輕重讀
提示：呢篇文講嘅唔係重音。| 輕重讀 | |
|---|---|
| ˈ◌ | |
| IPA編號 | 501 |
| 編碼 | |
| HTML碼（十進制） | ˈ |
| Unicode碼（十六進制） | U+02C8 |
| 輕重讀 | |
|---|---|
| ˌ◌ | |
| IPA編號 | 502 |
| 編碼 | |
| HTML碼（十進制） | ˌ |
| Unicode碼（十六進制） | U+02CC |
重讀（粵拼：cung5 duk6；stress）同重音（粵拼：cung5 jam1；accent）喺語言學入面有時係接近同義嘅概念，都指某音節喺單字入面或者單字喺句子入面相對突顯（prominent）嘅意思，不過喺一啲特別嘅區分之上，重音（accent）經常攞嚟應用喺聲音聽覺上相關嘅概念。同佢相對應嘅概念係輕讀（unstress，又稱弱讀）同輕音。[1][2]
聲學性質
[編輯]過去嘅硏究曾經認爲，輕重音嘅區別主要係喺音強上。而家嘅硏究表明，認爲重讀喺客觀上會抬高音階，擴大音域，延長音長或者增加音強，仲會令音色對比更加飽滿；同樣，輕讀喺客觀上會減縮音高、音長、音強同埋音色嘅對比程度。輕重音可以認爲係音強、音色、音高同音長嘅綜合表現，聽覺所感知嘅響度係呢四個方面嘅複雜綜合體。
唔同嘅語言喺突顯輕重音時，側重面會唔同。例如，中文輕音嘅主要征兆係音節音長嘅縮短，音強嘅作用唔大。而喺英語入面，除咗音長之外，音高亦有較大嘅作用。基頻高嘅音節，會比基頻低嘅音節更加容易聽成重音；基頻上升或者下降嘅音節，會比基頻平直嘅音節更加容易聽成重音[2]。
詞重音
[編輯]詞重音係具有區別詞匯意義嘅重音。
多音節詞入面各音節嘅輕重往往固定唔變。例如英語「begin」[bɪˈgɪn]入面，第二音節必須讀重音。
詞嘅輕重音有時候有同語義有關。普通話入面，「東西」讀成「中強」表示「東西方向」，讀成「強弱」就表示「嘢」；英語入面，[ˈrekord]表示名詞義，[reˈkord]表示動詞義。輕重音有時候同語法亦都有關，普通話入面嘅助詞「了、着、過、的、地、得」喺語流入面都讀成輕音，呢啲情況係由佢嘅語法功能所確定嘅[2]。
固定重音同自由重音
[編輯]喺唔同嘅語言入面，詞中嘅輕重音位置唔同。漢語詞以單音節同雙音節爲主，雙音節主要只有「中強」同「強弱」兩種模式[3]，重音嘅作用唔明顯。
喺以多音節爲主嘅語言入面，重音嘅作用較爲明顯，可以分爲固定重音同自由重音。固定重音指有啲語言入面，重音總係落喺詞嘅同一位置上，如捷克語重音總係喺詞嘅第一個音節上，波蘭語總係喺倒數第二個音節上，法語同維吾爾語嘅大多數詞則喺最尾一個音節上[4]。自由重音指有嘅語言入面重音唔限定於落喺詞嘅某一個音節上，唔同嘅詞重音位置各唔相同，稱爲自由重音，如英語入面嘅詞重音。
主重音同次重音
[編輯]根據詞重音嘅突顯程度，可以分出主重音同次重音。主重音嘅突顯程度最高，次重音低於主重音但係高於非重讀音節。英語次重音一般只係喺詞單語或者喺句尾先至比較明顯，喺語流入面同非重讀音節差別唔大[2]。漢語入面嘅詞重音分級，有嘅學者認爲冇必要[2]，有啲就分出咗重音、中音、次輕音、最輕音四等[5]。
句重音
[編輯]句重音係喺一個語句入面突顯程度最高嘅重音。句重音嘅分類喺硏究界冇統一意見，但一般至少有語法重音同邏輯重音兩種。
語法重音係指由句法結構同語義特點決定嘅重音，即係唔表現特殊嘅思想感情嘅自然重讀。成日讀語法重音嘅，例如一般短句嘅謂語，名詞、動詞、形容詞嘅修飾語，動詞後由形容詞或者其他動詞充當嘅補語，表示指代、詢問或者任指嘅代詞等等[4]。
邏輯重音係表現特殊思想感情嘅強調重讀。邏輯重音重於語法重音。有啲學者認爲邏輯重音係對比重音，有啲學者認爲邏輯重音係強調重音，有啲則認爲邏輯重音包括對比重音、強調重音等等。
睇埋
[編輯]註
[編輯]- ↑ 語言學名詞審定委員會 (2011)。《語言學名詞》。北京：商務印書館。頁 35、36。ISBN 9787100068710。
- ↑ 2.0 2.1 2.2 2.3 2.4 林燾、王理嘉 (1992)。《語音學教程》。北京：北京大學出版社。頁 174-178。ISBN 9787301018446。
- ↑ 周一民 (2006)。《現代漢語》。北京：北京師範大學出版社。頁 104。ISBN 9787303034604。
- ↑ 4.0 4.1 張清源主編 (1990)。《現代漢語知識辭典》。成都：四川人民出版社。頁 96、97。ISBN 7220007213。
- ↑ 董紹克，閻俊傑主編 (1996)。《漢語知識辭典》。北京：警官教育出版社。頁 77。ISBN 7810277707。
相關書目
[編輯]- 語言學名詞審定委員會 (2011)。《語言學名詞》。北京：商務印書館。ISBN 9787100068710。
- 朱曉農 (2010)。《語音學》。北京：商務印書館。ISBN 9787100066815。
- 趙忠德 (2006)。《音系學》。上海：上海外語教育出版社。ISBN 7810958763。
- 林燾、王理嘉 (1992)。《語音學教程》。北京：北京大學出版社。ISBN 9787301018446。
出面網頁
[編輯]- （英文） 輕重讀，不列顛百科全書。
- （英文） Feet and Metrical Stress (The Cambridge Handbook of Phonology)
- （英文） Li, J., & Mok, P. P. K. (2014). The acquisition of english lexical stress by cantonese-english bilingual children at 2; 06 and 3; 0. In Proceedings of Speech Prosody (Vol. 7, pp. 688-692).
- （英文） An Exploration of Word Stress in Hong Kong English (PDF)