香港警察爭議

香港警察爭議係香港歷來嘅警察部隊受過嘅唔同爭議。香港警察嘅聲譽經歷過唔少次起起跌跌，由1960年代嘅貪污成風，到1980年代至2000年代譽做「亞洲最佳」，到2019年因為反修例運動期間嘅濫權，而俾人叫做「香港黑警」。

英治時代

香港皇家警察係英治香港殖民地政府嘅一部分，華人平民一般都覺得啲警察係為咗個政權而做嘢，名氣唔特別好。1960年代，皇家香港警察嘅貪污風氣好嚴重，其中最出名嘅就係葛柏案。因為嗰個年代嘅警察貪污非常嚴重，所以政府為咗處理佢，後嚟就成立咗廉政公署。經過警廉衝突之後，皇家香港警察做過改革，仲成為「亞洲最佳」(Asia's finest) 嘅警隊。

特區時代

2010年代開始，香港警察過渡緊做特區政府嘅一部分，而佢嘅聲譽又轉差，觸發點主要係2014年嘅佔領中環運動同埋2019年嘅反修例運動期間。

除咗兩次大型嘅社會運動之外，仲有零星嘅警察失德事件，例如2013年嘅「白粉當鹽案」：當時，兩個元朗嘅差人去水邊圍邨調查防喉箱藏毒案，佢哋唔想落案，於是將海洛英當做鹽，結果因為有管理員唔妥而投訴，結果啲粉做咗化驗，證實真係海洛英。仲有，2019年發生過掃蕩賭檔造假事件，虛構功績。

雨傘運動

喺2014年9月28號，警察喺金鐘射咗87粒催淚彈嚟驅散示威者嘅人羣，直接造成雨傘革命。好多人批評警察濫用武力、基於政治原因嚟拉人等等，令公眾對警察嘅觀感越嚟越差。

其中嗰年最出名嘅警察失德事件，就係涉及七位警察喺暗角毆打一位社工嘅七警暗角打人案。

反修例運動

内文：反送中運動期間嘅警察濫權

2019年，警察喺反修例運動當中，出現咗大量嘅警暴事件，其中包括：亂咁射催淚彈同橡膠子彈、亂咁打人、包庇黑社會、同強姦拉咗嘅示威者等等，所以就出現咗「香港黑警」嘅叫法。

打壓傳媒

根據《警察通例》，警員喺執行職務嘅時候，應該要盡量配合記者嘅採訪工作。香港有好幾間電視台同網媒，都會將唔同嘅公眾活動，例如示威、遊行、同衝突嘅場面等等，直接放上鏡頭去直播。喺持續半年以上嘅反修例運動期間，有唔少香港警察嘅警察暴力事件，都畀記者嘅直播鏡頭影得一清二楚，直接將事實放喺香港市民同國際社會嘅眼前。正因為咁，前綫警員同記者嘅衝突變得無日無之，有警員更開始用「黑記」呢個名，嚟對應返「黑警」嚟笑啲記者，質疑嘅記者鏡頭只係針對警察。

鄧力行案

2016年2月10號，《明報》記者鄧力行喺旺角採訪一單騷亂期間，畀警員襲擊：當時佢掛住份記者證，跟住喺巴士上層影。曾經有警員要求佢行開，不過佢就表明咗身分，一行出個巴士門口，就即刻畀一咋攞住長盾嘅警察壓喺地上面毆打，搞到後腦受傷流血。雖然嗰晚有《蘋果日報》記者影低咗事發嘅過程，不過件事隔咗兩年幾，仍然係裁定單案做「無法追查」同埋「無法完全證明屬實」。之後，明報職工協會喺2019年2月3號，話受襲擊嘅記者會入稟法院嚟開始索償嘅程序，而個協會亦都會全力支持同埋幫手。佢哋同時希望監警會盡快處理呢單案嘅司法覆核申請，避免單嘢繼續托落去，而佢亦會喺有決定之後公布相關嘅理據。

到7月頭，鄧申請嘅法援拒絕咗，於是同記協建議發起眾籌，嚟支援任何遇襲嘅記者同警方索償，包括佢自己在內。記協主席楊健興就話，對相關嘅調查結果感到憤怒同難以接受，批評警方調查結果理據互相矛盾、係「語言偽術」，同時亦都特登混淆視聽，令到單嘢冇哂下文。關注香港人權狀況嘅民間組織「民權觀察」就指出，就算有傳媒錄低成條片段做證據，警方仍然將投訴列做「無法完全證明屬實」，但係警方又話會採取適當嘅紀律行動，完全係「此地無銀」，個組織就督促警方同監警會要公開調查報告，俾公眾了解有關決定嘅理據，又話事件反映到投訴機制有缺陷。

