攞到銀牌，直到最近都係做緊香港女子乒乓波代表隊嘅主教練，籍貫廣東斗門。
生平[編輯]
李靜細個嘅時候喺讀珠海市嘅斗門區實驗小學讀書，到1990年入咗中國嘅國家乒乓球隊。佢喺1992年嘅全國錦標賽攞咗男單嘅亞軍，跟住畀人揀咗入國家一隊。後嚟教練曾經根據李靜嘅身高，建議佢改打橫拍，令到佢成為全國唯一一位由直拍轉做打橫拍嘅選手。
自從轉打橫拍後，李靜嘅成績差咗，所以到1994年又改返做打直拍。喺1997年，李靜用自己嘅體能做理由嚟退出國家隊，到1999年，轉到去香港做香港乒乓波嘅選手。佢同另一位香港選手高禮澤做拍檔，組成雙打組合。佢哋之後喺2004年雅典奧運會為香港贏到有歷以嚟第二面奧運會獎牌－就係男雙嘅銀牌。佢哋兩位畀傳媒一齊叫做「乒乓孖寶」[3]。
喺2006年亞洲運動會，李靜同埋高禮澤喺男子乒乓波嘅雙打賽，先後打贏咗中國嘅王皓同埋馬龍，喺決賽仲打贏埋馬琳同陳玘，為香港攞到金牌。同時，李靜喺男單項目闖入四強，但係就喺中國隊嘅馬琳手下輸咗，喺冇得入決賽底下攞到銅牌。根據中國國家體育科研所嘅統計，李靜嘅腳步移動速度，喺全世界頂級嘅乒乓波運動員之中排第三。
喺2007年12月21日，李靜同高禮澤畀無線電視任命做2008年北京奧運嘅大使[4]。
喺2009年5月，李靜同高禮澤停做拍檔，派新人去打世界乒乓球錦標賽嘅雙打賽事。佢哋畀嘅原因是佢哋已經合作咗好多年，耐到對手已經好熟佢哋打波嘅方法，完全冇優勢。喺2011年以後，李靜開始撤退香港乒乓球隊主力嘅陣容，改為做教練嘅角色[5]。
喺2013年，李靜做宣佈退休嘅李惠芬嘅接班人，做咗香港女子乒乓波隊嘅主教練[6]。
喺2021年，李靜喺2020年東京奧運會以教練身份嚟帶蘇慧音、李皓晴、同杜凱琹攞到女子團體乒乓波嘅銅牌，成為香港史上第一位無論做運動員定係做教練身份，到成功攞到奧運獎牌嘅人。
佢由東京奧運返香港之後，佢正式宣布自己退下火線。
選舉經歷[編輯]
喺2021年9月，佢成為香港特别行政區選舉委員會體育、演藝、文化及出版界委員[7]。之後佢喺李家超無提政綱嘅情況下，有份提名李家超參與2022年香港行政長官選舉[8]。
榮譽[編輯]
睇埋[編輯]
攷[編輯]
- ↑ 1.0 1.1 1.2 〈2010年廣州亞運會官方網站 乒乓球 - 李靜 - 簡歷〉. 原先內容歸檔喺2010-11-17. 喺2010-12-26搵到.
- ↑ ITTF World ranking World ranking Record for LI Ching (HKG) 互聯網檔案館嘅歸檔，歸檔日期2016-03-06. （英文）
- ↑ 我的奧林匹克—李靜、高禮澤[失咗效嘅鏈]
- ↑ 陳靜怡 (2007-12-24). 〈靚麗劉璇成亞視奧運大使 將為香港解說體操〉. 《華奧星空》 (繁體中文). 人民網體育版. 原著喺2019-05-20歸檔. 喺2021-09-26搵到.
- ↑ 黃傑; 藺娟 (2012-02-22). 〈高禮澤、李靜淡出中國香港乒乓球隊〉 (繁體中文). 新華網. 原著喺2013-12-07歸檔. 喺2021-09-26搵到.
- ↑ 〈港隊歡送教練暨祝捷晚會〉. 原先內容歸檔喺2020-11-23. 喺2013-05-28搵到.
- ↑ 〈一文睇清1448名新選委全名單〉. 《香港文匯網》 (中文). 喺2022-08-11搵到.
- ↑ 〈一文看清李家超786張提名〉. 《信報網站 hkej.com》. 喺2022-09-02搵到.
