洛倫茲力

洛侖茲力嘅右手法則；$I$ 係電流，$B$ 係磁場，而 $\mathbf {F}$ 就係所產生嘅洛侖茲力。

洛倫茲力，英文：Lorenz force，係電磁學上嘅一種現象，係磁場對郁緊嘅帶電荷粒子所施加嘅一種力，方向上同磁場以及該粒子嘅郁動方向成垂直。

由於喺狹義相對論之下，電力同磁力其實係同一種力，即係所謂嘅電磁力，喺唔同參考系下嘅表現，洛倫茲力可以算係呢個理論下呢種統一嘅力嘅延伸，即係電力同磁力嘅合併。

概念

内文：電荷同磁場

設而家有粒帶電嘅粒子，佢喺磁場入便移動。佢受嘅洛倫茲力，物理學上嘅定義如下：

$\mathbf {F} =q(\mathbf {E} +\mathbf {v} \times \mathbf {B} )$

當中 $q$ 係該帶電粒子所帶嘅電荷，$\mathbf {v}$ 係佢嘅速度，而 $\mathbf {B}$ 則係喺嗰點嘅磁場。喺呢條式入面，出現叉積嘅符號，

$\mathbf {v} \times \mathbf {B}$

而呢段符號表示，產生嘅洛倫茲力喺方向上，同嗰粒粒子嘅速度以及磁場係成垂直嘅。

喺記法上，會用到所謂嘅洛倫茲力右手法則：將隻右手攤開，對正電荷而言，手指公指住嘅係電荷速度嘅方向，其餘四隻手指則指住磁場嘅方向，手板指住嘅，就會係洛倫茲力嘅方向。

應用

睇埋：電子工程

電流涉及電荷嘅流動。洛倫茲力相關嘅研究顯示，磁場會左右電流嘅方向，而噉亦表示，磁場有可能干擾電子架生嘅運作：諸如智能手機同電腦呢啲電子架生，都係靠住精密控制內部嘅電流嚟運作嘅，如果噉嘅架生周圍有個強嘅磁場喺度，架生內部嘅電流就有可能轉方向，流去一啲唔應該流去嘅地方，輕則干擾件架生運作，重則對件架生造成永久嘅損害。

亦可以睇下十九至二十世紀嘅科學家，係點樣確立原子論嘅：當時嘅科學家喺度做陰極射線嘅實驗，就利用咗洛倫茲力令電子束偏轉，從而量度電子嘅性質。

睇埋

• 電子