跳去內容

順化

座標：16°28′0″N 107°35′0″E / 16.46667°N 107.58333°E / 16.46667; 107.58333
出自維基百科，自由嘅百科全書
(由化跳轉過嚟)

16°28′0″N 107°35′0″E / 16.46667°N 107.58333°E / 16.46667; 107.58333

越南 > 承天順化省 > 順化市
順化
Thành Phố Huế
順化
順化
----
簡稱：化
花名：詩夢之城（Thành phố thơ mộng／城庯詩夢）、神京之地（Đất Thần Kinh／𡐙神京）、詩處（Xứ thơ／處詩）
舊名：富春
國 越南
地域越南南中部
省承天順化
設市日2005年8月24號
設市等級第一類都市（Đô thị loại I）
市長武黎日（Võ Lê Nhật）
地理
總面積7168 km²
海拔15 m
人口
總人口(2015)35萬4124人[1]
人口密度4807人/km²
民族京族
官方語言越南文
時間
時區越南時區（UTC+7）
政區代碼236
網站： 順化市官方網站
Map
地圖
香江同錢場橋
跨過香江嘅錢場橋

順化（粵拼：seon6 faa3），全名順化市（越南文：Thành Phố Huế／城庯化），係越南中部位置嘅省直屬都市，係承天順化省嘅省會，面積7168平方公里，人口大約有35萬[1]。順化所屬埞方係越南中部沿海平原。順化喺古代叫做富春（fu3 ceon1；越南文：Phú Xuân／富春*/?）、順化（越南文：Thuận Hóa／順化*/?），而家喺越南語度叫做化（越南文：Huế／化*/?），但華文依然叫佢嘅舊名做「順化」。

順化係越南嘅國家級都市，歷史上曾經係西山朝同阮朝（1802年～1945年）嘅京城，係越南古都，以歷史古蹟著稱，保有好多歷史嘅紀念物、建築物。1993年，喺呢座城市嘅順化京城同順化皇城（順化歷史建築群）畀聯合國教科文組織列做世界文化遺產。現今，呢座城市係越南中部喺文化、政治、醫療、教育、遊歷、科學等等等等好多方面嘅中心。順化最出名嘅嘢係香江，同埋啲王朝時代留低嘅遺產，呢座城市有五項越南UNESCO名號：除咗順化故都遺蹟群體之外，仲有順化宮廷雅樂（2003年）、阮朝木版（2009年）、阮朝硃本（2014年）、順化宮庭建築上嘅詩文系統（2016年）。當中嘅雅樂係宮廷表演藝術，登錄爲無形文化遺產。

順化漢名嘅由來，出自14世紀陳朝設置嘅順州、化州[2]。呢兩個政區當中，攞佢哋頭字合成咗「順化」，呢個就係中文名嘅由來；順化城區所屬嘅係化州，隻「化」字嘅標準漢字音係hoá，由佢度訛轉，變成huế，座城市就喺越南文度噉樣稱呼做「化」[3][4][5]。喺法國殖民時代，訪問順化嘅外國人稱呼呢座城市係用佢嘅西文名Hue，按照自己語種嘅拼讀法來讀音[6]。

地理

[編輯]
香江

地理位置

[編輯]
順化京城地圖以及一啲遺蹟

佢位置喺越南中部，離首都河內540公里，距離越南最大都市胡志明市644公里。城市嘅北面同西面接住香茶市，南面接住香水市，東面接住香水市同埋富榮縣。佢座落喺香江下游嘅兩岸邊，香江流過市中央，蒲江流過北側，座城市喺海雲關嘅北面，離峴港105公里，離順安海門14公里，離富牌國際機場14公里，離真迷／雲腳（Chân Mây／蹎𩄲）深水港50公里。佢個海岸面向南中國海，離海岸約16公里，順化城喺內陸部嘅位置[3]，但離香江河口算近。

自然面積7168 km²，2012年人口約有34萬4581人[1]。計到2015年，城市人口增加到35萬4124人[1]。

順化埋近長山山脈（又叫安南山脈），佢個支脈圍住咗城市嘅背後[7]，個城區處於屬香江同蒲江下游區域嘅平原，高度中平，海拔約3～4米，最高15米[3]，經常畀洪水氾濫，當香江嘅源頭（喺長山山上）落咗中到大雨，洪峯就會來。平原區域相對平坦，雖然當中有啲丘崗、矮山錯雜，如御屏山、望景崗（Đồi Vọng Cảnh／𡑖望景）。個城市就係喺畀啲山丘圍住嘅沖積地上建立[7]。

順化夾住香江，分成咗舊城區同新城區，錢場橋、富春橋等橋連結咗新舊城區。9月到11月嘅雨季時，香江會水漲，新城區啲屋嘅一樓部分往往水浸[8]。1820年，圍住舊城區嘅城牆畀洪水沖冧，1904年，錢場橋亦畀襲擊城市嘅洪水沖走[9]。

順化嘅郊外有幾個並設宿泊設施嘅温泉[10][11]。

越南喺歷史、文化方面，北部同南部有各自唔同嘅進程經歷，北同南嘅劃分基準點就係呢個順化。喺現代，越南戰爭最大嘅流血戰鬥就係順化戰役，所以呢度係現代越南史嘅一大地標。

氣候

[編輯]

順化市相比北部同南部，氣候比較例外，因爲呢度氣候惡劣，同全省各處區域比都幾唔同。據哥本氣候分類，從氣候特徵講，順化屬熱帶季風氣候。枯水季自三月到八月，溫度幾高，個記錄約35～40℃（95～104℉）。雨季自八月到一月，自十月開始入汛期，係個經常發生洪水嘅時期。雨季平均溫度20℃（68℉），最低時個記錄有9℃（48℉）。春季自一月持續到二月底咁長[12]。

順化氣候平均數據
月份 1月 2月 3月 4月 5月 6月 7月 8月 9月 10月 11月 12月 全年
歷史最高温 °C（°F） 34
(93) 		36
(97) 		38
(100) 		40
(104) 		39
(102) 		40
(104) 		40
(104) 		40
(104) 		38
(100) 		35
(95) 		35
(95) 		32
(90) 		40
(104)
平均高温 °C（°F） 23
(73) 		24
(75) 		27
(81) 		30
(86) 		33
(91) 		34
(93) 		34
(93) 		34
(93) 		31
(88) 		28
(82) 		26
(79) 		23
(73) 		29
(84)
每日平均氣温 °C（°F） 20
(68) 		21
(70) 		23
(73) 		26
(79) 		28
(82) 		29
(84) 		29
(84) 		29
(84) 		27
(81) 		25
(77) 		23
(73) 		20
(68) 		25
(76.9)
平均低温 °C（°F） 17
(63) 		18
(64) 		20
(68) 		22
(72) 		23
(73) 		25
(77) 		25
(77) 		24
(75) 		23
(73) 		22
(72) 		20
(68) 		18
(64) 		21
(70)
歷史最低温 °C（°F） 8
(46) 		11
(52) 		12
(54) 		13
(55) 		17
(63) 		21
(70) 		20
(68) 		21
(70) 		18
(64) 		16
(61) 		12
(54) 		11
(52) 		8
(46)
平均降水量 mm（英寸） 180
(7.09) 		90
(3.54) 		60
(2.36) 		60
(2.36) 		80
(3.15) 		90
(3.54) 		50
(1.97) 		130
(5.12) 		500
(19.69) 		680
(26.77) 		640
(25.2) 		370
(14.57) 		2,930
(115.36)
平均相對濕度（%） 87 87 84 79 74 69 67 70 79 84 84 86 79.2
出處：Weatherbase

歷史

[編輯]

前史

[編輯]
順化京城圖畫（向上係北方），出自《大南一統志》
美國軍隊進攻入順化，發生喺戊申春節事件
春節攻勢時嘅順化

前111年，西漢設置咗日南郡，佢嘅首府所在地個位置推定喺順化嘅近郊[13]。

喺2世紀末建國嘅林邑（占婆王國嘅前身）嘅首都，推定存在喺順化附近[4]。林邑時代嘅順化係東南亞內陸物品向中國出口嘅船貨港口[14]。中國史料中出現嘅占婆地名「烏麗」、「烏里」，就推定係順化[15]。喺烏里有好多占族人喺度住[3]。制氏、潘氏等喺順化嘅占族世家喺之後京族化咗，喺順化都繼續維持名門嘅地位[3]。

順化

[編輯]

1306年，玄珍公主嫁畀占王制旻，就攞兩個州烏州同里州做聘禮。1307年，北越南嘅陳朝同占婆之間根據締結嘅婚約協定，將烏里割讓畀陳朝，陳英宗接管呢笪新地方，改稱爲順州同化州。1401年到1402年間，胡朝將紅河三角洲嘅住民搬去順化[2]。1407年胡朝畀大明滅亡，明朝支配咗越南，而陳朝淨低嘅王族（後陳朝）攞順化做據點，直到1413年仲繼續抵抗明朝[16]。將順州同化州結合一齊，起府名做順化，係屬明時實現嘅。到咗後黎朝，順州同化州合成順化，變成咗個省級行政單位。1558年阮潢入城之時，順化嘅京族化幾乎完成[3]。1604年，阮潢將屬順化鎮嘅奠磐縣劃出，升級成府，插入到廣南鎮。

富春

[編輯]

