分子

分子（粵拼：fan6 zi2）係由兩粒或以上原子俾化學鍵黐埋之後嘅產物。佢哋有特定結構，可以睇成物質，通常係化合物嘅基本單位。

分子由好幾粒原子合埋一齊而成。佢可以由同一隻元素嘅原子組成，例如氧氣O₂；亦都可以由唔同元素組成，例如水分子H₂O。

同一粒分子唔同嘅畫法。左面、中面係立體模型，右面嗰幅係平面畫法。（左）黑、白色個圓圈分別代表碳、氫嘅原子，圓圈之間嘅柱體表示化學鍵；模型俾團雲包圍，代表住分子嘅表面；紅、藍色分別代表正、負電。（中）同左圖類似。淺藍、白色圓圈分別代表碳、氫嘅原子，柱體表示化學鍵。（右）爾種用化學符號同直線嚟表示分子結構嘅畫法叫結構式。