蓮香樓 (香港)
香港嘅蓮香樓（1927年8月10號—2022年8月8號）係蓮香樓茶樓嘅分號，喺香港島中環威靈頓街160-164號，鴨巴甸街交界，樓高兩層。
介紹
[編輯]香港蓮香樓位於威靈頓同鴨巴甸街交界。由開張至2019年3月前，一路由顏世滔家族打骰。雖舊式茶樓日漸式微，唯蓮香依然享負盛名，皆因其秉承昔日開舖宗旨不改。「舖面賣各式唐餅、樓上設茶居雅座」跟足舊時舖頭格局。開茶之時，事必奉上一隻膠兜過茶客洗杯。重有以焗盅飲茶之類老餅習俗真係三日三夜都唔講得曬。之不過，往日餐檯下底個痰罐認真係污糟邋遢，唔得乾淨而有人客詐型，孻尾冚嘭唥扐扯曬。
蓮香樓雖則話係茶樓，之舖內並無任何貴格茶葉，若果閣下想飲雨前龍井又抑或馬騮搣嘅話，侍應「權叔」實行麗你一眼然之後話「敝店僅供烏龍、普洱、香片、水仙、壽眉，唔飲請過主」。計正飲茶傳統，茶葉要用個「鐵嘜」秤過之後至擺落茶壼，咁樣沖出嚟嘅茶至唔濃又唔淡。唔同家陣啲侍應話之死，就咁成拃茶葉隊落個茶壼庶。
蓮香樓至出名係做月餅。舊陣時唔學得家陣咁餅家多過米舖個喎，月餅淨得茶樓有售，故此逢年八月十五舖面梗係墟撼到不得了。而蓮香出品禮餅亦係有口皆碑，當其時有錢人家一度豪擲千金訂購一百幾十擔嫁女餅，認真係架世堂。
開初蓮香有四層樓，層層價錢都唔同，而實情點心茶銘一式一樣。至貴係二樓，其次三樓，再其次係四樓，點解咁奇？事關當其時未曾有"LIP"，幾十歲人同你YANG樓梯梗係索氣喇，多數長者情願畀多幾個仙坐二樓，故此其後有「兩仙廳」「三仙廳」「四仙廳」與及「五仙廳」。幾仙廳個幾仙係講緊一盅茶嘅銀碼。（舊底茶金係斷一盅盅咁計）
舊陣時二世祖好興托住個雀籠去飲早茶，四樓就日日都有人打雀，真係旺過旺角。打雀個陣，兩家及到個雀籠實一實，雙眼直情曉發光咁，故此廣東話有句「打雀噉眼」就係咁嚟。茶居世藝除打雀外，聽歌仔亦都相當之得人歡喜。蓮香老世曾禮聘名伶徐柳仙（查實佢唱功麻麻）響樓面唱粵曲。當其時未曾有大聲公喇叭，挐大喉龍唱，山頂嘅朋友聽到一舊雲。有見及此，演唱之時會免費派發歌紙，茶客一路睇一路聽一路食，個情形認真頂癮。
2022年8月，蓮香樓捱唔過武肺疫情，兼夾欠薪80至100萬港紙，宣布摺埋。
菜式
[編輯]| 雞球大包 | 蓮蓉包 | 鮮竹魚肚扎 |
| 豬肚燒賣 | 豬膶燒賣 | 鵪鶉蛋燒賣 |
| 千層糕 | 馬拉糕 | 燒腩卷 |
| 腐皮夾 | 奶皇包 | 淮山滑雞扎 |
| 家鄉釀鯪魚 | 八寶鴨 | 霸王鴨 |
| 冬瓜盅 | 焗魚腸 | 京都肉排 |
| 西檸雞 | 蜆蚧鯪魚球 | 西米布甸 |
睇埋
[編輯]