邁達斯

呢幅十九世紀插圖，描繪想像中「邁達斯唔小心將自己個女變咗做一嚿金」嘅情境。

邁達斯（希臘文：Μίδας / Midas），又叫邁達斯國王，係古國佛里幾亞（位於細亞細亞，現處土耳其境內）嘅一位國王。希臘神話有好幾個故仔都係講佢嘅，當中邁達斯國王點石成金嘅故事就好出名，講到佢得到神力，能夠將掂到嘅嘢變做金，佢嘅呢種異能就係所謂嘅邁達斯之觸。

邁達斯相關嘅神話故事廣為人知。就算到咗廿一世紀，都仲係成日有創作人由邁達斯嘅故事嗰度攞靈感，創作電影以及遊戲等唔同媒體嘅作品。

神話故事

點石成金

呢座古羅馬雕像描繪想像中嘅西勒努斯。西勒努斯係一隻薩佗，同時亦係掌管醉酒嘅天神。

睇埋：迪安尼修斯

有一日，正如古羅馬詩人奧維德喺《變形記》第十一卷所講，迪安尼修斯（掌管酒、果園同豐收嘅天神，有陣時被視為奧林匹斯十二神之一）發現佢嘅老師兼養父西勒努斯失咗蹤。原來西勒努斯飲大咗，醉醺醺噉走嚟走去，畀一班佛里幾亞農民搵到，農民就將西勒努斯帶去見佢哋嘅國王邁達斯（又有版本話西勒努斯喺邁達斯個玫瑰花園度暈低咗）。邁達斯認得佢係邊個，就熱情款待佢，一路用咗十日十夜咁耐嘅時間殷勤招待佛里幾亞，而西勒努斯亦講故事同唱歌，娛樂邁達斯同埋佢啲朋友。到咗第十一日，邁達斯就將西勒努斯帶返去利底亞見迪安尼修斯。迪安尼修斯好滿意，於是就問邁達斯想要咩獎勵。邁達斯開口要求：

「我想要得到點石成金嘅能力，我掂到嘅嘢冚唪唥都變成黃金！」

迪安尼修斯應承咗邁達斯嘅請求。邁達斯得到新能力，急不及待噉想試。佢隨手摸吓一條橡樹嘅樹枝同埋一嚿石頭，兩樣嘢都即刻變成金。邁達斯非常開心，一返到屋企就去佢個玫瑰園，逐一噉去摸玫瑰園入便嘅玫瑰，將啲玫瑰全部變晒做金。不過，得意洋洋嘅邁達斯話咁快就開始後悔：邁達斯吩咐僕人上餐，但係佢發覺就連食物同飲品都係一掂到就變金，佢就開始驚。當中古羅馬詩人克勞狄安就噉講：

「國王邁達斯一開始發現自己掂到嘅嘢會變晒金，就好驕傲得意，但當佢見到自己嘅食物變硬，飲品變成『金色嘅冰』，佢就明白呢種天賦查實係個詛咒。」

喺美國小說家納撒尼爾·霍桑嘅 1852 年版本當中，邁達斯將花園入便啲玫瑰變晒做金之後，佢個女就好唔開心，話啲玫瑰冇晒香味又硬晒，而當邁達斯伸隻手去想安慰個女嘅時候，就一個唔小心將個女變咗做一大嚿金。

邁達斯又驚又後悔，就向迪安尼修斯祈禱，懇求天神破解呢個詛咒。迪安尼修斯聽到佢嘅禱告就答應咗，叫邁達斯走去帕托盧斯河（現時位於土耳其境內）嗰度沖洗，而任何佢放落河水度嘅嘢都會變返原形。邁達斯照做，而當佢掂到啲河水，佢嘅點金能力就流咗入河裡便，河沙都變成金。於是呢個神話故事就做咗一個起源神話，畀古人用嚟解釋點解帕托盧斯河嗰頭有咁多金同琥珀金，亦有用嚟解釋點解利底亞王朝（佢哋聲稱邁達斯係佢哋嘅祖先）咁有錢。