直到15世紀末，順化都不過係北越南政權同占婆王國嘅國境位置嘅都市[17]，但16世紀開始嘅南北對抗時代，順化做咗廣南阮氏嘅大本營，1636年完成咗富春都城。

先係1626年，爲咗準備對抗鄭氏中央，佛主阮福源搬去福安村，嗰度屬承天省廣田縣，改駐地成府。1636年，上主阮福瀾揀中金龍村，亦即而家嘅順化城，當時屬承天省香茶縣，揀呢度起駐府。1687年，義主阮福溙搬主府返富春村，嗰陣時屬香茶縣，到咗1712年，明主阮福淍搬駐府返承天嘅廣田縣博望村，做新駐府。直到1738年武王阮福濶繼位掌權，主府先至返番去富春嘅位置，自此安定，一直到失守嗰日落入鄭氏軍手中[18]。

喺廣南阮氏嘅時代，順化係南中國海貿易嘅中心地，因而繁盛[19]。順化轄區喺阮主時（17～18世紀）係笪細長嘅土地，自橫山關南邊到海雲關[18]。到咗西山王朝嘅叛亂時代，1774年鄭主佔領順化，1786年西山阮氏嘅阮惠（阮文惠）攻佔順化。以順化做根據地，阮惠稱做北平王，支配咗從廣平省到海雲關咁大嘅地域[20]。

地名「化」嘅出現

[編輯]

現今未有任何資料來源嚟肯定越南話地名「化（Huế）」係幾時正式出現，下面係一啲資料：

  • 黎聖宗可能係提到「化」地名嘅第一人，出自佢嘅喃字詩文《十誡孤魂國語文》。當中有句：「奇楠沉香，玳瑁殼璋。安息髻，胡椒圍；老撾金，順化[註 1]米；糧船尋載漲艙歸。」[註 2][22]
  • 除咗《國朝正編撮要（中文：国朝史撮要）》之外，啲舊嘅史學材料講到順化時，都係用「富春」或「京都」、「京」嘅名，唔會用「化」嘅名[23]。
  • 書《越南史略》係陳仲金寫嘅，係越南頭部用國語字寫嘅史書，傳統史料來源之外，作者亦使用源自西方嘅史料，「化（Huế）」嘅名出現喺書中[24]。
  • 喺丕耶·普華和（Pierre Poivre）嘅回憶錄，呢個法國商人喺1749年來到富春，順化個名出現咗幾次，個完整嘅樣係Hué[25]。
  • 1787年，勒·佛羅舒·德·拉·卡喜耶（Le Floch de la Carrière）畫咗幅塘中沿海版圖畀法國海軍部，地圖當中順化都城畫得幾明白，順化個名記成咗如同之後法國人經常寫嘅樣：HUÉ[26]。
  • 有封信寫喺1789年7月15號嘅西貢，寫信人係奧李維·德·飄那美（Olivier de Puynamel），寄畀澳門嘅黎圖多（Létodal），封信兩次提到順化，講到呢笪埞嘅情形時，都係叫Hué[27]。

阮朝

[編輯]
法國都督孤拔（法文：Amédée Courbet），1883年喺順化
1967年影嘅順化空中拍攝

順化喺19世紀到20世紀時係阮朝嘅首都，係個統治咗越南南部全域嘅集權王朝，因而開始發達。鄭森喺1775年佔領呢度，個都市名仲叫富春。1801年阮福暎征服咗順化；1802年嘉隆帝阮福暎建立阮朝，受讓渡得到越南全域嘅統治權，統一咗越南後，順化做咗國家全體嘅首都。定都時名叫富春，之後嘅正名叫京師[28]。定都同時設廣德營，做包住京城附近嘅埞方。嘉隆帝基於和邦（Vauban）樣式，計劃建設有住星形城郭嘅王城[3]，1805年，將安置喺嘉定嘅太和殿搬去順化，開始建造皇宮[29]。阮朝時代嘅順化融合咗南北，當中北越南培育嘅文化有住強烈嘅中國元素，而南越南有占婆文化，順化就攞咗呢兩種元素發展自己[30]。

明命帝繼位後，改廣德營成承天府。喺1831年～1832年嘅行政改革中，啲大政區如營、鎮都改成省，直屬朝廷。唯有承天府由於個位置喺京師，所以得府級，但有住同省級平級嘅地位。阮朝第四代嘅嗣德帝知名於編纂廣南阮氏嘅正史《大南實錄正編》，此外佢仲大大噉搞建築事業，現存嘅市內皇宮及郊外嘅帝陵都係佢整備嘅。

1883年，順化畀法國佔領，喺當地締結咗兩次條約（法文：Traité de Hué）。第二次順化條約（越南文：Hòa ước Giáp Thân (1884)）（帕特挪托條約）簽訂後，越南做咗法國嘅保護國，但之後阮朝嘅皇帝直到二戰末期都仲繼續住喺順化嘅宮殿[3]。

以後直到1945年順化都一直係越南嘅首都。1945年，越南八月革命，越盟力量爭得全國政權，8月24號，阮朝末代皇帝保大宣告退位，離開順化，阮朝滅亡。共產政府起錨，立政權越南民主共和國，河內升格爲首都。而皇帝做咗新政府嘅顧問。自此，順化冇咗京都地位。一段流亡時間後，1949年，舊皇保大同親法人士合作，返去越南，喺法國殖民勢力嘅幫手下試圖復辟，宣佈自己係「越南國國長」，但呢陣時皇帝唔揀順化，而揀咗喺西貢做都城去建立政府[31]。共產主義者同埋全體越南國民都反對皇帝嘅復辟。所以，越南國只喺名義上存在，而保大國長亦幾乎大部分時間住喺大叻。佢亦都好少返去順化故都，因爲呢度經常出現法國軍隊同越南共產力量之間嘅惡劣爭鬥。

順化市

[編輯]

到咗法屬時期開頭，「化」係個指京城嘅民間稱呼。到19世紀末，相比北圻同南圻，順化呢處埞方、乃至成個中圻都係笪工商業經濟發展遲緩嘅地方。解決辦法之一係積極應承促進設立都市行政區嘅要求。所以殖民政權搞動作，想加快呢度嘅都市化過程。

成泰十年九月初六（1898年10月20號），喺中圻欽使布羅舍（Boulloché）嘅批閱同指導下，順化朝廷機密院呈詞畀成泰，話「中圻欽使同機密院都認爲有必要，要喺呢度設立一個都市」，要求皇帝頒令[32]。

直到成泰十一年六月初五（1899年7月12號），成泰帝頒咗諭旨[註 3]，公佈成立順化市（Centre urbain de Hué；thị xã Huế／市社化）[33]，確立咗京城界線，包埋咗啲京城附近埞方，劃入咗香江南岸啲埞，即係拍住今日嘅黎利路，自站橋（cầu Ga）去到石壩（Đập Đá／𡏽𥒥）咁大。7月13號，中圻欽使布羅舍批閱成泰帝諭，呢個諭喺8月30號得到印支總督批准，決定成立順化市（共五座城市一齊成立）[34]。自此，地名「化」變成正式地名，直到今時今日。

之後幾年，順化市按照啲諭旨三次擴張香江以南嘅界線，分別係1903年6月22號嘅成泰帝諭、1908年5月9號嘅維新帝諭、1921年11月21號嘅啟定帝諭。呢陣時，順化市分成九個坊，有：第一坊（今日嘅富和坊）、第二坊（今日嘅富平坊）、第三坊（今日富順坊一部分）、第四坊（今日富順坊一部分）、第五坊（今日嘅富吉坊）、第六坊（今日富協坊一部分）、第七坊（今日富協坊一部分加埋富厚坊）、第八坊（合埋今日嘅永寧坊、富潤坊、富會坊）、第九坊（合埋今日嘅長安坊、坊德坊）。雖然係噉，呢個劃分只係得個名義，因爲順化京城外咁大笪埞，仲有住喺呢啲地方嘅居民，本來屬當地嘅村，呢啲村分屬香茶、香水、富榮三個縣，嗰陣時呢啲地方事實上由呢啲縣管轄。

直到1929年12月12號，前任中圻欽使、時任印支總督丕耶·帕斯奇決定批認順化市做三類都市（Commune de Hué），同時確立城市行政部門嘅阿頭係位督理，由駐喺承天府嘅法國公使兼任，負責每件行政管治嘅公務。督理嘅助手係副督理，同時係副公使。另外仲成立個市議會，亦由法國人督理做主席。1933年，保大發41號敕令，批准順化市管理運行嘅整頓工作。城市領頭職名叫做邦佐，喺越南人官吏品銜中同知縣平級，但實際上，件件事仲係附屬督理嘅，亦即承天嘅法國公使。

自1935年開始，順化市先正式變成獨立嘅行政單位，唔再撈亂同香茶、香水縣嘅地界；屬各坊嘅任何土地都插入到城市管理。到嗰陣時，喺城內，即京城區域（除咗大內），夾埋有10坊：西祿、西靈（Tây Linh）、忠厚（Trung Hậu）、富仁（Phú Nhơn）、永安（Vĩnh An）、泰澤（Thái Trạch）、忠績（Trung Tích）、惠安（Huệ An）、順吉（Thuận Cát）、知務（Tri Vụ）。京城之外同香江以南有11坊，有：富平、富盛（Phú Thịnh）、富會、富永（Phú Vĩnh）、富寧、富吉、富美（Phú Mỹ）、富壽、富厚。順化市總共有21個坊。

所以，自1929年到1945年，承天順化地區喺嗰陣時同時有三個行政組織：京師由朝廷嘅京城提督看住，承天府有府尹管治，順化市嘅阿頭市督理由喺承天嘅法國公使兼任。實際上，除咗京城區域，喺承天嘅法國公使先係事實上嘅統治者，掌管住承天全府嘅行政治理。

順化市（地方直轄）

[編輯]
順化人口
考察年 人口
1955年 9萬3236[35]
1967年 10萬3563[36]
1972年 19萬8064[35]

