九龍寨城
| 九龍寨城 Kowloon Walled City | ||||
| ||||
| 首都或首府 | 未指定 | |||
| 常用語文 | 粵語 | |||
| 主要宗教 | 中國民間信仰 | |||
| 政體 | 無講 | |||
| 地位 | ||||
- .svg){kind=small} 大清廣東省廣州府新安縣轄境
|
（1644年－1899年） | |||
- .svg){kind=small} 日佔香港
|
（1941年－1945年） | |||
| - 無政府狀態，主權爭議： | （1899年－1941年；1945年－1994年） | |||
| 歷史 | ||||
| - 清朝擴建九龍寨城 | 1847年 | |||
| - 展拓香港界址專條 | 1898年6月9日 | |||
| - 英軍驅趕清朝官員軍隊 | 1899年 | |||
| - 日佔時期 | 1941年12月－ 1945年8月 | |||
| - 中英達成清拆協議 | 1987年 | |||
| - 香港政府接管 | 1994年 | |||
| 人口 | ||||
| - 1898年估計 | 約700人[1] | |||
| - 1940年代估計 | 約2,000人 | |||
| - 1950年代估計 | 約5,000人 | |||
| - 1973年估計 | 約10,000人 | |||
| - 1987年估計 | 約33,000人 | |||
| 通貨 | 港元 日本軍用手票（1941－1945年） | |||
| 而家屬於 |  香港九龍城
| |||
.svg){kind=small}
九龍寨城（粵拼：gau2 lung4 zaai6 sing4）係香港九龍城區入面一座圍城，喺1993年拆咗。九龍寨城又被人叫做九龍城寨（gau2 lung4 sing4 zaai6），亦有人寫做九龍城砦（「砦」通「寨」），因為舊時九龍城寨嘅城池只係用石頭起出嚟，所以以前啲人鍾意叫呢度做城砦，即九龍城砦。喺香港史上，呢個地方曾經係一個引起好多政治爭論嘅敏感地方，又曾經係一個出名「三不管」嘅神秘地帶。喺1987年香港政府宣佈清拆城寨，引起社會關注，最後落實分三期進行清拆，而家九龍城寨已經變咗做一個公園，叫做九龍寨城公園。
九龍城寨喺九龍灣中心，由鯉魚門南行嘅船都一定會經過，而且重係沿海重要嘅戰略地點，不過喺20世紀二三十年代因為填海起啟德機場，九龍灣就唔再係海港。
清拆前嘅九龍城寨其實並唔係 ｢三不管｣ 狀態，而係一笪有郵差、警察巡邏同政府供電嘅地方[2]:33:57。
地理
[編輯]九龍寨城原本面積達70畝地（約47,000平方米）[3]，而佢東南部本來係九龍灣西北海岸，即係今日太子道東一帶。但其後起啟德機場令佢變成一個內陸地區。香港日治時期，城寨嘅城牆俾日軍拆嗮，周邊一帶後嚟都被劃入英屬香港嘅九龍城發展區，寨城範圍進一步收窄到賈炳達道以北，得返衙門一帶約莫2畝半咁多地方，當地居民後期起樓都限住喺呢個範圍入面起。
名
[編輯]九龍城寨原名叫九龍寨城，後來由於香港政府喺劃分區域時，將九龍寨城周圍嘅地方都全部叫咗做「九龍城」，後來為咗唔想混淆，於是就將九龍寨城改為九龍城寨，等佢可以同「九龍城」分返開。
史
[編輯]城寨來由
[編輯]九龍城寨歷史最早可以追溯到宋朝，原本係防衞海盜嘅據點，為咗防止海盜，喺1810年就起咗座九龍寨炮台[4]。去到清初康熙年間，為咗方便防守同官衙做嘢，就開始起城池，而九龍城寨就因為咁喺1846年起咗出嚟[5]。而喺經歷過鴉片戰爭之後，九龍城寨嘅戰略地位就變得更加重要。起寨城經過好多波折，中間打風打到城毁。
變成鬼城
[編輯]到咗1898年，英國希望租借深圳河以南同離島所有島嶼，於是要求簽署《中英展拓香港界址專條》，將呢一帶同九龍半島同香港島一樣變成英國殖民地。但大清國方面堅持唔畀九龍寨城列入租地範圍，結果就令九龍城寨具有大清國對香港宣示主權嘅呢個獨特地位。城寨變成清朝官員做嘢嘅地方，即係有啲似領事館咁。
不過由於城寨地方細，所以駐喺城寨衙門入面嘅清朝官員幾乎都係啲唔話得事嘅細官，官細之餘重無軍隊，得幾個捕快，於是喺1899年，英國曾經想將城寨接管，於是派咗啲英軍入去，入面啲官立即嚇到走夾唔抖。結果城寨成為英屬香港境內一座無政府狀態嘅圍城。
