模擬訊號

模擬訊號mou4 ji5 seon3 hou6（英文：analog signal，當中 analog 可以粵化做粵拼：en1 naa1 lok4）係喺時域上數學形式係連續函數嘅訊號，同數碼訊號相對，訊號處理技術比較簡單，但就好易畀雜訊影響到。

概念

一個任天堂 Switch 嘅手掣；手掣上面有好多個掣同搖桿，等玩家用手指嘅活動俾輸入。

一個模擬訊號數值係連續（continuous）嘅，即係話搵是但兩個可能數值，嗰兩個數值之間都實會有一啲可能數值（小數點後嘅位理論上可以無限加）－即係同某啲物理量「相模擬」（analogous）。模擬訊號係相對於數碼訊號嘅做法。

舉個例說明，想像一部遊戲機嘅控制器：喺一個典型嘅廿一世紀初遊戲控制器上面，個控制器會有若干個掣同若干碌搖桿；個控制器會以某啲方式接駁住部遊戲機，係噉傳訊號去部機嗰度，話俾部機知玩家「撳咗邊個掣」；一個掣所傳嘅訊號係數碼訊號－一個掣傳嘅訊號得嗰兩可能數值，撳咗（1）同冇撳（0）；相比之下，一碌搖桿所傳嘅就係模擬訊號－是但攞碌搖桿嚟睇，設 $x$ 同 $y$ 做碌搖桿嘅坐標，理論上，$x$ 同 $y$ 嘅數值可以喺小數點後有幾多個位都得嘅，碌搖桿傳嘅電訊號「模擬」咗碌搖桿嘅位置。然後個遊戲程式就可以跟呢樣資訊嚟行事，例如（以下係簡化嘅虛擬碼）：

 if 玩家撳咗對應「跳」嗰個掣，
   玩家角色以 z 咁多嘅速度向上郁；
 玩家角色沿 X 軸嘅速度 += $x$
 玩家角色沿 Y 軸嘅速度 += $y$

同數碼訊號比起嚟，模擬訊號有好有唔好：原則上，一個模擬訊號有無限個可能數值（1, 1.001, 1.0001, 1.00001...），喺一個完美－冇雜音呢啲噉嘅撈絞嘢－嘅世界當中，一個個別嘅模擬訊號可以傳極大量嘅資訊，而一個個別數碼訊號因為可能數值有限，所以傳到嘅資訊量都有限；不過現實係唔完美嘅，一個訊號嘅物理數值實會因為干擾等嘅原因而走樣，所以一個模擬訊號基本上實係唔完全準嘅－呢點搞到模擬訊號唔能夠用於某啲（要求極高準確性嘅）醫療或者科研用途。

睇埋

• 數碼訊號
• 模擬電視