在港菲律賓人

在港菲律賓人係香港人口入面第二大嘅族群，人數有大約18萬人，佢哋多數以外籍家庭傭工嘅身份嚟到香港。

專業人士同居民

雖然從事家庭傭工嘅菲律賓人人數，往往遠超其他菲律賓人，但係喺香港嘅菲律賓人專業人士其實都相當多。有啲係建築師同土木工程師，喺香港嘅一啲較為突出嘅建築物和建築項目度做嘢。另外有一啲係信息技術嘅專業人士，亦有一啲係專業服務（會計、烹飪、牙科、設計、金融、法律、音樂、牧師等）。

喺被僱用嘅菲律賓家庭傭工中，有很大一部分喺菲律賓都有其他專業，即使那啲有大學學位嘅人，亦都因為有更好嘅經濟機會而喺香港工作，而佢哋係喺1949年第一批嚟到香港嘅專業界菲律賓人。有唔少菲律賓人喺中環商業區做服務業，亦都有喺香港迪士尼樂園做演藝人員或者其他演員。

香港東區嘅菲律賓居民人數最多，其中有3.24％嘅人口係有菲律賓血統（14,596人）。

語言

香港大多數嘅菲律賓人用英文同本地人溝通，而佢哋自己嘅朋友和社區就保持使用菲律賓話嚟溝通。佢哋之中有大多數人都係喺日常生活中用慣咗幾句廣東話短語，亦有少部分人完全識講廣東話。

在港菲律賓人同印度裔或者巴基斯坦裔嘅香港人唔一樣，佢哋嘅廣東話普遍都唔流暢，因為大部分嘅菲律賓工人都唔打算長期留喺香港。

商業

中環環球大廈嘅好多鋪頭都係由菲律賓人經營，包括賣電信、銀行服務、食品、同雜誌。

娛樂

每逢星期日，通常會有一大班菲律賓嘅女工人喺中環各地聚集，例如中環滙豐總行大廈嘅地下大堂、環球大廈、遮打花園、皇后像廣場等嘅地方。香港嘅好多女工人通常每個禮拜都休息一日（而且多數係星期日），佢哋會食自製嘅食物、唱歌、同埋買賣各種物品。

宗教

大多數香港嘅菲律賓人都係天主教徒，有一唔少數量嘅人喺新教教會和非教派教堂度聚集，亦都有少數係回教徒或者佛教徒。大部分嘅菲律賓人都會喺星期日上晝參加教會活動，而香港好多天主教教區亦會為菲律賓人提供以菲律賓話為主嘅活動。跟據香港羅馬天主教教區喺2011年嘅估計，香港有大約12萬菲律賓天主教徒，係非華裔教徒嘅大多數。

喺信奉基督教嘅人入面，除咗天主教信徒外，亦有好多菲律賓人係新教嘅信徒。過去30年嚟，菲律賓嘅福音派基督徒嘅人數急劇增長。

對香港音樂界嘅影響

菲律賓人被視為比較有音樂天份。喺20世紀初嘅上海，當時係世界各地樂手嘅聚集地之一，其中唔少都係嚟自菲律賓。隨著中國大陸戰亂，大量菲律賓嘅樂手由上海移居到香港，佢哋嘅演奏同埋編曲技藝甚高，喺呢兩個方面曾經係香港音樂界嘅主力，而香港音樂人黃霑（黃湛森）喺佢嘅博士論文度肯定咗菲律賓樂手對香港流行音樂發展嘅貢獻。

香港本地流行音樂成熟咗之後，樂壇仍然有唔少菲律賓裔或者有菲律賓血統嘅歌手、幕後製作人，包括：戴樂民、鮑比達、奧金寶、杜自持、盧東尼、杜麗莎、韋綺姍、露雲娜、杜德偉同杜德智兩兄弟、恭碩良、關智斌、 衛蘭同衛詩兩姊妹、王灝兒、鍾柔美等。

攷

• Mentioned in review "My Filipino one and only" Reese Deveaux The Standard, 18 September 2004