天文學
(由天文跳轉過嚟)
跳去導覽
跳去搵嘢
「天文」跳轉到呢度。要睇日本年號，請去【天文 (年號)】。
用來睇天文現象嘅天文望遠鏡
天文學係一門專研究天體同宇宙嘅自然科學。天文學運用數學、物理同化學來解釋宇宙入面唔同嘅天體，包括恆星、行星、衞星、彗星、星系等等，同埋其他各種現象，譬如日食、行星順行同逆行、超新星爆炸、伽瑪射線暴、宇宙微波背景輻射等等。可以噉講，任何源於地球大氣層以外嘅自然現象都屬於天文學嘅研究範圍。
人類好早就出於唔同原因開始研究並記錄各種天象，因為天文學嘅發展，既有實際意義，譬如利用恆星導航、利用太陽同月光嘅週期變化來確定曆法同節氣，亦可以幫助迷信嘅人理解罕見天文現象。而喺歐洲文藝復興開始之後，天文學研究促進咗科學發展，尤其是數學同物理。一啲至出名嘅物理學家同數學家，哥白尼、伽利略、牛頓、歐拉、愛因斯坦、霍金等等，佢哋好多研究成果，都係為咗解答天文學上嘅問題。
到20世紀中期，人類技術高度發展，有足夠嘅能力去探索地球大氣層以外嘅世界。蘇聯首先實現載人太空任務。美國太空人首先登陸月球，係人類第一次踏足地球之外嘅天體。研究太空航行技術，推動咗好多第啲唔拉更嘅科技進步，譬如衛星電視、全球定位系統、高溫陶瓷、高度防水材料、太空育種等等，都令地球表面居民嘅生活質素提升。
對於一般天文愛好者來講，天文除咗係一門科學，亦可以係一種休閒嗜好。好多業餘天文愛好者鍾意觀星、天體攝影、發現小行星、月面反射通訊等等活動。天文學上嘅物理現象、外星人猜想等等，亦係文學、影視、音樂、藝術常見嘅題材。
睇埋[編輯]
出面網頁[編輯]
 |
維基同享有多媒體嘅嘢： 天文學 |
