武漢肺炎日本疫情

武漢肺炎日本各都道府縣疫情

武漢肺炎日本疫情，係介紹「武漢肺炎」喺日本嘅爆發情形。截至3月14號，日本（唔包括鑽石公主號）累計報告確診病例787個，死亡22個。而停泊喺日本嘅鑽石公主號度，總共有697人確診。厚生勞動省有派員上郵輪負責檢疫等相關工作，當中有一名檢疫官同一名蒐集資料嘅職員（冇密切接觸過船上人士），先後畀確診感染咗新肺炎。

據報喺2月14號，唔少學者專家喺橫濱度召開咗緊急研討會，要求政府同醫療機構為咗防止日本境內嘅疫情全面蔓延，要加強病毒感染嘅檢測機制，同埋完善醫療體制。

疫情同反應

神奈川縣一個有過武漢旅行史（未曾去過海鮮市場）嘅中國籍男子，喺1月3號開始發燒，1月6號去醫院睇醫生，1月10號入院治理，隨後康復咗喺1月15號出咗院。1月16號，日本嘅國立傳染病研究所測試咗呢個病患嘅樣本，確認咗有新肺炎病毒嘅存在。1月24號，喺東京都嘅一間醫院確認第二個確診個案，呢個原住喺武漢嘅患者係1月19號經香港國際機場入境，1月22號睇醫生跟著入院。而日本外務省呢日開始對湖北發出傳染病第三級危險警示（勸告終止旅行）日本政府亦同時決定埋，安排逗留武漢嘅日本僑民搭包機返本土。1月27號，首相安倍晉三喺國會眾議院預算委員會嘅會議度，話會將喺日本確診嘅新型肺炎感染，歸類做「指定傳染病」以預防疫病嘅傳播，呢個政策係畀當局可根據《傳染病醫學法》（《傳染病法》），可以強制病患入院。28號嘅內閣會議度，政府再發出咗內閣令，進一步修訂傳染病法例，指定檢疫新肺炎病毒，會同厚生勞動省條例等檢疫規例，講明修訂後嘅適用變化。世衞第二次開會（日本時間1月31號）確認咗疫情係公共衛生緊急狀態後，眾議院預算委員會即時討論咗，決定將對應嘅政府法令同省（部長）令嘅生效執行日，由2月7號提前到2月1號。內閣搞掂咗公文嘅具體內容，亦喺同一日嘅特別公告度頒令咗。

喺疫情爆發後，日本民間就積極咁同大陸疫區幫手抗疫，主動募集咗100萬個口罩支援，喺1月26號上晝由東京空運到咗成都。四川航空喺微博貼文，話成都雙流機場開通咗綠色通道，將啲捐贈嘅口罩由專車送咗去武漢。疫情擴大下，由日本各方向中國大陸送出嘅醫用口罩同防護服就接連不斷，一啲援助物資包裝度，仲有附埋用中文寫嘅比如「山川異域，風月同天」、「豈曰無衣，與子同裳」等打氣寄語。日本一啲地方政府都主動咁，分別同各自喺大陸嘅友好城市發送咗支援嘅防疫物資。而日本外務省話，睇到中國大陸嘅疫情發展好快，日本政府就會同中國大陸提供啲援助，1月28號晚黑派出咗裝咗口罩、防護服等大量支援物資嘅專機，由東京羽田機場度出發飛去武漢，上邊仲搭載咗包括日本政府官員同醫療隊員等大概十人。呢個援助行動係由日本國際協力機構（JICA）全程推進嘅。日本唔少網友都話撐政府嘅決定，有網友仲話希望加運啲即食麵過去，減輕（武漢）當地食物短缺問題。有網友仲講起，日本爆發甲型流感陣，大陸都有支援物資過去，分發畀日本嘅醫療機構，所以係需要報答返去咁話。唔少留言仲同疫區打氣鼓勵。

1月31號，日本國防部部長河野太郎根據政府總部對策，研究日本自衛隊對應嘅準備工作，話唔可以避免嘅收到咗都知事嘅救助請求，要幫助受疫情影響而返嚟嘅日本國民，會依照《自衛隊法》嘅災難派遣規定行動，將派出同國防部簽訂咗合約嘅白尾號輪渡，提供臨時收容，船隻即時就由兵庫縣相生港出發咗去東京灣。而日本外務省同日將中國大陸除湖北外地區，提高埋傳染病危險警示到第二級，要求避免非緊急需要嘅旅行。

2月4號，鑽石公主號郵輪進入咗日本海域，而早喺1月25號，有喺香港落船嘅乘客畀驗出感染咗新型肺炎，船度後尾有20名乘客被診斷出有新型肺炎病毒 ，喺厚生勞動省指示下，郵輪同船上遊客要留喺橫濱港度隔離十四日 ， 大約有成 3,700 個未有症狀嘅船員同遊客。隔離期間，人客可以唔戴口罩出入船上嘅酒吧，另外娛樂表演啲活動亦照常。截至2月7號，累計有61人確診新型冠狀病毒肺炎，當中有廿一個係日本人，全部確診嘅人分別送咗去日本五個都縣嘅醫院治理。截至2月11號左近日本度經有161宗確診嘅病例，其中鑽石公主號郵輪度佔咗135宗。

