武漢肺炎俄羅斯疫情

出自維基百科,自由嘅百科全書
跳去導覽 跳去搵嘢
俄羅斯確診嘅病例分佈區域圖     100000到999999單確診個案     10000到99999單確診個案     1000到9999單確診個案     100到999單確診個案

武漢肺炎俄羅斯疫情,係介紹2020年「武漢肺炎」喺俄羅斯嘅爆發情形。5月份以嚟,確診病例以每日一萬人嘅速度飆升,醫療資源嘅情況嚴謹[1]。截至11月25號(當地時間)俄羅斯衛生部等嘅數據,確診個案累計達到咗2,162,503單,死咗37,538個人。而當地官方公布嘅整體死亡數字,明顯低過其他國家。莫斯科市政府發出咗警告,話市內每五名市民中可能就有一人受到感染[2]

時序[編輯]

2020年1月22號喺聖彼德堡普爾科沃機場,一由上海搭航機到埠嘅俄羅斯旅客,有發現疑似病症,需要入院[3]。1月31號公佈確診嘅頭兩單病例,患者都係中國大陸公民[4]

2月23號,八個由鑽石公主號撤返嚟嘅俄籍遊客,畀轉送到喀山隔離治理,包括咗三個確診個案[5],當作係國際個案、未有直接計入病例總數度。呢批接受隔離嘅國民,包括康復嘅3個人,係到咗3月8號先至解除咗隔離觀察[6]

2月28號經病毒測試,一去過伊朗嘅俄羅斯人,喺阿塞拜疆畀確認感染咗病毒。跟著幾日過後,俄羅斯衛生部再宣佈有兩個喺阿拉伯嘅俄羅斯人,受到咗感染。

3月1號時塞凡堡克里米亞爭議地區)有一女子未接受病毒測試,就喺醫院度走咗佬而畀通緝,據報佢走到去咗頓河畔羅斯托夫[7]

到3月2號莫斯科度確診中第一個病例[8][9],確診嘅後生仔係2月21號喺意大利度假陣開始唔舒服,跟著23號返到俄羅斯,就留喺莫斯科州嘅屋企度[8]。2月27號去診所睇醫生陣,有明顯嘅病症,跟著就轉送莫斯科入院[8]。據報呢名病患喺3月6號經已康復[10]

應對[編輯]

俄羅斯為咗避免肺炎傳播,由1月30號就開始關閉同中國大陸接壤嘅邊境,仲停埋同中國大陸人士核發電子簽證。俄羅斯外交部同時建議啲俄羅斯人避免去中國大陸,仲請旅居中國嘅俄羅斯人同俄大使館保持聯繫[11]。俄羅斯除咗關閉同中國大陸、蒙古之間嘅邊境外,仲全面停駛咗所有來往中國、北韓之間嘅火車,國營航空公司「俄羅斯航空」亦大幅縮減往來中國、香港嘅航班,俄羅斯其他主要嘅航空公司就早喺1月31號開始,暫停往返中國嘅航班[12]

1月份新任命嘅總理米舒斯京(Mikhail Mishustin)就喺2月18號簽署咗一項法令,由2月20號開始禁止中國公民,包括香港同澳門居民入境俄羅斯[13][12]。而據報由2月19號開始,莫斯科地鐵,公共交通系統都接到咗命令,要專登檢查中國人。官方仲特別印製咗中俄雙語表格,畀嗰啲畀拉嘅中國人填寫,內容包括咗住址、抵達俄羅斯嘅時間、ID冧巴、聯繫電話等。當局仲用埋人面識別技術,篩查疑似入境俄羅斯而未接受14日強制隔離嘅人士,據指當局喺莫斯科嘅巴士、地鐵同電車等公共交通工具度篩查中國公民[14][15]

莫斯科嘅差人就同時間收柯打去搜啲逗留嘅中國人,四圍掃蕩啲旅店、宿舍、公寓大樓仲有商家,喺街度同第啲公共場所攔查中國人證件,據話差人會影埋啲中國人嘅大頭像。如果差人話證件有問題,或者見冇證件,啲中國人就會被帶返差館,跟著可能人會強行帶去隔離中心,仲可能面臨第啲嘅處罰[16]。喺離莫斯科1800公里外嘅葉卡捷琳堡市,當地嘅中國人社區都受到咗嚴密監控,巡邏人員同啲中國人派口罩,仲有派要求去醫院檢查嘅單張[14]。此外當局仲強制咗由中國返俄羅斯嘅14,000有多嘅人接受隔離觀察。

莫斯科市自2月開始,要求有輕症、同確診者有過密切接觸或由爆發疫情國家返嚟嘅人,都要強制居家隔離14日,違者最高可面臨5年嘅監禁,外國人士就會被驅逐出境。市長索比亞寧(Sergei Sobyanin)喺2月份嘅網誌度話,當局會用自動人面識別系統,監察隔離人士係咪有遵守規定,仲講到有過確診嘅中國女性嘅室友原本應該強制隔離,但被監控到佢試過偷偷地落街。而莫斯科警方就話,已利用過呢啲技術扣查咗成200人係違反咗隔離令[17]