但係喺1900年7月17號，李鴻章路經香港，同當時嘅港督卜力見面，提醒返九龍城寨重係大清嘅領土，唔好亂嚟，自此之後港英政府就無再搵人入城寨[6]。
由於港英政府唔可以搞，結果當時城寨一直保留住由清朝到辛亥革命後嘅狀態，令九龍城寨成為當時好多外國人走去「感受舊中國」嘅旅遊點。
1941年12月至1945年8月期間城寨同埋香港全境都俾日軍佔領。戰後由於香港政府、英國政府同埋中華民國、中共政府都唔理或者理唔到，城寨逐漸成為罪惡溫床。
清拆
[編輯]1980年代，中英兩國處理香港前途問題，亦順手處理埋城寨問題。1987年港府宣佈清拆城寨，引起社會關注，最後落實分三期進行清拆[7][8]。「九龍寨城」拆嗮之後，喺1995年改建成而家嘅九龍寨城公園，而原有嘅九龍巡檢司衙門就保留做法定古蹟畀市民參觀。
舊底啲建築
[編輯]
龍津義學
[編輯]龍津義學係喺九龍城寨入面最古老同最出名嘅建築，佢同九龍城寨同一時期完成，即係喺清道光廿七年（1847年）起好。佢起得好似以前啲「貢院」咁，喺門前面有條走廊仔，兩邊有大條石柱，門下面有石刻，刻住由當時新安縣知事王銘鼎寫嘅「龍津義學」四個字，門口兩邊重有門聯，寫住：「其猶龍乎，卜他年鯉化蛟騰，盡洗蠻煙蛋雨；是知津也！愿從此源尋流溯，平分蘇海韓潮。」而義學大樓入面分三個部份，叫做「三進」，分別係：前面叫「前進左壁」、中間係空地，後面叫「後進講堂」。
呢間義學，喺當時重做埋鄉公所，所有九龍司嘅事務，都係喺呢度傾，而喺民國之後重俾一啲九龍城嘅人改建成小學，叫做「九龍城公立高初兩等義學」，據講重係香港第一間學校。
1940年由於城牆冧咗，香港政府於是以衛生理由清拆城寨房屋，當時只有「廣蔭院」同「龍津義學」無拆到，到咗七十年代，開始有地產商喺城寨發展，龍津義學因為咁而改建成「義學大樓」。
龍津石橋
[編輯]龍津石橋其實即係舊底龍津埗頭（九龍城碼頭），當清政府割讓九龍畀英國時，除咗保留九龍城寨，亦保留咗一座碼頭畀九龍城寨居民出入使用，到1930年因為要填海起啟德機場，碼頭被清拆。由於碼頭起喺龍津路，個碼頭又用石做，而且起到好似條橋咁，所以啲人就將個碼頭叫做「龍津石橋」。
喺1867年到1871年期間香港曾經開放賭博，公開招標畀人開賭場，不過到咗1872年又再禁賭，於是好多做開賭場嘅人就將啲賭場搬晒入九龍城寨，由於有個碼頭，於是九龍城寨嘅賭場就成日都有好多外國人入去，而且重係當時遠近知名嘅旅遊景點。
天后廟
[編輯]九龍城寨入面嘅天后廟喺係天后廟街，當然天后廟街因為天后廟而命名，大約就喺老人街南面桂盛樓附近。天后廟其實係三十年代先起，不過入面供奉嘅天后神像，就比九龍城寨重要古老。初初起九龍城寨時，其實有座關帝廟，因為關帝廟係清朝法定建築，所以一定要起，用嚟畀啲武官拜。不過喺三十年代初，關帝廟因為日久失修而倒塌，令九龍城寨入面無晒廟宇，但啱啱出面沙浦村因為政府要填海發展而要清拆，就係咁原本喺沙浦村嘅天后廟就搬咗入去九龍城寨。
不過後期城寨越住越多人，天后廟由於四周圍都畀大廈圍住，而住喺大廈嘅人又鐘意掟垃圾出街，結果搞到間天后廟周圍都係垃圾，後來喺天后廟頂起咗個網，垃圾問題先解決。
原有嘅街道
[編輯]九龍城寨雖然只係得六英畝半面積，但係就有成二三十條街，可算係世界上同面積最多街巷嘅細城。城寨主要街道分南北同東西兩邊行嘅大街大路，係呢兩條大街大路再分好多支線出嚟。
南至北大路
[編輯]龍津路
[編輯]龍津路（Lung Chung Road）分別有六條街：龍津後街、龍津一巷、龍津二巷、龍津三巷、龍津尾巷、龍津橫巷。喺廣東省有好多城市都有龍津路，所有龍津路都有一個特點，就係佢一定對住城門口嘅津樑，因為龍津意思係「聚龍通津」，即係指城門同城門津樑。以前喺九龍城寨真係有一個津樑，重係由風水佬睇過度過定，搵最正個龍氣位而定出嚟。龍津路亦係九龍城寨入面，最古老嘅街道。
龍津道
[編輯]龍津道係寨城城牆拆咗之後，城入面嘅居民喺原來城基兩邊起屋，屋同屋同中間就變咗條路，就係龍津道。佢喺1951年形成，以前最盛行跳脫衣舞、開賭、販毒都喺晒呢度，經營呢啲嘢嘅人希望呢條路聚龍通津，所以就叫呢度做龍津道。