宣佈獨立後（1945年9月2號），越南民主共和國臨時政府開始去健全國家管理部門，整頓全國嘅行政單位。1945年12月21號，越南臨時政府主席發77號敕令，規定河內、海防、南定、榮市、順化、峴港、大叻、西貢都升做地方直轄市（thành phố/城庯）。河內市直接畀中央政府管，而其他市都屬各圻管。喺每個市設啲機關，有市人民議會、市行政委員會、區行政委員會……1946年頭，越南政府解散咗個政區架構，如州、郡、府、總；成立四級政權，從部到省市、縣、社（圻呢級廢咗，併入部級）。

越南戰爭

[編輯]

越南戰爭當時，順化中心城市個位置離北越同南越嘅邊界區域好近，有住好重要嘅要塞地位，但亦令佢處於好易被進攻嘅位置。順化喺條邊界嘅南邊，即係佢屬南越（1955年到1975年嘅階段）。成立咗南越政府、頒行憲法後，吳廷琰總統進行咗自中央到基礎嘅行政部門建設，同時進行各地方嘅行政改組。按1956年10月24號南越政府第57A號諭嘅精神，順化市係同承天省平級嘅政區，但承天嘅省城就係順化。呢個政區建置只存在到1975年。

順化城全景（香江南岸）

1963年，因爲吳廷琰政權打壓民主化、兼打擊傳統嘅佛教，天姥寺（越南文：Chùa Thiên Mụ）嘅釋廣德、慈曇寺嘅釋逍遙呢班僧侶抗議佢，仲自焚自殺添[37]。

1968年正月大攻勢時，呢度發生順化戰役，戰鬥開展喺1月31號到2月24號，呢座都市受到物理上嚴重嘅損害，而且佢啲名勝亦損傷咗，受到嘅破壞好巨大[38]。有住好高歷史價值嘅建築物畀美軍加以炮擊，啲歷史嘅遺物同遺蹟受到相當徹底嘅破壞。另一方面，共產主義勢力亦製造咗惡名昭著嘅順化屠殺（越南文：Thảm sát Huế Tết Mậu Thân），喺呢場春節包圍戰中，有2800人嘅官吏、警官、教師、學生畀南越南解放民族陣線嘅士兵殺害[39]。

戰後至今

[編輯]
順化大內嘅太和殿
太和殿內嘅金座

戰爭終結後嘅相當期間內，以「封建時代嘅遺產」嘅理由，當局對歷史遺蹟嘅復原冇到關心，好長時間都棄置啲遺蹟。後來越南政府改革，通過咗啲新政策，啲中世王朝嘅遺蹟復原有啲完成作業，有啲喺進行階段，攞到進展。

1975年後，順化市揀做平治天嘅省城，轄下12坊：富安、富吉、富厚、富協、富和、富順、西祿、順和、順祿、順城、永利、永寧，仲有6個社：香流、水富、水福、水長、水春、春龍。

1979年3月13號，富安坊併入到富吉坊[40]。1981年9月11號，順化市擴張地界，將香田縣嘅社插入順化，有：香海、香風、香榮、香龍、香湖、香平、香壽（除咗陽和村合入香富縣）、香渚社一部分（xã Hương Chữ；有呢啲村：清渚<Thanh Chữ>、古彪、本池、本譜、安流）；又插入香富縣呢啲社：水平、水瓢、水安、水陽、富尚、富陽、富茂、富清、富新、水雲社嘅一部分（有村：水牛洲<Cồn Trâu>、古城、檳榔園<Vườn Trầu>、同甲）。順化市擴大到包括呢啲坊：順城、順祿、順和、西祿、富順、富和、富吉、富協、永利、永寧；有呢啲社：水長、水福、水春、春龍、香海、香風、香榮、香初、香龍、香平、香壽、水平、水瓢、水安、水陽、富尚、富陽、富茂、富清、富新、水富（包括成個同甲村）、香流（包括村：水牛洲、古城）、香湖（包括村：清渚、古彪、安流、本池、本譜）[41]。

順化大內

1981年9月17號，分香湖社成兩個社：香湖同香安[42]。1983年1月6號，分香海社成兩個社：順安同海陽；喺平田新經濟區成立兩個社平田同平成；分富順坊成兩個坊：富順同富平；分一份永利坊同水安社成立安舊坊；分一份永寧坊同水春社成立坊德坊；改春龍社成金龍坊；改香流社成葦野坊；改水富社成春富坊；改水福社成福永坊；改水長社成長安坊[43]。

1988年底，順化市有19個坊：安舊、金龍、富平、富吉、富厚、富協、富和、富順、福永、坊德、西祿、順和、順祿、順城、長安、葦野、永利、永寧、春富；有22個社：平田、平成、海陽、香安、香平、香湖、香龍、香風、香初、香壽、香榮、富陽、富茂、富新、富清、富尚、順安、水安、水平、水瓢、水陽、水春。

1989年6月30號，拆咗平治天省後，順化做咗承天順化省嘅省城[44]。1990年9月29號，水平、水陽兩個社轉畀香水縣（而家香水市）管理；富尚、富陽、富茂、富清、富新、順安六個社轉畀富榮縣管理；平成、平田、香平、香湖、香安、香榮、香壽、香風、海陽九個社轉畀香茶縣（而家香茶市）管理。順化市淨返19個坊（安舊、金龍、富平、富吉、富厚、富協、富和、富順、福永、坊德、西祿、順和、順祿、順城、長安、葦野、永利、永寧、春富）同埋5個社（香龍、香初、水安、水瓢、水春）。1992年9月24號，越南總理頒行355-CT決定，批准順化市升做二類都市[45]。

香江，近景處係富春橋，遠啲嘅係白虎橋

1995年11月20號，永利坊拆成兩個坊：富會同富潤。2005年8月24號，越南政府頒行209/2005/QĐ-TTG號決定，據此順化市從二類都市升做一類都市，但唔直屬於中央，而直屬於承天順化省[46]。2007年3月27號，香初社拆成兩個坊：安和、香初；水安社拆成兩個坊：安東、安西[47]。

2007年8月30號，越南政府總理批閱提案後頒發咗143/2007/QĐ-TTg號決定，要將順化建立成「節假城市」（thành phố Festival）[48]。據此，提案嘅目標係建設有國家同國際地位嘅節假城市，兼要有越南特色；而順化作爲旅遊城市，可以同節假城市嘅定位和諧結合，成爲發展經濟嘅動力，喺承天順化省嘅經濟社會發展過程中，希望能夠得力噉變成中部重點經濟區。爲咗實現提案，除咗原先中央喺當地嘅項目投資呢個來源之外，每年嘅中央預算會資助一啲緊要工程，來實現建立節假城市嘅目標。

順化批認咗做一類都市後，2009年5月25號，政治部X課發出咗第48-KL/TW號結論，叫《2020年建設、發展承天順化省及順化都市》（Xây dựng, phát triển tỉnh Thừa Thiên Huế và đô thị Huế đến năm 2020/𡏦𥩯、發展省承天化吧都市化𦤾𢆥2020），當中標明咗方向：「喺即將數年內將承天順化建設成直轄市，去做越南中部區域嘅中心，係國內文化、旅遊方面嘅特色大核心之一，亦係科學、工藝、精專醫學、教育培訓嘅中心，多行業、多領域都質量高。」到2020年，承天順化致力於逐步成爲國家級、區域級、國際級嘅中心都市，喺國內乃至喺東南亞區域內各國都係經濟、文化、科技、醫療、教育深造嘅中心之一[49]。

2010年3月25號，有三個社（香龍、水春、水瓢）轉做同名嘅三個坊[50]。

人口

[編輯]
1956年 1968年 1989年 1994年 1996年 2005年
人口 9萬5000[4] 15萬6000[7] 21萬1000[51] 27萬4102[30] 28萬6000[5] 30萬5000[3]

經濟

[編輯]
1969年，東巴市場起工
今時嘅東巴市場內部

順化嘅城市經濟主要發展喺旅遊行業。象牙精雕、玻璃細工係順化嘅特產[4]。另外，呢座城市仲有生產精米、製材、纖維、石屎工業[52]。2016年工業、小手工業嘅產出情形維持喺穩定；地方上嘅工業、小手工業生產總值約達65億2百萬越南盾，同期增長咗13%。啲重點行業如紡織、皮鞋仲守住幾快嘅增長速度，出口達到高增長。消費方面，省內繼續維持消費穩定。

作爲順化廚房而知名嘅東巴市場（chợ Đông Ba／𢄂東巴）係石屎造嘅二層建築樓，一樓係販賣雜貨同生鮮食品，二樓係賣衫嘅[53]。1986年嘅颱風一度吹冧咗東巴市場，之後重建[53]。東巴市場前面嘅陳興道路有好多商店，飲食店、電子產品店、雜貨舖等店舖一排連住[54]。

除咗東巴市場外，順化仲有幾多大型商貿中心，佢哋座落喺香江兩邊，如西祿市場、安舊市場。商貿市場之外，仲有超市，如Coop Mart、Big C、Vincom、The Manor Crown、阮金（Nguyễn Kim）。

而家佢嘅城市地方上形成咗一啲高級城區，亦有一啲新嘅都市區起緊，如安東別墅區、安舊別墅區、富美安都市區（khu đô thị Phú Mỹ An）、The Manor Crown。

政區

[編輯]
順化嘅人民委員會嘅辦公處

順化下轄27個坊，坊係越南設喺城市嘅政區，相當於中國嘅街道。越南有六個省直屬市係只有坊而冇社，順化係其中之一，現時佢亦係坊數第二多嘅省直屬市（排喺同奈省嘅邊和之後，邊和有29個坊）。