監督機制冇用

一有警民衝突事件出現，香港特首林鄭月娥、保安局局長李家超、警務處處長鄧炳強俾傳媒問親都左閃右避，一味話市民如果有唔滿意可以用現有嘅投訴機制向警方投訴，林鄭仲話班差人當更有好大壓力，要求市民「包容」佢地咁話。但其實呢個所謂投訴警察機制根本就冇用，成個制度都俾差人把持住，投訴程序又長，市民仲要冒住俾差人檢控返轉頭嘅風險，之但係同案相關嘅受查人士又唔係必須配合調查，所謂獨立嘅監警會對警隊又冇調查權，於是被投訴果個差人就會因為「無法查證」而被裁定投訴唔成立，呢個所謂「行之有效」嘅投訴機制根本就得個講字，有冤冇路訴咪激起更多民憤囉。

干預和平意見表達

喺2021年渣打香港馬拉松賽事入面，有選手着咗「香港加油」字樣嘅衫，就算冇其他動作，只係和平表達心聲，但都被警察阻止參賽，強行帶離跑手通道。

輕大事重小事

喺2023年，香港血案頻密發生，其中有幾單當街斬人案都已經臭名遠播，令啲市民人心惶惶。同時，詐騙匪徒亦變得肆無忌憚，坊間有唔少人因為咁而埋怨警方辦事不力。其中，喺疑點重重嘅蔡天鳳案入面，啲證物嘅化驗進度又好慢，但係又錯漏百出，搞到好多人批評。

同時間，啲警隊就拉哂大隊，去搞啲濫用公共交通工具折扣、器官捐贈登記冊嘅惡作劇等等嘅任務，聲稱呢啲係維護國家安全嘅重任，但係實請根本就冇乜人關心呢啲小事。警察嘅主要職責做毋好，重要被挪用去越俎代庖，高調打擊尐連專職部門都唔得閒理嘅雞毛蒜皮嘢。

有專家分析認為，比較世界其他地方，雖然香港警察人數佔當地人口比例好高，但係都依然搞成恁，係因為渠哋好側重咁去處理政治嘢；一來可能因為同黑幫合作打擊異見人士，跟住畀更多空間去犯罪嚟當做報酬，二來就係曾經會監察住警察嘅公民組織一個一個都散走，令警察越嚟越少人睇實，所以更加容許佢哋亂嚟。

流行文化

用香港警察嘅失德濫權嚟做題材嘅戲劇包括：

電影

• 《五億探長雷洛傳》
• 《無間道》
• 《Laughing Gor之潛罪犯》
• 《魔警》
• 《殺破狼》
• 《復仇者之死》
• 《使徒行者2：諜影行動》
• 《暗花》

電視劇

• 《潛行狙擊》
• 《使徒行者》
• 《EU超時任務》
• 《解決師》

惡搞歌曲

反修例運動期間，流傳住一首熱播嘅網絡改篇歌曲《肥媽有話兒》，呢首歌以「黑警」為主題，指控差人暴力對待市民，又認為黑警「又唔做嘢、又唔讀書」，最後以「黑警破壞香港法理」一句歌詞結尾。

香港警察應該遭受報應嘅觀點

内文：香港親中派同政府遭受報應嘅觀點

由2014年雨遮革命開始，香港社會兩極化，當有一啲親中建制派同香港政府公務員（特別係香港警察）面對一啲不幸新聞嘅時候，有一啲非建制派（由泛民主派、抗爭派、香港本土派、修憲派組成）聲音就會認為佢哋遭受報應，歡迎事件嘅發生。

親中派對於民間對警察不滿嘅反應

面對民間對警察不滿嘅反應，親中派不時會批評呢啲民間聲音，又提議設立辱警罪或者仇警罪，對付批評香港警察嘅人。

喺2021年9月，香港一名警員因辦案殉職，有部份對警察不滿嘅網民樂見事件，結果引來親中派嘅連番批評。例如，香港警察隊員佐級協會主席林志偉就指責呢啲批評香港警察嘅人冷血，話喺佢哋身上睇唔到人禽之別。不過，面對親中派嘅說法，就有民主派嘅聲音反駁，其實係香港警察冷血在先，兩年前反送中運動入面，警察就對一啲不幸離世嘅示威者講更加冷血嘅說話，例如公開挑釁其他示威者話要慶祝，稱呼佢哋係曱甴等等。