化學家
每個化學家會有唔同嘅專科，但係佢哋有一啲共同嘅做嘢方法。首先，佢哋睇一種嘢通常都會研究佢係酸定鹼，並且細微到用原子嘅角度去諗嗰舊嘢。其次，佢哋好小心咁測量啲嘢撈埋嘅時候唔同物質嘅比例、化學作用進行緊嘅時候反應嘅速度同𠹺唔同嘢之間化學特性嘅分別。重有，佢哋會用自己有限嘅知識去嘗試了解啲自己唔熟嘅嘢，從而令自己學識更多。
大部份化學家都係讀到大學畢業就出去搵工做，但係都有啲公司要啲人讀到博士先會請。好多有關化學嘅工作或者大學化學嘅課程對數學、物理同𠹺化學同樣重視，因為化學又叫中心科學，學得化學唔多唔少都要喺科學嘅其他領域入面略通一二。
讀到碩士，化學科學生就要專攻一個分支。大部分人都會揀生物化學，有機化學或者無機化學。當然，化學入面其他分支都會有人讀。
讀完書之後，化學畢業生，而家做咗化學家，就會出來搵工。佢哋多數會加入化學工業或者做藥劑師。喺好多國家大學其實有一科藥劑學專科，不過都會有人讀完化學跳槽做藥劑師。又有啲化學家會選擇打政府工，做政府化驗所技術員。
