落馬洲支綫

港鐵
**落馬洲支線**

通車日期	2007年8月15號
車站數目	2（2007年）未來最多加到4個（古洞站同洲頭站）
服務區域	元朗區、北區

落馬洲支綫係港鐵東鐵綫嘅支線，亦係香港第二條跨境客運鐵路。支線由而家嘅上水站開始，向西北方向延伸，穿越塱原濕地、古洞同洲頭幾個地方，最尾連接落馬洲站，全長7.4公里，興建1個車站。支線建成後，東鐵北行一共有2個終點站，分別通到2個同中國大陸連接嘅關卡－羅湖同落馬洲。工程喺2002年6月14號開始，到2006年中完工，落馬洲站喺2007年8月15號下晝4點正式啟用。第一班列車喺下晝3點17分由尖東站開出，而第一班由落馬洲站開出嘅南行列車亦喺下晝4點15分開出。

而家，每個鐘都有5班車（非繁忙時間）或6班車（繁忙時間）來往紅磡至落馬洲，乘客只需要喺紅磡至上水之間各站登上去落馬洲嘅列車就去到。上水去落馬洲嘅行車時間大概要12分鐘^[1]，紅磡去落馬洲就大概要49分鐘^[2]。

計劃同埋工程

落馬洲支線原屬九廣西鐵（即係依家嘅西鐵綫）第二期嘅鐵路，將會連接將來嘅北環綫，令到西鐵綫喺新界北區同東鐵綫連接，最終令兩條鐵路都可以通往兩個同中國大陸連接嘅關口（羅湖和落馬洲）。不過由於西鐵實際客量比預期為低，作為一間商業機構，九鐵唔可以貿貿然再投資喺一條蝕本嘅鐵路之上。所以九鐵決定改為先以長期有盈餘嘅東鐵連接，等乘客嘅乘車模式定型後，再決定係咪興建北環線。支線工程喺2002年第四季開始，工程主要包括4大項目：隧道段、高架橋段、落馬洲車站以及上水站改善工程。

上水站

工程包括上水站嘅車站大堂同月台擴闊工程，以應付喺上水站落車，轉去落馬洲站列車嘅乘客。有關工程喺2006年大致完成，大堂嘅新翼同連接隔離商場嘅行人天橋已經喺1月尾開放畀公眾使用。另外上水站外嘅路軌亦已重新編排，令路軌成為東鐵嘅其中一個交匯處。

塱原濕地

列車駛離上水站後，會駛入穿過塱原濕地嘅地底隧道。呢個計劃係經過一番激烈爭論後得到嘅結果。喺計劃初期，九鐵原先建議落馬洲支線塱原段，會好似西鐵穿過八鄉等地嘅高架天橋形式，穿越塱原濕地。但呢個計劃俾各環保團體強烈反對，指興建高架橋時將會嚴重破壞塱原濕地嘅生境同地貌。即使九鐵提議工程完工後會盡量回復原來面貌，但環保署唔同意，重唔發出環境許可證。

最後，環評上訴委員會否決高架橋方案，九鐵只好採納科大教授嘅方案，決定支線以地底隧道形式穿過塱原濕地。雖然呢個方案會令整條支線嘅興建成本增加十億港元、回報率下降同完工日期押後等等，不過此方案獲大多數人所接受，認為係平衡發展同保育嘅可持續發展方案。

古洞站

雖然支線沿途暫時不設車站，不過當列車駛過塱原濕地後，會經過一個預留嘅地底車站－古洞站。呢個站嘅建設，係因應香港特區政府喺2003年公佈嘅研究，指出古洞北同粉嶺北一共689公頃嘅土地適合做新發展區。由於古洞好有可能成為一個新市鎮，所以九鐵喺計劃同興建落馬洲支線時，就預留位置畀第時起古洞站。

洲頭站

根據最新建議，北環線會喺同落馬洲支線匯合嘅洲頭一帶，興建洲頭站，而落馬洲支線喺北環線興建時亦會興建車站，方便北環線乘客轉乘東鐵前往新界東。

落馬洲站

落馬洲支線嘅總站－落馬洲站係一個4層，佔地約9公頃嘅車站大樓。大堂裡面設有購物區、免稅店等設施方便乘客。由於車站大樓同時係香港入境處嘅出入境檢查站，所以大樓內設有海關、出入境及其他重要嘅過境設施。乘客辦妥出境手續後，會經由一條橫跨深圳河，單臂斜拉式天橋行過去深圳嘅福田口岸聯檢大樓。乘客亦可以同時喺呢個聯檢大樓內嘅深圳地鐵福田口岸站，轉搭地鐵4號線去深圳市其他地方。

相

落馬洲支線：上水站至古洞站地底隧道
上水至洲頭隧道地盤
落馬洲支線：上水站至古洞站地底隧道，鑽掘工程入口。
落馬洲支線盡頭
濕地觀賞儀
落馬洲站商店

車站

車站名稱	英文名稱	所在區域	車站接駁
港鐵支線－落馬洲支線
上水站	Sheung Shui	北區	（接駁東鐵綫）
古洞站	Kwu Tung	北區
洲頭站	Chau Tou	元朗區	北環綫
落馬洲站	Lok Ma Chau	元朗區	深圳地鐵 4號線、北環線

註：斜體係計劃緊嘅車站或轉乘路線，初期只有上水同埋落馬洲兩個車站。

參考

連出去

“香港鐵路網”網站 - 《將來 - 九鐵 - 落馬洲支線》

[1] ttp://mtr.com.hk/ch/customer/jp/index.php?sid=75&eid=78

[2] ttp://mtr.com.hk/ch/customer/jp/index.php?sid=64&eid=78

[1]

[2]