根據亞里士多德嗰個版本，傳說話邁達斯最後因為佢「祈禱無效」而餓死，點金嘅詛咒一直都解除唔到。

驢耳國王

十七世紀一位意大利畫家嘅油畫作品；幅畫描繪國王生咗對驢噉嘅耳仔。

睇埋：國王生咗對驢耳

邁達斯變到憎恨財富同奢華，於是就搬咗去鄉下，成為咗田野同薩佗之神阿潘嘅信徒。

有一次，阿潘好大膽，將自己嘅音樂攞嚟同太陽神阿波羅嘅比較（阿波羅除咗係太陽神，仲掌管埋音樂），然後佢竟然想挑戰阿波羅嚟場音樂比賽。山神特莫洛斯就被選為裁判。比賽開始，阿潘開始吹佢嘅牧笛，用佢嘅鄉土旋律，令到佢自己同埋佢嘅忠實追隨者邁達斯好滿意。然後輪到阿波羅表演，阿波羅彈起佢嘅七弦琴。特莫洛斯諗都唔諗就宣布贏嘅係阿波羅，而在場近乎所有人神都同意呢個決定——唯獨邁達斯表態反對，佢仲質疑判決係咪公正。阿波羅就大發雷霆：

「你嗰對係乜嘢耳仔嚟㗎？！」

結果阿波羅郁手變，邁達斯對耳仔就變咗做驢耳。邁達斯見到自己對耳仔噉嘅樣，就感到好羞恥。及後，邁達斯著起大頭巾或者頭飾嚟遮住佢對耳，但係後嚟畀幫佢剪頭髮嘅人知道咗佢個秘密。理髮師口風唔夠密，佢搵咗笪草地，喺地下掘咗個窿，將邁達斯件事細細聲對住個窿講，然後再將個窿冚埋返。冇幾耐之後，有一大堆怪草由呢個窿嗰個位度生咗出嚟，佢哋仲開始細細聲講個故事，話「邁達斯國王有對驢耳仔」。

有啲版本話，邁達斯覺得自己冇面目見人，所以就飲雄黃（一種好毒嘅物質）嚟自殺。

家世譜系

邁達斯阿爸係凡人國王戈爾迪亞斯（Gordias），而佢阿媽相傳係地母神希栢利（Cybele），亦有版本話佢係戈爾迪亞斯同希栢利領養（而非親生）嘅。有神話傳說話，邁達斯仲係個 BB 嗰陣時，啲螞蟻就將啲食物搬落佢個口，噉就預示佢將來實會發大財。古希臘詩人荷馬（Homer）喺《伊利亞德》入面亦有提過，話邁達斯有個仔叫利梯厄耳塞斯（Lityerses）。利梯厄耳塞斯大個咗，就強逼所有經過佢國家嘅人要同佢比賽收割穀物，輸咗嘅就處死，後尾希臘神話入便嘅大力英雄海格力斯經過佛里幾亞，就誅殺利梯厄耳塞斯。

後世影響

語文

喺歐美，邁達斯嘅故事好出名，甚至仲有影響現代嘅歐洲語言，例如响廿一世紀初嘅英文，就有一句常用短語叫 Midas touch，句嘢字面意思係邁達斯嘅觸摸噉解，通常係暗指一個人好成功。例句：

David	has	the Midas touch	.
大衛	有	邁達斯嘅觸摸

上述呢句語句，意思係話大衛事業或者生意好成功，賺到好多錢，彷彿就好似「無論係乜嘢，畀大衛掂到都會變成黃金」噉。

創作

除此之外，希臘神話嘅影響力遍及全世界。有唔少現代嘅虛構故事作品都有由邁達斯嘅故仔嗰度取材。

• 迪士尼動畫電影《阿拉丁與大盗之王》入便，有一件點金道具叫「邁達斯之手」。
• 日漫《機動戰士海盜高達 GHOST》當中有一架機體叫做「邁達斯」。
• 動作冒險遊戲《盜墓者羅拉》：呢隻遊戲其中一關就係叫做「邁達斯宮殿」，呢關講遊戲嘅主角羅拉去到一座神秘嘅古宮殿，宮殿內有一座具有神力嘅雕像，掂到佢對手嘅物件都會變成金，假如羅拉唔小心掂到佢嘅手，就會身體變成黃金死亡。
• 奇幻咭 game《魔法風雲會》入便有一張咭係建基於邁達斯國王嘅，張咭屬於取材自希臘神話嘅塞洛斯（Theros）環境，黑色，每當佢重置嗰陣就會將場上其他嘢「變成黃金」。

呀噉。

睇埋

• 哲人之石，一種傳說中嘅物質，相傳能夠令物件變成純金。

引咗

引用咗嘅學術文獻同網頁，亦有某啲詞彙嘅外語名：

參考

• 《世界神話辭典》，遼寧人民出版社，ISBN 7-205-00960-X
• 《神話辭典》，（蘇聯）M·H·鮑特文尼克等，統一書號：2017·304
• 《古希臘羅馬神話鑑賞辭典》，吉林出版社，ISBN 7-206-04846-3