日本執政黨自民黨喺2月11號幹部會議後，幹事長二階俊博開記招陣話，因應中國大陸嘅疫情持續，自民黨所屬嘅國會議員每人將向中國大陸捐出五千日圓（約合318蚊人仔），以示友好。呢個係由每位國會議員嘅三月經費入邊先行扣除嘅，據統計預計會有198.5萬日圓嘅捐款。相關消息喺微信群組度熱傳，令唔少大陸網友感動，不過唔少日本網友並唔支持呢個決定，臺灣就有啲網友覺得呢個係有羞辱大陸嘅意思。

紓困措施

首相安倍晉三喺3月17號，同自民黨政調會長岸田文雄商議經濟對策，預計喺4月制訂專門嘅經濟措施。據報日本政府研究會同每人派1.2萬日圓有多嘅銀紙，但當時唔知係咪會全民派錢，定係傾斜去育兒家庭同低收入人士。而大阪市政府就喺3月18號先決定咗，4月開始會向當地嘅所有公立中小學學生，免費提供學校午餐，以減輕家庭嘅經濟負擔。大阪嘅計劃係會覆蓋16.5萬名已停課嘅學生，估計會同佢哋屋企節省返至少五萬日圓。

到4月3號左近，首相同埋執政黨自民黨一齊同意咗，會向受疫情影響嘅每戶家庭派發30萬日本紙，預計日本嘅5800萬家庭入邊，會有1000萬個家庭合乎申請嘅資格。計劃係唔會對家庭嘅收入設門檻，但會僅限於生計面臨困難嘅家庭，重會排除埋公務員、政治家、企業高層等人士。

到4月7號左近，安倍晉三開咗臨時內閣會議後，加推咗108萬億日圓嘅刺激經濟方案。安倍喺記招度講，除咗向每戶收入減少兼生活困難嘅家庭派30萬日圓，屋企有供養細路嘅，每個細路仔女都會派多一萬日圓。而中小企方面，若果公司收入按年跌五成，就有得拎200萬日圓嘅津貼；自由工作者嘅免稅額最高可以到100萬日圓。除咗刺激經濟方案，仲加多咗2020年度嘅補充預算案。刺激方案金額相當於日本出口經濟嘅20%，預派錢俾受疫情衝擊嘅家庭同中小企，涉款成六萬億日圓；同時重允許啲公司遲啲交稅等等，涉及咗26萬億日圓。安倍指出，呢次嘅刺激方案遠超2008年金融海嘯嘅57萬億日圓，啲開支重多過當時有一倍。

部分報告病例

截至2020年1月30號日本厚生勞動省公佈咗以下嘅確診病例：

• 病例1：
  • 1個年約30歲嘅男人，住喺日本神奈川縣，佢喺1月16號確診，並且有38個密切接觸者，佢喺1月24號結束醫學觀測，並已經出院
• 病例2：
  • 1個年約40歲嘅男人，住喺中國湖北省武漢市，佢喺1月24號確診，並且有32個密切接觸者
• 病例3：
  • 1個年約30歲的女人，住喺中國湖北省武漢市，佢喺1月25號確診，並且有7個密切接觸者
• 病例4：
  • 1個年約40歲嘅男人，住喺中國湖北省武漢市，佢喺1月26號確診，並且有2個密切接觸者
• 病例5：
  • 1個年約40歲嘅男人，住喺中國湖北省武漢市，佢喺1月28號確診，並且有3個密切接觸者
• 病例6：
  • 1個年約60幾歲嘅男人，住喺日本奈良縣，佢係一個旅遊巴司機，喺1月28號確診，並且有22個密切接觸者，當中包括「病例8」入面嘅女導遊。
• 病例7：
  • 1個年約40歲嘅女人，住喺中國湖北省武漢市，佢喺1月28號確診，並且有2個密切接觸者
• 病例8：
  • 1個年約40幾歲嘅女人，住喺日本大阪府。
  • 呢個女人係一個導遊，佢喺1月12號到17號曾經帶過來自中國湖北省武漢市嘅旅行團，佢喺1月20號去到東京都嘅一間醫院睇醫生，但係由於去到第二日都未退燒，而再去到另一間醫院睇醫生，不過佢當時都仲未檢測到有異常，而處於醫學觀測狀態。
  • 直至到1月23號，佢嘅症狀仍然未有好轉，於是去到大阪府一間醫院求醫，由於佢出現肺炎病徵，而被要求住院接受治療，去到1月29號，呢個女人嘅檢測結果證實佢感染咗新型冠狀病毒，經調查之後發現佢仲有3個密切接觸者。
• 病例9：
  • 1個年約50歲嘅男人，住喺中國湖北省武漢市，佢喺1月26號確診，並且出現發燒同喉嚨痛，當局仲調查緊有幾多個密切接觸者

出面網頁

• 日本厚生勞動省專題：《感染症情報：新型コロナウイルス感染症について》