藏本模型

藏本模型（Kuramoto model；取自日本物理學家藏本由紀個名）係一個對研究神經振盪同同步化嚟講好有用嘅模型。

喺模擬神經振盪嗰陣，藏本模型會用以角度計嘅相位（phase；指個振盪緊嘅系統處於佢個週期嘅邊一點，例如 0 度代表週期嘅開始點，180 度代表週期嘅一半）嚟代表研究緊嘅神經系統當中某部份嘅活動，忽視嗰個活動嘅波幅，並且用（例如）以下呢條式嚟表示啲變數之間嘅關係：

${\frac {d\theta _{i}}{dt}}=\omega _{i}+{\frac {K}{N}}\sum _{j=1}^{N}\sin(\theta _{j}-\theta _{i}),\qquad i=1\ldots N$；

當中左面嗰嚿表示研究緊嗰橛嘅相位隨時間嘅變化（可以睇導數），$\omega _{i}$ 代表個系統嘅自然頻率（natural frequency），${K}$ 代表嗰橛啲神經細胞嘅相配程度（coupling），${N}$ 代表嗰橛有幾多個振盪子。如果用日常用語講嘅話，呢條式講嘅嘢如下：研究緊嗰個神經系統部份嘅振盪相位隨時間嘅改變率（條式左面嗰嚿）好大程度上由嗰個部份嘅自然頻率話事，又會受到佢同個系統當中嘅其他部份喺振盪相位上嘅差異（$\theta _{j}-\theta _{i}$）所影響。個研究者知道嗮啲參數嘅數值之後，就可以模擬成個系統嘅行為。

藏本模型俾神經科學家廣泛噉攞嚟研究腦入面嗰啲神經振盪活動，而且仲出咗第啲版本嚟更仔細噉提高個模型喺生物學上嘅可信性，例如係有啲模型會考慮埋塊大腦皮層嘅連繫性（即係加多個參數表示「大腦皮層嘅連繫性」）。跟手啲神經科學家仲會攞實際嘅數據嚟驗證呢啲模型。

用藏本模型模擬神經振盪