東至西大路
[編輯]龍城路
[編輯]龍城路（Lung Shing Road）係同九龍城寨界外嘅東正道平行嘅一條路，佢北面路口就係喺正東頭村道南邊嘅行人道度，而南面入口係好隱蔽，因為佢啱啱係龍津道同龍津路之間，又夾住益華樓同東南樓，喺正個三叉口，如果係城寨出面望入去，龍城路就啱啱畀龍津路同龍津道隔住，城寨嘅人就將呢條路叫做龍城路，作為九龍城寨嘅代表，龍城就即係九龍城寨簡稱。
光明街
[編輯]光明街以前兩邊都係石屋同寮屋，由於呢度好多賣白粉（海洛英）嘅檔攤，呢啲檔攤都點好多蠟燭，畀啲道友追龍，所以成條街點晒啲蠟燭，啲人就叫呢條街做光明街，不過啲白粉道友就叫呢度做「電台」，因為啲道友叫食白粉做「上電」，所以啲白粉檔就叫做「電台」。
不過後期呢條街已經無晒啲白粉檔，改為做食品生產，其中最大有幾間造魚蛋嘅工場，另外重有啲做豬紅、砵仔糕、燒豬同燒鴨嘅工場。
老人街
[編輯]老人街（Lo Yan Street）同光明街都係喺龍津道112號同114號之間，條街大概喺五十年代初形成，20年代有基督教團體喺嗰度起咗間老人院，之後啲人圍住間老人院起好多村屋，所以啲人叫呢條街做老人街，不過後期間老人院改咗做青少年活動中心。
由於老人院係由衙門改建，所以老人街有好多古蹟，其中有兩尊嘉慶七年嘅古炮最有代表性，老人院建築風格亦可以睇到有衙門嘅特色。以前呢條老人街亦係城寨入面唯一見到太陽嘅地方。間老人院係1987年政府清拆城寨時唯一保留嘅建築，重列咗做法定古蹟，即係九龍巡檢司衙門[9]。
大井街
[編輯]大井街（Tai Chang Street）算係城寨入面其中一條最老嘅街，未有城寨就已經有呢條街。大井街因為有一個大井，所以叫大井街，而呢個井喺舊時係成個城寨最主要嘅食水來源。不過到咗二三十年代，因為霍亂，而井又係最多霍亂菌嘅地方，全香港好多井都要封，不過大井街個井就去到五十年代先封，之後開始就改晒水喉供水。
西城路
[編輯]西城路，英文路牌係 West City Road，係城寨入面唯一一個路牌唔係用音譯做英文。顧名思義西城路之所以叫西城，係因為呢度係城寨最西嘅地方。呢度有好多潛建寮屋，好多人去到九龍城寨，第一樣嘢就係見到呢堆建築。
相
[編輯]-
九龍寨城公園南門懷古 -
「南門」及「九龍寨城」石額 -
江南園林典型曲廊 -
廣蔭庭「五福壽鶴圖」
睇埋
[編輯]參考
[編輯]- ↑ John Carney (2013-03-16). "Kowloon Walled City: Life in the City of Darkness". South China Morning Post. 原著喺2021-01-12歸檔. 喺2018-10-29搵到.
- ↑ 劉細良 (2017年3月4號)。《城寨文化符號學 - 04/03/17 「三不館」 長版本》。喺2023年1月7號搵到。
- ↑ 〈香港電台-鏗鏘集-城寨何存〉。原著喺2020年8月6號歸檔。喺2020年7月25號搵到。
- ↑ 〈九龍寨炮台〉。原著喺2008年1月31號歸檔。喺2008年1月22號搵到。
- ↑ 〈香港的道德公廁——"豬籠城寨"〉。原著喺2008年3月14號歸檔。喺2008年1月22號搵到。
- ↑ 〈「九龍寨城」的建立〉 (PDF)。原先內容歸檔 (PDF)喺2006年2月9號。喺2008年1月22號搵到。
- ↑ re/report 8/index.htm 九龍寨城清拆事宜
- ↑ 浮城上的寨城（互聯網檔案館嘅歸檔，歸檔日期2005年2月11號，.）
- ↑ 九龍巡檢司衙門 互聯網檔案館嘅歸檔，歸檔日期2008年1月31號，.康樂及文化事務署
書
[編輯]- 九龍城寨史話 三聯書店（香港）出版 ISBN 962-04-0682-6
- 《九龍城寨》 作者：余兒
連出去
[編輯]
- 康樂及文化事務署 - 九龍寨城公園 - 歷史/背景
- 「東洋の魔窟」九龍城砦探検記（日文）
- 九龍寨城史話PPT file
- 香港‧解密百年 - 九龍城寨Youtube影片，ATV 節目
- 啟德掘出疑似清朝石橋
- 日人情意結 複製九龍城寨25元有得睇