遊埠

[編輯]
午門

順化嘅市區同埋郊外殘留住阮朝時代嘅皇宮、皇帝廟、佛教寺院，保留咗多數遺蹟，當中嘅一部分作爲「順化建造物群」登錄做UNESCO嘅世界遺產（文化遺產）。

順化皇宮

[編輯]
内文：順化皇城
皇宮平面圖

最吸引遊客嘅觀光地係順化皇宮，同埋鄰近嘅皇帝御苑、廟。香江穿過順化全體，佢嘅北面地域係舊街區，呢度有住大部分嘅遺蹟。阮朝皇帝住喺城中，係個畀城牆圍住嘅巨大空間。喺呢個城裏頭嘅皇宮係越南嘅紫禁城，只有皇帝同佢啲后妃、以及佢哋嘅親信可以接近呢度，隨便入去嘅人會判死刑。而家順化爲咗維持佢歷史觀光地嘅地位，努力進行緊啲重建，今日禁止入去嘅埞方幾乎冇嘅。

從1802年到1945年，呢個阮朝皇宮歷經13代皇帝，係個畀城牆圍住嘅要塞兼宮殿。圍住皇宮庭院嘅城牆各有約兩公里長、五米高，呢埲城牆之外，仲有一條護城河圍住。護城河嘅水貫通自流經順化嘅香江。呢種構造物叫做城寨（英文：Citadel）。喺城寨之內，皇宮構築咗近乎2.5公里嘅防禦綫[55]。而守住皇宮地域本身個圍牆東西兩邊長604米，南北兩邊長622米，高4米，厚1米[56]。圍牆之外有條金水河，水量可以用四面嘅水門來調節[57]。皇宮建造物嘅上部用咗好多陶瓷同埋玻璃嘅碎片做裝飾，呢啲裝飾就認爲意圖防範邪靈嘅侵入[58]。灰泥用來固定屋頂瓦片，亦使用做建築裝飾。皇宮建築物係阮朝建築嘅代表，其中一點特徵係將兩棟建築嘅屋頂結合一齊，連成一間建築，來作出寬廣嘅空間[59]。呢兩棟建築嘅屋頂之間設有用來流走雨水嘅溝（排水槽），但越南嘅暴雨集中起上來，啲排水槽亦幾難處理啲雨水，有漏水、木材腐蝕嘅問題[59]。

皇宮嘅正門稱呼做午門，個設計係爲咗令太陽喺正午時來到門嘅正頂上[60]。午門度有幾個入口，中央嘅入口係皇帝專用嘅通道[60][61]。家下中央嘅入口用鐵欄封閉鎖起，唔准再使用[61]。1834年午門完成，喺門上起咗兩層嘅木造建築，有五間望樓，叫做五鳳樓[60]，喺建設當初，五鳳樓上貼咗金箔[61]。後來午門畀白蟻蛀，受到幾大嘅損害，但UNESCO來做咗修復工作，又有日本嘅援助，預防門崩塌嘅對策已經實施咗[62]。順化皇宮午門個設計就係以北京紫禁城嘅午門做原本[19][63]。

大概啲觀光客入場後，可以登上皇宮正門，即係南門嘅樓閣度，可以喺嗰度一眼望曬皇宮全體[55]。過咗午門，會出現條畀左右兩個掖池夾住嘅道路。池嘅左側所設嘅空間係用來飼養畀皇帝騎乘嘅象同馬，而右側嘅空間建做兵舍[5]。對住南門正面，係皇宮嘅中心地方，嗰度有模仿咗中國紫禁城個款嘅太和殿，係阮朝嘅政治中心。太和殿嘅大細係打豎長30.5米、打橫闊44米、高11.8米[60]。太和殿嘅屋頂、柱、玉座都用皇帝嘅象徵龍來裝點[64]。1968年太和殿捲入戰火漩渦，完全摧毀，到1970年先重建[61]。太和殿嘅空間闊迾廣大，佢嘅中央度有畀皇帝坐嘅凳，張凳張貼咗金箔，安置喺臺座上。

皇宮其他建築物

[編輯]

太和殿左邊係太廟，右邊係世廟，係供奉各個皇帝靈牌嘅寺院，當中現存嘅緊要古蹟係顯臨閣。顯臨閣喺世廟，建立喺太和殿西面，座廟祭祀住歷代皇帝同皇后。喺顯臨閣嘅庭院度，放置住九隻鼎，表徵住阮朝統治下嘅越南統一[65]。啲鼎度刻住歷代皇帝嘅名仲有越南各地嘅四季風景[66]，中間最大嘅鼎供奉畀嘉隆帝[65]。順化建造物中，顯臨閣嘅保存狀態算係比較良好，1947年法國再登陸時，呢度受咗啲損害，但亦修復咗[67]。

太和殿嘅後方安置住畀牆圍起嘅紫禁城，有皇族嘅邸宅，係個爲皇帝而起嘅圍城。而且佢嘅名稱亦係出自中國嘅紫禁城。除咗名一樣，宮廷入面好多宮殿同門亦係似紫禁城。紫禁城係阮朝皇族嘅根據地[55]。

長生宮、延壽宮，係1803年時嘉隆帝爲母后而建嘅居所[68][69]。入面曾經裝有中國式嘅燈籠，但由於戰爭同盜賊，啲嘢都破損咗，而家見到嘅嘢係替換過嘅[68][69]。

閱是堂，曾經係皇族鑑賞雅樂嘅劇場，而家係復原後嘅建築物。而家呢度上演宮廷音樂同宮廷舞蹈嘅演出。

右廡、左廡，宿衛嘅高級官僚嘅值班室。而家右廡做咗展示室，展示皇宮使用嘅生活用品，而左廡用做紀念攝影所。

而喺皇城之外，亦有啲行宮別苑。安定宮，係啟定帝作爲離宮用嘅建築物。直到保大帝即位，都用做皇帝嘅居所。

舊街區

[編輯]

畀城牆圍住嘅舊街區保留咗傳統，仲留存住以前嘅樣，喺1993年指定爲UNESCO世界文化遺產[70]。城市嘅南部地域（新街區）有好多係新開發地域，係居住區同商業據點。喺舊時，香江北岸（左岸）嘅舊市區（京師）住嘅係阮朝嘅官僚同庶民，南岸（右岸）嘅新市區安置嘅係法國人居住區[3]。北面嘅舊市區有皇宮同市中心，官廳、學校、病院都建喺南側[71]。另外，酒店亦都集中建喺新市區[54]。

舊市區畀城牆圍住，基本上係目字形嘅方形都市，佢嘅南側係更加畀城牆同護城河包圍嘅皇宮。順化建立嘅阮朝建造物群入便，係中國式嘅建築樣式融合啲巴洛克建築同埋越南傳統建築，呢三點構成佢哋嘅特徵[72]。觀光客可以坐船順住香江往下，參觀沿住條江而建嘅名勝[73]。

圍住順化舊市區嘅城牆係由法國留學歸國嘅建築家黎文學（Lê Văn Học）設計嘅。城牆內部嘅建築模仿北京王城嘅形式[4][29]，而安置裏頭嘅皇宮縮細到北京紫禁城嘅四分之三[57]。所以，順化皇宮畀人叫做中國皇宮嘅模型[74]。皇宮嘅東側，安置有國子監同埋六部嘅官廳[57]。而家，皇宮由順化遺蹟保存中心管理[3]。

城牆單邊長2.2公里，高6.6米，厚21米，以及喺以外掘咗條護城河[29]。城牆度有11洞門[4][75]，建設城牆時，收集咗各地嘅瓦、木材，動員咗三萬人[29]。佢係法國式嘅星形城郭，稱呼做和邦樣式。1968年春節攻勢時，南越南解放民族戰線同北越軍大肆襲擊舊城區，令順化捲入戰火，但城牆頂住咗攻擊[75]。城牆嘅外邊，築有平臺鎮（越南文：Trấn Bình đài）、海城鎮（越南文：Trấn Hải Thành）等寨，用來監視香江嘅通行，爲咗令呢啲寨抵禦到河嘅風波同颱風，而整成彈丸形[56]。城牆之內建築物嘅配置採用咗風水學說[3]，皇宮同埋南面陵墓嘅營造係聽從咗從中國招聘嘅風水師嘅意見[64]。

喺皇宮嘅南側，有用作瞭望臺嘅旗臺。臺座高17.4米，到旗杆頂高達29.59米[68]。旗臺因爲越南戰爭同天災受害，而幾度受到破壞，而家嘅樣係1969年再建嘅[68][69]。旗臺嘅左右放置咗九門大炮，右側嘅四門大炮代表四季，左側嘅五門大炮代表五行思想[76]。呢啲大炮從未實際使用過，啲人認爲佢哋有靈力，起到守護皇宮嘅作用[77]。

遺蹟同皇陵

[編輯]
啟定皇陵
啟定皇陵
啟定皇陵內部
嗣德皇陵

順化除咗內部，喺郊外亦有幾多遺蹟存在[3]。喺舊城區嘅對岸，有直徑約20米嘅虎園，係座磚砌嘅圓形鬥獸場，建喺占人嘅遺蹟上[78]。虎園係1831年由明命帝（在位：1820年～1841年）命令營造嘅，起來喺入面舉行象同虎嘅鬥獸。喺虎園鬥獸嘅象係權力或正義嘅象徵，虎係敵對者嘅象徵，虎嘅牙同前腳嘅爪喺事前掹咗、斬咗，來令場鬥獸有利於象呢一方[78]。至於起虎園嘅理由，就冇確定講法，有話係依據儒教思想來誇示皇帝權力，有話係京族想強調對原住民嘅支配，有幾多理由可以舉出[78]。

