香港回流潮

改拎
出自維基百科，自由嘅百科全書

香港回流潮，又叫做返港潮，係一啲香港居民移民咗去外國，作爲海外港人住咗一段時間，跟住之後又回流返咗香港住嘅人。

人口[編輯]

根據香港浸會大學喺2002年嘅一份研究，有份參與香港回流潮嘅人口，包含咗差唔多香港總人口嘅3%。[1] 呢個調查只係包括咗嗰啲自願認同自己做“回流者”嘅人，所以唔一定包含咗全部有外國國籍而又返咗香港嘅人。[2]

移民潮[編輯]

大部分嘅回流潮都係原本喺80同90年代，開始移民外國嘅香港人，唔少都係因爲對嚟緊嘅香港主權移交感到不安。根據曾經係勞工及福利局局長嘅張建宗，喺大約1997年嘅時候，有差唔多60萬位香港人移民離開香港。[3] 大部分都去咗西方國家，其中最受歡迎嘅係加拿大、澳洲、同美國。

一般嚟講有兩種移民：一種係打算喺外國住一陣，攞到國籍之後，跟住返香港住。第二種就係打算去咗外國就長期定居，唔會再返香港。嗰啲打算喺外國短期住一陣，跟住返香港嘅又叫 "sojourner"（意思係“寄居嘅人”）。當然，計劃唔一定完美，而唔少原本打算長住嘅返咗香港，而有啲打算短住嘅最終長期定居。

回流潮[編輯]

有統計表示喺80年代移民離開嘅香港人之中，有大約30%返咗香港。[4]

外國生活問題[編輯]

回流嘅原因有好多，但係主要都係因爲經濟原因。有啲人因爲卦住香港，唔能夠適應新嘅生活，而選擇返香港。亦有啲人因爲經濟狀況出現問題，發現喺外國好難揾食，被迫返香港住。例如，有啲比較有錢嘅香港人移民咗去加拿大，希望能夠從新建立佢哋嘅生意。但係發現兩地嘅經濟文化唔一樣，加拿大有高税率、規矩又有人覺得太過死板 (紅帶（英文：Red Tape）)、英文冇咁好嘅又會有語言障礙等等，所以唔少都因爲寧願喺香港做生意而回流。[5]

美國嘅情況都相似：因爲嗰度嘅治安比較嚴峻，而且生活同醫療嘅費用都非常昂貴，隨著美國經濟停滯，美國國家稅務局設立多咗法例嚟增加稅收，大幅度咁增加咗移民嘅生活壓力[6]。

香港生活穩定[編輯]

香港回歸之後，雖然香港政制改革停滯不前，不過香港社會嘅發展都相對穩定，仍然係一個安定繁榮嘅城市。呢樣嘢都吸引到唔少海外港人決定回流，返香港安居樂業。

除此之外，中國大陸廣東省（尤其係深圳市）亦都成為咗香港人移居嘅其中一處熱門地點。因為兩座城市互相接壤，方便香港人隨時嚟往，而且大陸嘅物價同樓價都同香港比較下相對平，所以吸引咗唔少香港人北上於中國大陸投資置產，並且移民到當地生活。不過喺2010年代開始，人民幣持續升值，港元嘅匯率歷史性咁俾人民幣超前，而且差距愈嚟愈大。加上中國大陸嘅貨物價格同樓市價格都大幅上漲，令喺大陸投資或者生活的機會，已經唔再吸引香港人，造成咗另外一種嘅香港回流潮[7]。

千禧年代開始，唔少海外港人嘅第二代（即係喺外國土生土長嘅子女）喺外國嘅大學畢業之後，選擇移民去香港發展事業。原因係佢哋覺得香港嘅就業環境較爲適合，有更加多發展嘅機會，同時亦都鍾意香港嘅生活好多姿多彩[8]。

當然，人唔係死板機器，所以如果喺香港住落有咩唔妥，回流嘅香港人仍然有再一次移民嘅選擇，尤其係嗰啲攞到外國國籍嘅人。[9]

統計[編輯]

根據澳洲統計局嘅人口普查結果顯示，喺由1994至到2005年之間，總共有33,905位香港人移民去澳洲，但係同時，回流嘅香港華僑澳洲公民就有34,248位，回流嘅人數比移民嘅人數多，變咗其實係負增長[10]。除此之外，由1990年代到依家，每年有大約3,000位喺香港出世嘅華裔澳洲公民選擇長期咁離開澳洲，回流返香港；呢個數據係非土生澳洲公民移民嘅排名之中第4位。[11][12]。

根據加拿大嘅相關統計部門嘅研究報告顯示，由1996至到2006年之間，加籍嘅華裔港人回流人數大約係44,710人，為數據排名之中嘅第一位[13]。

社會影響[編輯]

文化認同[編輯]

對於回流返香港嘅人，唔少都對佢哋嘅文化認同有啲疑惑。一來因爲香港本身經過咗管治國嘅轉變，二來就係佢哋曾經喺外國住過嘅時間，令有啲人唔肯定應該視自己為香港人、英國人、中國人、定係屬於曾經住過嘅外國國家嘅人？

太空人[編輯]

有唔少回流返香港嘅人係移民咗去外國嘅爸爸或者老公，主要因爲佢哋嘅屋企需要經濟上嘅幫助，而好多都因爲咁而返咗香港做野。佢哋會經常咁來往香港同外國，成日喺空中坐飛機，所以稱佢哋爲“太空人”。同時，“太空人”亦都係廣東話嘅文字游戲，因爲佢亦可以解為“太太唔喺身邊嘅人”。

睇埋[編輯]

出面網頁[編輯]

攷[編輯]

  1. ↑ Article "The First Five Years" 互聯網檔案館嘅歸檔，歸檔日期2012年2月7號，. at The Hong Kong Transition Project 互聯網檔案館嘅歸檔，歸檔日期2012年10月29號，.. Note: "Table 10 Cultural Identity".
  2. ↑ Chapter 9 'Return movements: back in Hong Kong'
  3. ↑ [1] [失咗效嘅鏈]
  4. ↑ Kee, P.K. and Ronald Skeldon. 1994. The migration and settlement of Hong Kong Chinese in Australia. In Reluctant exiles? Migration from Hong Kong and the new overseas Chinese. Edited by Ronald Skeldon. New York: ME. Sharpe and Hong Kong University Press.
  5. ↑ 回归十年加拿大香港移民掀回流潮[失咗效嘅鏈]
  6. ↑ 政策趋紧生活不易 美国华裔掀“回流潮” 互聯網檔案館嘅歸檔，歸檔日期2012-11-03.
  7. ↑ 深圳物價飆 港人出現回流潮
  8. ↑ 〈從移民潮到回流潮　香港移民歸去來兮〉. 原先內容歸檔喺2016-03-05. 喺2012-09-11搵到.
  9. ↑ Chapter 9 'Return movements: back in Hong Kong'
  10. ↑ 〈澳洲移民再掀回流潮 回归者男比女多〉. 原先內容歸檔喺2016-03-04. 喺2012-09-11搵到.
  11. ↑ "Fact Sheet 5 – Emigration from Australia". 原著喺2015-06-28歸檔. 喺2019-03-31搵到.
  12. ↑ 〈澳大利亚香港移民第二代回流潮未有减弱〉. 原先內容歸檔喺2015-06-22. 喺2012-09-11搵到.
  13. ↑ 〈香港移民：香港移民回流潮人数居冠〉. 原著喺2010-09-23歸檔. 喺2012-09-11搵到.
由「https://zh-yue.wikipedia.org/w/index.php?title=香港回流潮&oldid=2053814」收