第6屆香港區議會選舉

2019年香港區議會選舉

2019年11月24號

452個民選議席 投票率 71.23% （▲24.22%）   第一大黨 第二大黨 第三大黨   領袖 胡志偉 楊岳橋 李慧琼 政黨 民主黨 公民黨 民建聯 政黨聯盟 民主派 民主派 親中派 代表選區 未參選 未參選 九龍城土瓜灣北 上屆結果 43席，13.56% 10席，3.62% 119席，21.39% 選前議席 37 12 117 贏得議席 91 32 21 議席差額 ▲54 ▲20 ▼96 民選得票 362,275 141,713 492,042 得票率 12.41% 4.85% 16.85% 游離票率 ▼1.15 ▲1.23% ▼4.54%   第四大黨 第五大黨 第六大黨   領袖 范國威 施德來 朱凱廸 政黨 新民主同盟 民協 朱凱迪新西團隊 政黨聯盟 民主派 民主派 民主派 代表選區 西貢運亨 黃大仙東美 元朗八鄉南 上屆結果 15席，2.92% 18席，3.82% 新政黨 選前議席 13 12 0 贏得議席 19 19 8 議席差額 ▲6 ▲7 ▲8 民選得票 87,923 77,099 34,845 得票率 3.01% 2.64% 1.19% 游離票率 ▲0.09% ▼1.18% -

2019年香港區議會選舉結果地圖（勝出派別及當選者得票率）

2019年香港區議會選舉結果地圖（勝出政黨）

2019年區議會一般選舉，係香港主權移交後第6屆香港區議會選舉，喺2019年11月24號舉行。呢次選舉會重選香港十八區區議會全部452個民選議席，加埋年頭已經改選嘅27個當然議員，總共479席。議席任期四年，由2020年1月1號去到2023年12月31號為止。呢場選舉普遍被視為係對反送中運動嘅公投，同埋係中國共產黨顛覆香港選舉制度前香港最後一場自由選舉。

呢場選舉正值反送中運動，吸引大批不滿中共、香港政府同香港警察嘅選民踴躍投票，投票人數同投票率都創香港選舉嘅新高。結果支持反送中運動嘅民主派喺呢場選舉贏到開巷，攞到全港接近九成嘅絕大多數民選議席，相反畀中共操控嘅親中派就輸到甩褲，得返大約一成嘅少數民選議席，比2003年嗰時重慘烈。

呢場選舉嘅結果反映香港絕大多數民意都係支持反送中運動，令大為震驚嘅中共輸打贏要，喺之後通過港版國安法大肆迫害政治異見人士，甚至強行顛覆香港選舉制度。

背景

上屆區議會選舉，民主派喺雨遮革命後，強調要將運動精神帶落社區，以致多咗唔少人留意政治，甚至出現「傘後組織」成立同埋一眾政治新人（俗稱「傘兵」）參選，議席上面有增進。到2016年嘅立法會選舉，民主派攞到30席。但係之後中共同香港政府輸打贏要，以一連串官司同釋法，強行剝奪6個民選議員嘅資格，打後嘅兩場補選，民主派都處於劣勢，親中派更加第一次喺「單對單」嘅立法會補選入面贏咗，咁樣嘅情況之下，民主派聲勢低迷。

同時，戴耀廷提出「風雲計劃」，計劃由區議會入手，增加民主派喺立法會同特首選委入面嘅影響力。計劃打算搵大約100人去填補本身冇人選嘅白區，減少親中派自動當選嘅機會，但係計劃既冇經費，又唔夠人去參加，不過的確培養到一班人出嚟選區議會。

2019年6月，逃犯條例修訂草案掀起社會極大嘅反對浪潮，1個月內出現咗兩場超過100萬人同200萬人嘅遊行，反送中運動亦都令到選民新登記人數破咗歷年記錄，選民人數更加突破400萬人，呢啲新登記選民被視為係對香港政府不滿而催生出嚟嘅，佢哋嘅投票意向足以影響嚟緊嘅區議會選情。