大略沿住香江上游，順化外郭南邊嘅郊外包含咗無數遺蹟，嗌做南郊壇，係片丘陵，建有明命皇帝、嗣德皇帝、啟定皇帝等阮朝歷代皇帝嘅墓地，係處緊要嘅紀念埞方。喺原先，啲皇帝陵墓嘅佔地面積係冇明確嘅，阮朝最後嘅皇帝保大帝（在位：1925年～1945年）劃定咗陵墓嘅範圍[62]。

阮朝第二代皇帝明命帝嘅陵墓做咗公園，係市民可以休閒嘅場所[57]。皇帝仲在世時就訂立咗建設計劃，個明命帝陵，佢嘅構造活用咗自然地形[79]。明命皇帝陵嘅內外部裝飾好靚[80]，係皇陵中數一數二嘅。入咗入口，入眼嘅係彎月形嘅人工湖，爲皇帝嘅功德碑而起嘅亭嘅下面係個中庭，兩邊並列襯住啲文武石（啲官吏嘅石像）同埋動物模樣嘅石像[55]，諸如象、馬，呢啲石像作來係爲咗守護死者嘅靈魂[81]。陵墓內除咗有明命帝嘅陵廟外，仲設有收納咗皇帝同皇后靈位嘅崇恩殿、荷花池等建築物。雨季時因爲場地內嘅水會流入池塘，所以會用水門來調節池嘅水量[79]。洪水同埋打颱風之際，呢度會經常入水，圍牆外同場地內嘅松樹會因而損害[79]。明命帝嘅陵廟起喺座細嘅矮丘上，但佢嘅遺體冇埋葬落陵墓度，冇透露實際嘅埋葬場所[81]。

紹治帝（在位：1840年～1847年）嘅陵廟比較細，而冇按皇帝本人所希望噉設立院牆[73]。

嗣德帝（在位：1847年～1883年）嘅陵廟係個中國樣式嘅建築，原本設計係間皇家別苑，嗣德帝死後就改建做墓所。場地中央有個大湖，仲有個坐船仔嘅埞方，嗣德帝在位嗰陣就愛來遊船河同埋釣魚。

啟定帝（在位：1916年～1925年）嘅皇陵係阮朝最後嘅皇陵，喺1931年完成。座皇陵混合咗越南同歐洲嘅建築樣式[82]，構造特別；而佢嘅裝飾可以見到有巴洛克風格嘅影響[83]，石屎石像整到類似歐洲人個樣。喺內部嘅玉座，有啟定皇帝嘅等身像，用青銅整，上面黐咗金箔，而玉座嘅下面約九米處安置住皇帝嘅屍身[55][82]。同時喺陵廟內部嘅牆壁同埋天花度攞瓷器、玻璃來裝飾[82]。唔單止巴洛克風格，仲可以見到佛教寺院、印度教廟、基督教堂嘅特色，東西方款式交融[82]。

而至於創立咗阮朝嘅嘉隆帝（在位：1802年～1819年），佢嘅陵墓就處於荒廢狀態[74][82]。同其他皇陵唔同，佢嘅構成從自然地形中產生[82]。嘉隆帝嘅皇陵喺最南嘅位置，有嘅面積約係其他陵墓嘅五倍[84]。陵墓嘅區域分成三部分，前便嘅區域有記住嘉隆帝事蹟嘅石碑，中央嘅區域放置住牌位同埋拜祭設施，最入面嘅區域埋葬住嘉隆帝嘅遺體[84]。

寺廟、教堂

[編輯]
天姥寺
順化大教堂

順化城市建有好多寺院，號稱有上百間佛寺[85]。順化咁多佛寺之中，天姥寺係特別有名嘅[4][86]，呢座寺院喺江邊，建立喺占人所造嘅磚石崗丘上[5]，離市中心嘅距離唔遠，係順化最大嘅寺院，亦係呢座都市嘅官方象徵。棟喺天姥寺內嘅石碑，安置喺贔屓石像（形象似龜）嘅背甲上，記載住一節佛典、皇帝嘅事蹟、寺院嘅建立年[87]。天姥寺嘅側邊建有慈仁塔，係高約21米嘅風水塔，塔嘅各層都安置住佛像[87]。佛堂大殿嘅內側，嗰度展示住自焚抗議嘅釋廣德喺生前使用嘅奧斯汀A95[88]。另外，仲有1674年建立嘅報國寺[10]。

1959年受美國援助，建立咗順化大教堂（聖瑪麗亞救世堂）[10]。順化大教堂喺歐洲天主堂建築嘅基礎上加入咗越南嘅傳統建築樣式，係東西方融合嘅知名建築物[10]。而建喺香江沿岸嘅玉盞山祠（呢個係漢文名，越文名叫Điện Hòn Chén／殿𪢰盞），原先係占人祭祀波那加（Po Nagar）女神嘅場所[89]。

屋宅

[編輯]

順化傳統屋宅嘅建築樣式係種正方形嘅民居，個樑榫結構相對簡單啲，叫做燴屋（rọi／燴），再由燴屋發展出複雜樑榫結構嘅樑屋（rường／樑）同埋起喺街邊嘅舖屋（phố／舖），順化就分有呢三個種類嘅屋[90]。燴屋嘅建築樣式推測係越南中部嘅住宅原型，除咗用做庶民嘅家宅，亦採用做皇族女性嘅住居[91]。宮殿同傳統嘅住宅架構基本係同一構造，所以宮殿有時又叫做「大屋」[92]。

樑屋中有種附帶庭院嘅邸宅，稱呼做園宅（nhà vườn／家園）[93]，喺舊底係舊貴族、皇族、高級官僚嘅住所[94]。啲園宅雖則細，但建造豪華，特徵係附隨間屋嘅庭園有闊迾嘅面積[94]，而個庭園通常設置喺主屋嘅南側[93]。庭院度會設玄關、塘、假山、蓮池、盆栽、井等。庭院隨處植有樹木同花，營造樹蔭，除咗有視覺嘅愉悅，亦可以做畀祖先嘅供品[95]。啲庭院通常用做演奏琵琶、箏呢啲傳統樂器嘅場所，或者做練習武術嘅場地，但亦都有啲屋東將佢改建成咖啡館、卡拉OK店[96]。

其他

[編輯]

喺黎直路3號嘅順化宮殿博物館保存咗阮朝好多多樣嘅遺物。展覽館係傳統屋嘅樣，入面展示咗喺宮廷使用過嘅物件、以及外國送嘅禮物等，仲有個構成嘅庭院展示住鐵製、石製嘅展示品[97]。順化係越南中部最特別、最唔尋常嘅埞方。越南有名嘅人多數一唔係出生喺呢度，一唔係喺順化逗留過。

世界遺產登錄歷程

[編輯]

雖然19世紀時，由於法國嘅攻擊令順化受到損害，但市區嘅建築物直到20世紀中葉都仲保持住無損嘅樣[98]。不過，1946年開打嘅第一次印支戰爭破壞咗皇宮嘅主要建築，1960年代嘅越南戰爭就令順化嘅建造物受到非常之大嘅損害[98]。越戰令皇宮約80%嘅部分燒到冇晒[19]，得番午門、太和殿、顯臨閣呢啲少數建築留低[98]。皇宮度仲殘留住彈痕[99]，喺戰後嘅重建期間，啲遺蹟中所使用嘅石材畀一啲居民偷去起屋用[58]。

1978年秋季開嘅UNESCO大會通過咗「搶救順化遺蹟國際運動」項目，但同年12月，由於越南軍攻入柬埔寨（越南文：Chiến tranh biên giới Tây Nam），因此得唔到國際輿論嘅助力[100]。1984年開始，越南政府推進文化遺產保護運動，1988年，順化嘅建造物群指定做「有歷史重要性嘅紀念物」[101]。同樣喺1988年嘅12月，日本嘅東方史學者山本達郎向佢本國嘅外務省傳達話順化皇宮午門嘅保存狀況陷入危機狀態，呼籲保護遺蹟[102]。當時上智大學亞洲文化研究所嘅文化遺產調查團去咗東南亞各國視察緊，佢哋應外務省嘅邀請，改咗預定行程，1989年去咗越南視察，然後報告遺蹟嘅狀況[102]。調查團訪問完後，河內嘅文化部召集咗政府、UNESCO、順化本地嘅有關人士開咗場「搶救順化遺蹟國際運動」嘅工作會議。工作會議上，順化呢邊嘅出席者報告話由於越南嚴酷嘅氣候同天災、加埋越南戰爭嘅傷害，令遺蹟嘅損傷進一步加深[103]。同時爲咗制止損傷，要做緊急措施，就提案話向政府同國際社會申請資金援助[104]。越南政府認爲順化一帶嘅觀光資源幾有用，不過因爲預算不足，攞唔出十分之好嘅對策[105]。1992年，通過文化遺產保存日本信託基金，越南攞到咗多國援助，頭一次用國外援助實現遺蹟嘅保護、修復[105]。1993年，「順化建造物群」（Complex of Hue Monuments；Ensemble de monuments de Hué）登錄做UNESCO嘅世界遺產[106]，登錄事由係「備有都市規劃同防禦機能嘅首都典範，19世紀初頭越南集權王朝嘅權力象徵」[59][107]。登錄咗世界遺產後，到訪順化嘅越南國內遊客人數有咗大幅增加，1994年時超過100萬人次[108]。

有睇法話修復過後嘅順化建造物群比較新，難講會有咁高嘅歷史價值，亦有睇法評價話呢個文化遺產只係象徵住越南當權者所抱有嘅精神文化[74]。普遍認爲美山聖地嘅考古學價值更高，但就順化建造物群先過佢去登錄，而中部越南亦搶先過北越南去登錄文化遺產，呢啲點令一啲批評人士指責越南政府噉做可能關與到佢有政治意向[109]。

