P50
P50 係事件相關電位（event-related potential）嘅一種，出現喺接收到一個刺激（通常係一吓聲響）之後大約 50 至 60 毫秒[1]，好多時出現喺顳葉（temporal lobe；主管聽覺嘅腦葉）嗰頭[2]。對 P50 嘅研究好多時會視佢為代表感覺門控（sensory gating）嘅腦活動－感覺門控係指個腦有能力選擇性噉篩走一部份所收到嘅感覺訊息（例如係喺一個好多人好嘈嘅集會當中集中精神淨係聽身邊嗰個人講嘢），而如果一個受試者對於某一個聽覺刺激冇 P50 嘅反應，就表示佢個腦嘅感覺門控機制喺度發揮效用，令佢接收唔到嗰個刺激[3]。
有研究顯示，P50 仲可以用嚟預測同診斷某啲心理病，例如係精神分裂症嘅患者就出現唔能夠正確噉做 P50 嘅現象（即係好多時會唔受控噉接收好多唔應該接收嘅刺激）[4][5][6]。除咗精神分裂之外，外傷性腦損傷嘅病人、娛樂性用藥、同埋有創傷後心理壓力緊張症候群（PTSD）嘅病人都有 P50 失調嘅情況[7]。
研究方法[編輯]
喺神經科學當中，科學家多數係用配對拍答測試（paired click test）嚟研究 P50 嘅。配對拍答測試嘅步驟如下：個研究者會一路用腦電圖量度住受試者嘅腦電活動，要佢哋留心聽一個拍答聲，跟住再俾佢哋聽第一個聲，然後喺大約 500 毫秒之後俾佢哋聽第二個聲。一個年紀大過 4 個月嘅人類正常嚟講會對第二個聲 P50 反應弱啲（嗰個聲所引起嘅 P50 波幅會細啲）。「P50 壓抑」（P50 suppression）嘅數值就係「第二個聲所引起嘅 P50 波幅」除「第一個聲所引起嘅 P50 波幅」嘅百分比，反映咗個受試者喺聽到第一個聲之後感覺門控有幾強烈噉壓抑佢對第二個聲嘅反應，通常數係 80% 左右[8]。
同病嘅啦掕[編輯]
精神分裂[編輯]
研究顯示，精神分裂嘅病人通常唔會有 P50 壓抑（對第二個聲嘅 P50 反應同對第一個聲嘅一樣），又或者反而對第一個聲有 P50 壓抑[7]。有研究者指，呢種 P50 異常表示精神分裂症嘅患者會不自控噉去留意一啲正常人會忽略嘅刺激，解釋到點解佢哋成日都會有難集中精神或者感覺超負荷（sensory overload）嘅情況[9]。
精神分裂當中嘅 P50 異常受遺傳因素影響：有研究發現，喺一個家庭入面，如果有個仔女有精神分裂，佢嘅父母（同冇仔女有精神分裂嘅父母相比）比較有可能會有 P50 壓抑異常（對第二個聲冇 P50 壓抑，又或者對第一個聲反而有 P50 壓抑），就算嗰位父母冇精神分裂都係噉[10]。
睇埋[編輯]
攷[編輯]
- ↑ Nathan Zasler; Douglas Katz, MD; Ross D. Zafonte (2007). Brain Injury Medicine: Principles and Practice. Demos Medical Publishing. pp. 160–161.
- ↑ Korzyukov, O., Pflieger, M. E., Wagner, M., Bowyer, S. M., Rosburg, T., Sundaresan, K., ... & Boutros, N. N. (2007). Generators of the intracranial P50 response in auditory sensory gating. Neuroimage, 35(2), 814-826.
- ↑ Huotilainen, M., Winkler, I., Alho, K., Escera, C., Virtanen, J., Ilmoniemi, R. J., ... & Näätänen, R. (1998). Combined mapping of human auditory EEG and MEG responses. Electroencephalography and Clinical Neurophysiology/Evoked Potentials Section, 108(4), 370-379.
- ↑ Clementz, B. A., Blumenfeld, L. D., & Cobb, S. (1997). The gamma band response may account for poor P50 suppression in schizophrenia. Neuroreport, 8(18), 3889-3893.
- ↑ Michael S. Ritsner (21 April 2009). The Handbook of Neuropsychiatric Biomarkers, Endophenotypes and Genes: Volume I: Neuropsychological Endophenotypes and Biomarkers. Springer. p. 120.
- ↑ Christoph Mulert; Louis Lemieux (29 October 2009). EEG - fMRI: Physiological Basis, Technique, and Applications. Springer. p. 84.
- ↑ 7.0 7.1 Michelle de Haan (15 April 2013). Infant EEG and Event-Related Potentials. Psychology Press. p. 240.
- ↑ Kenneth L. Davis; American College of Neuropsychopharmacology (2002). Neuropsychopharmacology: The Fifth Generation of Progress : an Official Publication of the American College of Neuropsychopharmacology. Lippincott Williams & Wilkins. p. 706.
- ↑ Roland A. Carlstedt PhD (14 December 2009). Handbook of Integrative Clinical Psychology, Psychiatry, and Behavioral Medicine: Perspectives, Practices, and Research. Springer Publishing Company. p. 595.
- ↑ E. Roy Skinner (2002). Brain Lipids and Disorders in Biological Psychiatry. Elsevier. pp. 46–47.