亦都因為反送中運動，唔少素人都開始落區，參選區議會，當中有譚香文發起嘅反自動當選運動，但係當中開始出現撞區嘅情況，尤其是大學選區同曉麗選區引起嘅風波最大，咁啱兩區都牽涉由反自動當選運動出嚟嘅候選人。由幾十個素人組成嘅宣傳平台「自由系」亦都喺同期成立，最後民主派成功填滿所有白區，今屆選舉成為自1982年區議會成立以嚟，第一次冇區自動當選。

反送中運動去到10月都未完，香港政府更加喺10月動用《緊急情況規例條例》推行《禁止蒙面規例》，令局勢火上加油。同時，香港政府同親中派人士亦一直威脅，如果投票當日有事發生，香港政府會強行押後選舉、強行取消嗰個選區嘅選舉，甚至強行取消成個區議會嘅選舉。

結果

内文：第6屆香港區議會選舉結果

所有議席分佈（黃色係民主派；藍色係親中派）

喺反送中運動仍未結束嘅情況下，民主派係呢次選舉嘅大贏家，夾埋攞到差唔多390席，幾乎控制晒各區區議會，親中派只係保得住當然議員佔近半數嘅離島區議會控制權。

民主黨繼2003年第2屆香港區議會選舉之後，取代咗民建聯做咗區議會第一大黨，而新民黨、港九勞工社團聯會就無晒所有議席。

有啲落選嘅親中派區議員獲香港政府委任公職，引發爭議：

• 油尖旺區獨立親中派（九社聯、西九新動力）鄧銘心出任食水安全諮詢委員會委員。
• 新民黨林梓鴻、青年民建聯主席施永泰出任青年廣場管理諮詢委員會委員，但施永泰冇份參選今屆區選。
• 新民黨容海恩、民建聯何俊賢獲委任為廉署事宜投訴委員會成員，但容海恩、何俊賢冇份參選今屆區選。

結果簡要

區議會	議席總數	民主派	親中派	中間派
中西區	15	14	1
灣仔區	13	9	4
東區	35	32	3
南區	17	15	2
油尖旺區	20	17	3
深水埗區	25	23	2
九龍城區	25	15	10
黃大仙區	25	25
觀塘區	40	28	12
荃灣區	21	16	4	1
屯門區	32	28	4
元朗區	45	33	12
北區	22	15	7
大埔區	21	19	2
西貢區	31	26	2	3
沙田區	42	40	2
葵青區	32	27	5
離島區	18	7	11
		389	86	4

紀錄

• 今次區議會選舉投票率係香港有民選以嚟最高（71.23%）。
• 投票人數亦都創新高（2,943,842人）。
• 第一次冇選區自動當選
• 第一次有同性戀者當選區議員（只包括已出櫃人士）：岑子杰、張錦雄
• 由1982年有區議會選舉嗰時已經當選嘅屯門區蘇炤成，受到十一次選舉洗禮，今屆畀立言香港委員巫堃泰打低，終於落馬。換言之，香港第一代嘅區議員只係剩低離島區嘅周玉堂（但係周玉堂係一次區議會選舉都未參加過）。而由1985年開始連續當選十屆嘅區議員重有四位，分別係觀塘區潘任惠珍、荃灣區陳琬琛、沙田區程張迎、葵青區梁耀忠。

後續

呢場選舉嘅結果，令中共大為震驚。香港政府輸打贏要，設立多個成員全部由香港政府委任嘅委員會，同埋搵香港政府入面嘅民政事務專員嚟架空民選嘅區議會，中共又喺2020年通過港版國安法，大肆迫害民主派，甚至強行顛覆香港選舉制度。再之後，香港政府強逼區議員宣誓，引發香港民主派區議員辭職潮。

註腳

參考

出面網頁

• 2019年區議會選舉官方網站
• 頭條日報－區議會選舉2019專頁
• on.cc東網－2019年區議會選舉結果專頁
• 香港01－2019年區議會選舉互動專頁
• 立場新聞－2019年區議會選舉專頁