「順化建造物群」呢份世界遺產符合嘅係世界遺產登錄標準嘅第四條[110]。

  • （4）可以做得人類歷史上重要時代嘅優秀例證嘅建築樣式、建築物群、技術集積、景觀範例。

文化

[編輯]

從順化承宣、富春到近代順化有個形成嘅歷史過程，發展咗近七個世紀（自1306年計起）。喺順化文化嘅形成進程中，有東山文化嘅推動，佢係前2世紀時由來自北方嘅居民帶入嘅，融合咗沙瑩文化嘅成份而產生占族文化，持續直到13世紀。喺發展過程中，啲其他文化對佢有轉變影響，譬如東南亞區域各國、中國、印度、西方。

順化文化嘅精神有佢嘅特色，類型多樣，內容豐富又獨特，喺好多領域有住幾豐富嘅體現，如：文學、音樂、舞臺劇、美術、風俗習慣、節慶、行事規矩、食—着—住、交際風格、生活方式。

順化譽爲「神京之地」（Đất Thần Kinh／𡐙神京）、「詩處」（Xứ thơ／處詩），係越南音樂同詩文經常提及嘅城市之一，以浪漫夢幻同詩意嘅形象呈現。

建築

[編輯]

順化嘅建築幾豐富多樣：有宮廷建築同民間建築，宗教建築同祠廟建築，傳統建築同現代建築……最見建築工夫嘅工程，自然就係順化故都遺蹟群體。佢哋係由阮朝主持修建嘅文化歷史遺蹟，時間從19世紀頭到20世紀上半葉，而舊時順化京都嘅地盤，如今個範圍屬順化市同埋附近一啲屬越南承天順化省嘅埞方。

疍民

[編輯]
順化嘅衛星相

喺香江住咗好多疍民，佢哋攞附帶屋頂嘅平底漁船做屋企，一生人都住喺船仔上。一部船住5到10人嘅家庭，除咗作爲屋企嘅船以外，仲備有用做捉魚、同埋輸送用途嘅細駁船[111]。疍民啲船聚喺條江嘅江灣度、或者係河流要點，形成啲細村，呢啲村仔嘅樣形容做「上萬渡船」[111]。傳統上疍民係用木造船嘅，但而家都機械化咗，引入發動機、照明用貯電池呢啲現代設施[111]。另外佢哋爲觀光客準備咗皇帝坐嘅龍船、鳳船，客人可以租船，船上會提供傳統音樂演奏，以及有人服侍。

順化市當局出於改善精神生活同文化生活嘅理由，推進緊將啲疍民移居去陸地[111]。

飲食

[編輯]
順化牛肉粉（Bún bò Huế/𥻸𤙭化），傳統嘅米粉

順化菜係代表性嘅越南菜[112]。順化嘅飲食採用越南各地嘅材料。同其他地方相比，最大嘅差異點係發達嘅齋菜。純素食嘅餐廳遍佈市內各處，由於佛教嘅信仰，一個月會食兩次嘅齋菜，呢個係當地嘅傳統，所以幾多本地人幫襯呢啲餐館。

順化菜好用辣椒賦味，啲味偏辣[113][112]。順化菜嘅一大特徵係有種類繁多嘅小菜，啲小菜份量細，例如攞碟仔裝出或者整成一啖咁哚，但有多碟餸畀人品嚐，設計骨緻，另外有多種蒸米粉嘅菜式[114]。有意見推測，多用辣椒呢個順化菜嘅特徵係同順化原住民占族嘅食文化密切關聯，占人煮嘢食亦多用香辛料[115]。

蜆仔飯（Cơm hến/粓蜆），攞貝類做料嘅順化特色菜

阮朝時代宮闕中有華麗嘅宮廷菜，而家有餐廳提供再現呢啲宮中料理嘅套餐服務[116][117]。有講話宮廷菜嘅食單喺官吏家庭之間流傳，然後從官員階層傳到入庶民度，發展成順化嘅大衆菜[117][118]。不過，因爲開支同材料有限，一般百姓嘅餸菜同宮中菜餚唔同，係好簡單嘅煮食[116]。宮廷菜同大衆菜之外，仲有僧侶食嘅寺廟飲食，順化菜嘅代表大體就係呢三個種類[118]。另外由於位置優勢，順化市場上彙集咗北越南同南越南兩邊嘅材料，煮餸用得嘅食材幾豐盛[119]。

順化菜嘅名菜有順化牛肉粉、蜆仔飯（越南文：Cơm hến）（使用蜆肉焗汁嘅碗飯）等。萍餅（越南文：Bánh bèo）（bánh bèo/餅䕯）、樽餅（越南文：Bánh nậm）（bánh nậm/餅埝）等係將啲米粉溶入水度，再蒸成餅底攞去用嘅小食，佢哋要溝埋用大量辣椒、香料煮成嘅醬汁一齊食[116]。宮廷菜中，有荷花飯（cơm sen/粓蓮；落蓮藕、蓮子等做料嘅飯）、一口大細嘅越南炸春卷（入面包菠蘿），啲菜碟度會放朵花扮靚。點心亦係順化名物，係啲用綠豆做餡包住嘅糕餅，出名嘅有夫妻餅（越南文：Bánh phu thê）（bánh phu thê/餅夫妻，又叫bánh xu xê/餅姝啛）、黑餅仔（bánh ít đen/餅𠃝黰），多數提供做套餐嘅甜品[120]。

美術館、博物館

[編輯]
  • 順化宮廷古物博物館（越南文：Bảo tàng Cổ vật Cung đình Huế）：1845年喺皇城東便起嘅建築物，1923年時改裝過啲設施[10]。入面展示美術品同埋阮朝宮廷嘅物品。
  • 歷史革命博物館
  • 軍事博物館：呢處設施原本係阮朝時代嘅國子監，後來座建築轉用成博物館。越南戰爭初期佢用作美國人嘅高中，戰後使用做展示越戰相關嘅博物館[121]。
  • 胡志明博物館
  • 潘佩珠紀念館

音樂同藝術

[編輯]

順化嘅音樂同藝術有住深刻嘅悠久歷史。

宮廷雅樂

[編輯]
内文：順化宮廷雅樂

舊日阮朝宮中有雅樂等宮廷音樂演奏，但帝制廢止後，一時之間傳統斷絕[122]。佢嘅宮廷音樂發源自黎時八類宮廷禮樂：郊樂、廟樂、五祀樂、九日月交重樂、大朝樂、常朝樂、大宴九奏樂、宮中樂。到到阮朝，越南宮廷禮樂發展成兩個類型：大樂、雅樂（小樂）。佢哋都有住成系統嘅大量曲譜。

順化嘅建築物群登錄爲世界遺產後，1994年開始，UNESCO對順化無形文化財產進行調查。1994年喺順化開咗個國際會議，雖然個會得少數人參與，但啲人知道咗順化宮廷音樂、同埋傳統祭禮嘅繼承人仲在生，不過呢啲人嗰陣經已越見越少，因而個文化存續幾細弱吓，各國嘅研究者都指出佢嘅文化重要性[123]。所以順化藝術大學（越南文：Đại học Huế）設置咗宮廷音樂嘅專攻課程，喺日本嘅音樂學研究者嘅助力之下，重新培育傳承人，復興返佢。喺2003年，雅樂以「順化宮廷雅樂」（nhã nhạc cung đình Huế／雅樂宮廷化）嘅名目登錄入UNESCO嘅無形文化遺產，同佢一齊錄入嘅越南音樂仲有朝文（chầu văn／朝文；女神祭禮嘅音樂）同埋從戲（tuồng／從；傳統戲曲）[124]。另外以雅樂做根基，誕生咗幾多地方音樂嘅改編，如順化歌（ca Huế／歌化）、順化演奏（đàn Huế／彈化）等[125]。

宮廷舞蹈

[編輯]

宮廷度有15種隆重嘅舞，諸如祭禮舞、祝頌舞、接使舞、宴席舞、從戲嘅呈演舞。其中有幾多舞場面宏壯，演員規模大，鋪演得個畫面輝煌燦爛。越南宮廷歌舞嘅藝術、技巧體現出京族古傳歌舞嘅高級發展。

順化歌

[編輯]

順化歌係個成系統嘅豐富樂種，出名嘅有60部作品，包含聲樂同埋器樂，有兩大調式：北調、南調，表演時講究用「氣」去描畫唔同情感嘅差別特徵。北調啲歌嘅音調清新別緻、莊重。南調係啲憂傷、輕柔、哀怨嘅樂調。啲順化歌有住細緻嚴密嘅構築，歷經悠久嘅發展過程，成咗種完整嘅古典樂，有住幾多精深嘅專業要素，比如結構、歌詞、表演風格。順化樂團同順化歌伴奏，用嘅樂器有所謂「五絕」：箏、琵琶、二胡、月琴、三絃，此外仲會加埋獨絃琴、笛，而敲擊部有順化鼓、鸞笙、錢笙。

順化歌嘅彈唱技巧特別精細，而又帶有濃厚嘅地方色彩，噉係由於佢生發自順化人嘅聲氣、用語，因而有花名叫做「順化吟唱」（hò Huế／呼化）、「順化聲調」（lý Huế／哩化），係宮廷樂同民間音樂之間嘅橋樑。

衣裝

[編輯]

