八達通

八達通（Octopus）係香港通用電子找數系統。八達通咭裏頭攝住原子晶片，增值後放響八達通機上高即可找數，堪稱「易過借火」。1997年 9月1號八達通啟用，起初淨係巴士、地下鐵路等公共交通工具至用得，其後發展至各行各業，即如百貨公司、食肆、停車場之類，及後甚至愛嚟做學校、寫字樓與及住宅大廈通行咭。初頭要用增值機增值，後經改良連鋪頭收銀機都得，而家用信用咭、銀行戶口自動過數、八達通App裏面嘅「八達通銀包」增值亦冇問題。

八達通係世界至早電子貨幣之一，其普及程度亦係首屈一指。統計數字顯示，截至2005年有1240萬張八達通用緊，而每日就錄得超過900萬次嘟咭紀錄。八達通公司藉此佳績享譽國際，後嚟重幫荷蘭同中國長沙興建當地電子過數系統。有消息指，八達通有意同深圳地鐵咭通用。

2021年，八達通做咗香港政府嘅消費券計劃嘅其中一個指定儲值支付工具。

歷史

香港地鐵公司1979年嗰時經已校好晒自動過數系統，當其時嘅車飛係一張磁力咭，分為單程飛同多程飛，後來多程飛被儲值飛取代。九廣鐵路則於1984年改用同類車飛，重嗌佢做通用儲值票。而去到1989年，通用儲值票經已應用到九巴、城巴，甚至乎公共交通之外嘅行業添，譬如快餐店同自助影相之類。

地鐵公司響1993年宣佈將會改用一種可以隔空感應過數嘅車飛。為咗令到多啲市民受落，地鐵公司同九廣鐵路公司、摟埋城巴、九巴同油蔴地小輪於1994年成立聯俊達有限公司（2002年1月改名做八達通卡有限公司）。之不過當其時港島公共交通龍頭大佬中巴就唔肯參與。

歷經三年試用，八達通卒之響1997年9月1號正式啟用，其後短短3個月就賣出超過300萬張八達通。八達通起初淨係可以愛嚟搭聯俊達旗下五間公司嘅車，之但係到咗1999年，八達通開始應用於其他行業，同年推出自動增值服務及八達通手錶。2000年，金管局派發牌照畀各大商舖，廢除八達通非交通類業務不得多過15%嘅不平等條例。2001年1月，啱啱宣佈放棄經營渡輪事業嘅油麻地小輪簽署新股東同意書，同意將股份讓畀新世界第一巴士同埋新世界第一渡輪。同年八達通公司消滅赤字，開始賺錢。

2003年6月29號，香港政府決定將全港18,000個泊車位改用八達通咪錶。呢次大換血行動響2004年11月21號搞掂。與此同時，好多政府公共設施都開始改用八達通找數。2003年11月，八達通公司同荷蘭簽署一張1.2億歐羅嘅合約，幫荷蘭搞隔空嘟咭找數系統，一統荷蘭七國咁亂（NS、RET、GVB及HTM）嘅公共交通。

2005年11月，推出「八達通日日賞」優惠計劃。申請此計劃之人士，響指定商舖（包括惠康、UA院線同麥當勞等）買嘢，無論用任何方式（八達通、現金抑或信用咭）找數，即可幫八達通咭積分，儲夠積分可換購禮品。

種類

八達通可以分為「租用版」同「銷售版」呢兩種。

「租用版」八達通喺港鐵車站同機場都有賣，買𠴱時要俾HK$50的按金，同預付$20-$100既飛值。

「銷售版」就有好多種款式：小童八達通錶、成人迷你八達通、長者迷你八達通。

常規八達通：小童八達通、成人八達通同長者八達通。

個人八達通：普通個人八達通、學生身份八達通、殘疾人士身份八達通同樂悠咭。

銷售版八達通：旅客八達通、嶺南通聯名卡同互通行。

其它用途

警方用八達通可以查到卡主去過邊，有幫助破案，例如徐步高案。

出面網頁