蜜蜂

蜜蜂
蜜蜂採花蜜
物種分類
界 (Regnum): 動物界 Animalia 門 (Phylum): 節肢動物門 Arthropoda 綱 (Classis): 昆蟲綱 Insecta 目 (ordo): 膜翅目 Hymenoptera 亞目 (Subordo): 細腰亞目 Apocrita 科 (familia): 蜜蜂科 Apidae
屬
獨棲蜂屬 熊蜂屬 蜜蜂屬 無蟄蜂屬

蜜蜂（拉丁學名：Apis mellifera）係蜂一種。呢隻昆蟲識飛，又係羣居，多數識食花粉、花蜜而釀蜂蜜，以餵初生蜜蜂。佢重曉用蠟起蜂巢，得以羣居。 蜜蜂係真核生物之中，唯一細胞有鐵礦物沉積現象。

蜜蜂源自亞洲同歐洲，由英國人同西班牙人帶到美洲。蜜蜂羣中，有蜂后、工蜂同埋雄蜂（Drone）三種，蜂后、工蜂都係雌蜂。一羣裏面，工蜂有一萬到十五萬，雄蜂有五百到千五，而蜂后通常得一隻，極少會有兩隻蜂后。雄蜂負責同蜂后生殖，蜂后負責產卵，維持蜂量。工蜂揾食，日做夜做，朝早採蜜、夜晚釀蜜，採蜜之時，同時為果樹傳播花粉，係農作物傳播花粉重要媒介。

蜜蜂主要天敵有胡蜂、蟾蜍、蛾、螟蟲以及其他食蟲動物。而瓦蟎亦會危害蜜蜂。

蜂后

蜂后，可以叫做蜂王，係蜜蜂羣入面，唯一可以正常產卵嘅雌蜂。蜂后死咗之後，工蜂就會產卵，因為都係未受精卵，就只可以發育成雄蜂。所以如果加唔番隻蜂后，成羣蜂都會死。

蜂后可以有幾年命，而雄蜂得幾個月，工蜂以採蜜季節來計，只得卌五日左右。蜂后係成羣蜂嘅阿媽，所以亦有人叫蜂后做母蜂。