越式長衫同埋斗笠作爲越南民族服飾而出名，經常睇做係越南嘅象徵，佢哋都係源自順化嘅衣裝[111]。越式長衫經過現代設計，成咗越南人傳統嘅服裝形象，佢係18世紀時發展自順化阮主朝廷嘅一類服裝。歷史上有段時間，阮朝朝廷出咗如下嘅穿着規則，嗰陣爲咗統一越南全域嘅服飾，1828年就指定咗長衫做標準衣裝[111]。

着常服時，男女都會着立領短袖，袖口嘅闊窄隨便。着長衫時，袍身兩邊要釦好，唔得岔開。唯一畀岔開件衫嘅，只有當男人做嘢時、唔想着圓領窄袖先至行方便。

呢種服裝發展成「五身長衫」（áo dài ngũ thân／襖𨱽五身），係19世紀同20世紀頭啲貴族普遍着嘅一類有五個下襬嘅長衫。1920年代到1930年代期間，攞靈感自巴黎時裝，阮吉祥（Nguyễn Cát Tường）同第啲藝術家拉埋河內大學一齊重新設計咗五身長衫，令佢成爲現代服裝[126]。越南人公認長衫同斗笠嘅形象結合係發源自順化。越式長衫喺順化嘅特徵係普遍流行一種紫色，呢種特別嘅色令越式長衫成咗呢座越南故都嘅遺產[127][128]。

體育

[編輯]

喺順化起咗個自由運動場（sân vận động Tự Do／𡑝運動自由），有2萬5千個座位。呢個體育場係1930年代由法屬印度支那政府起嘅，當時嘅名稱叫順化奧林匹克體育場（Stade Olympique de Hué）。之後，南越阮政府改佢名做保隆運動場（sân vận động Bảo Long／𡑝運動保隆）。而家佢畀足球隊順化足球會（越南文：Câu lạc bộ bóng đá Huế）用做主運動場。

教育

[編輯]
國學中學嘅課室

呢度有順化大學（內含順化師範大學、順化科學大學、順化醫科大學、順化藝術大學、順化農林大學、順化高等師範學校、順化遠程教育中心）、越南佛教學院順化分校（亦即順化佛教大學）、越南文化通信院順化分院（亦即順化文化人類學研究所）。當地嘅國學中學係知名嘅名牌學校，人物輩出，比如胡志明、武元甲[10]。國學中學嘅正門似寺廟山門嘅形狀，塗紅晒成赤色[85]。

交通

[編輯]
順化站（越南文：Ga Huế）
順化站

連結河內、胡志明嘅鐵路、高速公路會通過順化[52]。順化國際機場喺南郊，有飛機直接連接順化同河內、胡志明[8][129]。位置喺舊城區北面嘅北部巴士總站（Bến xe phía Bắc／𡔖車𪰂北）有去北越南嘅巴士，而新城區南邊位置度有南部巴士總站（Bến xe Phía Nam／𡔖車𪰂南；又叫安舊巴士總站），亦有巴士行去北越南。東巴巴士總站（Bến xe Đông Ba／𡔖車東巴）有巴士行去順化就近嘅村鎮。

相集

[編輯]

姊妹城市、友好城市

[編輯]

攞順化做舞臺嘅作品

[編輯]

電影

[編輯]

睇埋

[編輯]

註

[編輯]
  1. ↑ 「順化」喺原文寫「化」，佢係漢字，但呢度嘅讀音係喃音。係讀標準字音嘅Hóa，定讀喃音嘅Huế，喺讀漢喃文時係隨語境嘅[18]。
  2. ↑ 國語字：Hương kỳ nam, vảy đồi mồi, búi an tức, bì hồ tiêu, thau Lào, thóc Huế, thuyền tám tầm chở đã vạy then；漢喃：香奇楠、𩺩玳瑁、𧸻安息、埤胡椒、鍮牢、秃化、船糁尋䢐㐌𣍁杄[21]。正文係粵韻詩譯，白話文意思解釋：奇楠嘅香（奇楠係種沉香木），玳瑁嘅殼（玳瑁嘅殼係名貴寶石），安息嘅髮髻，種住胡椒嘅矮牆（胡椒喺古代係貴重嘅香料），老撾嘅黃金，順化嘅禾穀米，運米嘅船個船艙漲到連門栓都彎埋。
  3. ↑ 成泰帝諭內容：「爲咗達成啲辦法嘅美好結果，機密院喺成泰十年九月初六提出咗問題，要喺安南成立都市，今日朕決定用啲良好組織，來補充嗰啲辦法。呢啲組織應用喺下列城市：清化、榮市、順化、會安、歸仁、潘切。」[33]

