海外港人

海外港人，又叫做香港僑民，係一啲自己或者祖先有香港居留權，但係因爲喺海外已經定居，長時間唔喺香港生活嘅人。佢哋通常被認爲屬於海外嘅華人社區嘅一部分。

由1960年代開始，香港移民潮出現咗幾次，香港有大批居民移民去外國。1984年《中英聯合聲明》簽署之後，同埋1989年八九民運之後，唔少人對香港未來有憂慮，選擇移民外國，移民潮再加劇，一路直到1990年代中期先至見到平息返。

香港人主要移民嘅目的地包括加拿大、美國、澳洲、紐西蘭等英文圈國家。香港人喺溫哥華、多倫多等嘅城市造成咗龐大嘅社區，喺當地嘅華人社群之中舉足輕重。海外港人有唔少都喺當地落地生根，活躍參與主流社會，更加有部份做埋當地嘅重要公職。