重啟經濟[編輯]

5月11號普京宣布,自12號開始部分解除因疫情而實施嘅封鎖措施,結束持續咗6個禮拜嘅「停工期」。據普京表示,放寬措施將覆蓋所有嘅經濟領域,最先重啟嘅行業包括建築業同農業等。普京又話,部分地區仍會維持較嚴格嘅管控,禁止舉辦大型公共活動,國民仍須遵守嚴格衞生要求[18]

科研[編輯]

俄羅斯衛生部2月後期發佈咗一份官方報告,認為由臨床訊息睇,預防同治理呢種傳染病嘅方法係相當有限,而呢個病嘅最明顯症狀係急性呼吸窘迫症候群。報告話個病毒係屬於RNA嘅單鏈病毒,歸類係β-CoV,同沙士MERS係同一家族。而報告又話遺傳序列同沙士有成七成相似,認為「可能係蝙蝠冠狀病毒,同未知病毒重組而成嘅,唔係自然演化嘅病毒[19]

俄羅斯嘅國家病毒學與生物科技研究中心(State Research Center of Virology and Biotechnology)負責人伊瑪迪諾夫(Ilnaz Imatdinov),喺3月16號接受新西伯利亞新聞(Vesti Novosibirsk)電視台訪問陣話,中心嘅科學家研發咗一啲數武漢肺炎病毒原型疫苗,開始咗實驗室動物試驗,預定會喺6月公布效果最好嘅疫苗[20]

醫護離奇死亡[編輯]

俄羅斯喺4到5月間,接連傳出3起醫師墜樓事件,兩人死亡一人重傷,而其中兩個醫師生前都同醫院方面有所分歧,批評過醫院入邊為醫護提供嘅防護資源唔足夠。由於啲墜樓事件疑點重重,疫情當中嘅前線醫護權益就喺媒體同社群網站度引發咗關注,俄羅斯嘅執法部門因而都介入咗去調查[1]

圖集[編輯]

[編輯]

  1. 1.0 1.1 新冠肺炎黑幕》俄羅斯2周內3位醫師離奇墜樓,確診仍被強迫值班! 劉俞妗 + 追蹤 2020-05-05
  2. 【武漢肺炎】俄羅斯單日新增確診破萬宗 再創新高 立場新聞 2020-05-03
  3. "В Петербурге из-за подозрения на коронавирус госпитализировали россиянина" (俄文). 2020-01-22. 原著喺2020-01-23歸檔. 喺2020-01-22搵到. Unknown parameter |dead-url= ignored (help)
  4. "俄羅斯首度確診新型冠狀病毒肺炎個案 - RTHK". news.rthk.hk (中文). 原著喺2020-01-31歸檔. 喺2020-01-31搵到. Unknown parameter |dead-url= ignored (help)
  5. "У троих россиян с лайнера Diamond Princess подтвердился коронавирус". TASS. 26 February 2020.
  6. "All quarantined Russians from Diamond Princess cruise ship discharged from hospital". TASS. 8 March 2020. 喺8 March 2020搵到.
  7. "Woman in Crimea escaped from hospital before checking for coronavirus".
  8. 8.0 8.1 8.2 "У приехавшего из Италии россиянина обнаружили коронавирус". Interfax.ru.
  9. 引用錯誤 無效嘅<ref>標籤; 無文字提供於名為rusmar2嘅參照
  10. 引用錯誤 無效嘅<ref>標籤; 無文字提供於名為rusmar6-rec嘅參照
  11. 武漢肺炎 老大哥俄羅斯關閉與中國邊界 RFI 2020-01-30
  12. 12.0 12.1 武漢肺炎》俄羅斯宣布全面禁止中國人入境 包含港澳 自由時報 2020-02-19
  13. 【新冠肺炎】中方不滿俄羅斯監控境內中國人:美國都沒這樣做 HK01 2020-02-27
  14. 14.0 14.1 俄罗斯针对中国人采取超严厉防疫措施 VOA 2020-02-23
  15. 【武漢肺炎大爆發】俄方嚴密監控當地中國人 華使館不滿:美國都沒有這樣做 眾新聞 2020-02-27
  16. 俄羅斯推動歧視華人?疫情展示俄中往來陰暗一面 VOA粵語 2020-02-29
  17. 莫斯科10萬人臉識別鏡頭 逮違隔離令者 明報 2020-03-25
  18. 早報:美國佐治亞州黑人男子慢跑時被白人父子槍殺,司法部或起訴仇恨犯罪 - 普京宣布俄羅斯今日復工復產,日增逾萬人確診 端傳媒 2020-05-12
  19. 俄羅斯衛生部報告:武漢肺炎可能是人工病毒 美洲台灣日報 2020-02-21
  20. 武漢肺炎疫苗 俄羅斯宣稱已開始動物試驗 台灣中央通訊社 2020-03-17