攷

[編輯]
  1. ↑ 1.0 1.1 1.2 1.3 〈TỔ CHỨC HÀNH CHÍNH TỈNH THỪA THIÊN HUẾ（漢喃：組織行政省承天化；粵譯：承天順化省行政組織）〉。《越南統計年鑑》。原著喺2014年9月11號歸檔。喺2018年5月26號搵到。
  2. ↑ 2.0 2.1 櫻井由躬雄。〈亜熱帯の中の中国文明（粵譯：亞熱帶中嘅中國文明）〉. 《《東南アジア史1 大陸部》（粵譯：東南亞史1 大陸部）》。頁 183。
  3. ↑ 3.00 3.01 3.02 3.03 3.04 3.05 3.06 3.07 3.08 3.09 3.10 3.11 3.12 新江。〈フエ（粵譯：順化）〉. 《《東南アジアを知る事典》（粵譯：知曉東南亞嘅事典）新版》。頁 375。
  4. ↑ 4.0 4.1 4.2 4.3 4.4 4.5 4.6 酒井。〈フエ（粵譯：順化）〉. 《《アジア歴史事典》（粵譯：亞洲歷史事典）第8卷》。頁 86。
  5. ↑ 5.0 5.1 5.2 5.3 北川。〈フエ（粵譯：順化）〉. 《《ベトナムの事典》（粵譯：越南事典）》。頁 280、282。
  6. ↑ 小倉。《《ヴェトナム歴史の旅》（粵譯：越南歷史之旅）》。頁 129。
  7. ↑ 7.0 7.1 7.2 菊池。〈フエ（粵譯：順化）〉. 《《世界地名大事典》第8卷》。頁 1077～1078。
  8. ↑ 8.0 8.1 《地球の歩き方》編輯室。《《ベトナム》（粵譯：越南；2012～2013版）》。頁 204。
  9. ↑ 小倉。《《ヴェトナム歴史の旅》（粵譯：越南歷史之旅）》。頁 132。
  10. ↑ 10.0 10.1 10.2 10.3 10.4 10.5 《《ベトナム》（粵譯：越南；2008～2009年版）》。頁 181。
  11. ↑ 《地球の歩き方》編輯室。《《ベトナム》（粵譯：越南；2012～2013版）》。頁 224。
  12. ↑ 石澤良昭、河野康、惠拉·洛頗乍那辣（วีระ โรจน์พจนรัตน์；Rojpojchanarat, Vira） (1988年)。《Study on Sukhothai: research report（粵譯：素可泰研究：研究報告）》。上智大學，亞洲文化研究所。頁 68。
  13. ↑ 櫻井由躬雄。〈南シナ海の世界（粵譯：南海嘅世界）〉. 《《東南アジア史1 大陸部》（粵譯：東南亞史1 大陸部）》。頁 60。
  14. ↑ 櫻井由躬雄。〈南シナ海の世界（粵譯：南海嘅世界）〉. 《《東南アジア史1 大陸部》（粵譯：東南亞史1 大陸部）》。頁 64。
  15. ↑ 桃木至朗 (2001年)。〈唐宋変革とベトナム（粵譯：唐宋變革同越南）〉. 《《東南アジア古代国家の成立と展開》（粵譯：東南亞古代國家嘅成立同展開）收錄喺「岩波講座 東南亞史2」》。岩波書店。頁 36～37。
  16. ↑ 櫻井由躬雄。〈亜熱帯の中の中国文明（粵譯：亞熱帶中嘅中國文明）〉. 《《東南アジア史1 大陸部》（粵譯：東南亞史1 大陸部）》。頁 186。
  17. ↑ 《《ヴェトナム》（粵譯：越南；附錄）》。頁 39。
  18. ↑ 18.0 18.1 18.2 據武香安（Võ Hương An）嘅文章，收喺集《一時順化》（Huế của một thời／化𧵑𠬠時），2006年，南越出版社。
  19. ↑ 19.0 19.1 19.2 北川。〈フエ（粵譯：順化）〉. 《《ベトナムの事典》（粵譯：越南事典）》。頁 281。
  20. ↑ 櫻井由躬雄。〈ベトナム世界の成立（粵譯：越南世界嘅成立）〉. 《《東南アジア史1 大陸部》（粵譯：東南亞史1 大陸部）》。頁 211。
  21. ↑ 〈十誡孤魂國語文〉。《黎山青抄》。原著喺2020年3月28號歸檔。喺2018年6月23號搵到。
  22. ↑ 漢喃研究院 (1981年)。《《Thơ Văn Lê Thánh Tông》（黎聖宗詩文）》。河內：社會科學出版社。頁 134。
  23. ↑ 出自《國朝正編撮要》第172、199、215、216、217頁。
  24. ↑ 出自第二集嘅第254頁，嗰版講到啲事件關聯到法國。
  25. ↑ 據1918年BAVH第四部嘅第285頁；1922年BAVH第一部嘅第53頁。
  26. ↑ 《《Iconographie Historique de l’Indochine Française》（粵譯：法屬印支嘅印象史）》。巴黎：Boudet & Masson。1931年。頁 16。
  27. ↑ "Correspondance, BAVH". 《《Les Français au service de Gia Long》（粵譯：爲嘉隆服務嘅法國人；第七輯）》。Cadière。1929年。頁 364。
  28. ↑ 〈卷一 京師〉. 《《大南一統志》》。｢定都富春，始稱京師焉。｣
  29. ↑ 29.0 29.1 29.2 29.3 《《ユネスコ世界遺産 6（東南アジア・オセアニア）》（粵譯：UNESCO世界遺產6（東南亞、大洋洲））》。頁 70。
  30. ↑ 30.0 30.1 坪井。《《ヴェトナム》（粵譯：越南）》。頁 37。
  31. ↑ Stearns, Peter N.; Langer, William Leonard (2001年)。《《The Encyclopedia of world history: ancient, medieval, and modern, chronologically arranged》（粵譯：世界史百科：古代、中代、現代，按時間排）》。Houghton Mifflin Harcourt。頁 1036。{{cite book}}: CS1 maint: multiple names: 作者名單 (link)
  32. ↑ "Rapport du Coma à S.M. l'Empereur d'Mnnam, en date du 6 du 9 mois de la 10 année de Thanh Thai (20 Octobre 1898)". 《《Journal officiel de l' Indo-chine française》（粵譯：法屬印支官方檔案）》。1902年。頁 150。
  33. ↑ 33.0 33.1 "Ordonnace en date du 5 du 6 mois de la 11 année de Thanh Thai (12 Juillet 1899)". 《《Journal officiel de l' Indo-chine française》（粵譯：法屬印支官方檔案）》。1902年。頁 150。
  34. ↑ "L' Arrêté du 30 aout 1899, Le Gouverneur Général de I' Indo-chine". 《《Journal officiel de l' Indo-chine française》（粵譯：法屬印支官方檔案）》。1902年。頁 147。
  35. ↑ 35.0 35.1 Ng Shui Meng (1974年)。《《The Population of Indochina》（粵譯：印支人口）》。星加坡：東南亞研究所。頁 105。
  36. ↑ 《《Việt Nam Cộng hòa bản đồ hành chánh》（漢喃：越南共和版圖行政；粵譯：越南共和國行政地圖）》。大叻：國家地輿分局。1967年。 {{cite book}}: templatestyles stripmarker in |title= at position 42 (help)
  37. ↑ 伊藤。《《観光コースでないベトナム》（粵譯：唔係觀光課—越南；新版）》。頁 109～111。
  38. ↑ 小倉貞男 (1992年)。《《ヴェトナム戦争全史》（粵譯：越南戰爭全史）》。岩波書店。頁 212～214。
  39. ↑ 松岡完 (2001年)。《《ベトナム戦争》（粵譯：越南戰爭）》。中央公論新社。頁 86～87。
  40. ↑ 〈Quyết định 102-CP năm 1979 giải thể phường Phú An thuộc thành phố Huế（漢喃：決定102-CP𢆥1979解體坊富安屬城庯化；粵譯：1979年102-CP決定，解散順化市富安坊）〉。《越南法律書庫》。喺2018年11月3號搵到。
  41. ↑ 〈Quyết định 64-HĐBT năm 1981 về việc mở rộng thành phố Huế, thị xã Đông Hà và phân vạch lại địa giới các huyện Hương Điền, Triệu Hải thuộc tỉnh Bình Trị Thiên do Hội đồng bộ trưởng ban hành（漢喃：決定64-HĐBT𢆥1981𧗱役𨷑𢌌城庯化、市社東河吧分劃吏地界各縣香田、趙海屬省平治天由會同部長頒行；粵譯：1981年64-HDBT平治天省決定，由委員會部長頒行，擴張順化市、東河市，劃分香田縣、趙海縣地界）〉。《越南法律書庫》。喺2018年11月10號搵到。
  42. ↑ 〈Quyết định 73-HĐBT năm 1981 chia xã Hương Hồ thuộc thành phố Huế（漢喃：決定73-HĐBT𢆥1981支社香湖屬城庯化；粵譯：1981年73-HDBT決定，分割順化市嘅香湖社）〉。《越南法律書庫》。喺2018年11月29號搵到。
  43. ↑ 〈Quyết định 03-HĐBT năm 1983 phân vạch địa giới một số xã, phường thuộc thành phố Huế（漢喃：決定03-HĐBT𢆥1983分劃地界𠬠數社、坊屬城庯化；粵譯：1983年03-HDBT決定，劃分一啲順化市嘅社、坊嘅地界）〉。《越南法律書庫》。喺2018年11月29號搵到。
  44. ↑ 〈Nghị quyết về việc phân vạch đại giới hành chính của các tỉnh Nghĩa Bình, Phú Khánh và Bình Trị Thiên do Quốc hội ban hành（漢喃：議決𧗱役分劃大界行政𧵑各省義平、富慶吧平治天由國會頒行；粵譯：國會頒行決議劃分義平、富慶、平治天省嘅行政大界）〉。《越南法律書庫》。1989年6月30號。喺2019年8月10號搵到。
  45. ↑ 〈Quyết định 355-CT năm 1992 công nhận thành phố Huế là đô thị loại II do Chủ tịch Hội đồng bộ trưởng ban hành（漢喃：決定355-CT𢆥1992公認城庯化羅都市類𠄩由主席會同部長頒行；粵譯：1992年355-CT決定批准順化市係二類都市，由主席會議部長頒行）〉。《越南法律書庫》。1992年9月24號。原著喺2019年8月22號歸檔。喺2019年8月23號搵到。
  46. ↑ 〈Quyết định 209/2005/QĐ-TTg về việc công nhận thành phố Huế là đô thị loại I trực thuộc tỉnh Thừa thiên Huế do Thủ tướng Chính phủ ban hành（漢喃：決定209/2005/QĐ-TTg𧗱役公認城庯化羅都市類𠬠直屬省承天化由首相政府頒行；粵譯：209/2005/QĐ-TTG號決定，關於批認順化市係直屬於承天順化省嘅一類都市，由政府總理頒行）〉。《越南法律書庫》。2005年8月24號。原著喺2019年8月29號歸檔。喺2019年8月29號搵到。
  47. ↑ 〈Nghị định Chính phủ về việc điều chỉnh địa giới hành chính xã Hương Sơ và xã Thủy An để thành lập các phường An Hòa, Hương Sơ, An Đông và An Tây thuộc thành phố Huế, tỉnh Thừa Thiên - Huế（漢喃：議定政府𧗱役調整地界行政社香初吧社水安抵成立各坊安和、香初、安東吧安西屬城舖化、省承天化；粵譯：政府議定調整承天順化省順化市香初社同水安社嘅行政地界，成立安和坊、香初坊、安東坊、安西坊）〉。《越南中央政府》。2007年3月27號。原著喺2021年10月28號歸檔。喺2019年8月14號搵到。
  48. ↑ "Quyết định 143/2007/QĐ-TTg（粵譯：143/2007/QĐ-TTg號決定）". 《越南中央政府》. 2007年8月30號. 原著喺2021年10月28號歸檔. 喺2019年10月19號搵到.
  49. ↑ 〈Thừa Thiên Huế quyết tâm phấn đấu sớm trở thành thành phố trực thuộc Trung ương（漢喃：承天化決心奮鬥𣋽𧿨成城庯直屬中央；粵譯：承天順化決心奮鬥，早日成爲中央直轄市）〉。《承天順化省政府》。原著喺2015年9月27號歸檔。喺2019年9月20號搵到。
  50. ↑ 〈Nghị quyết 14/NQ-CP năm 2010 thành lập các phường: Hương Long, Thủy Xuân, Thủy Biều thuộc thành phố Huế, tỉnh Thừa Thiên Huế（漢喃：議決14/NQ-CP𢆥2010成立各坊：香龍、水春、水瓢屬城庯化、省承天化；粵譯：2010年決議：成立屬承天順化省順化市嘅香龍坊、水春坊、水瓢坊）〉。《越南法律書庫》。2010年3月25號。原著喺2019年8月22號歸檔。喺2019年8月22號搵到。
  51. ↑ 三省堂編修所（編） (1998年)。《《コンサイス外国地名事典》（粵譯：簡明外國地名事典；第3版）》。三省堂。頁 824。
  52. ↑ 52.0 52.1 三省堂編修所（編） (1998年)。《《コンサイス外国地名事典》（粵譯：簡明外國地名事典；第3版）》。三省堂。頁 848。
  53. ↑ 53.0 53.1 《《ベトナム》（粵譯：越南；2008～2009年版）》。頁 188。
  54. ↑ 54.0 54.1 《地球の歩き方》編輯室。《《ベトナム》（粵譯：越南；2012～2013版）》。頁 205。
  55. ↑ 55.0 55.1 55.2 55.3 55.4 〈오행산에 올라 `五行`을 헤아려봐!（漢諺：五行山에 올라 `五行`을 헤아려봐!；粵譯：爬上五行山考察「五行」！）〉。《韓國經濟新聞社》。2008年6月9號。原著喺2018年12月25號歸檔。喺2018年7月8號搵到。｢阮王朝王宮은 1802年부터 1945年까지 13代에 걸쳐 이어진 阮王朝의 王宮이다. 높이 5m의 城壁으로 둘러싸인 王宮 안에는 王族의 邸宅과 寺院들이 남아 있다. 大槪의 觀光客이 入場하는 王宮의 正門인 南門樓閣에 오르면 王宮全體가 한눈에 보인다. 南門正面에 北京의 紫禁城을 본떠 지은 太和殿이 있으며 太和殿 왼쪽에 各王의 位牌가 모셔진 寺院 顯臨閣이 있다....化 外郭 南쪽에 王陵과 寺院들이 많다. 啟定王陵은 阮王朝의 마지막 王陵으로 1931年 完成됐다. 越南과 유럽의 建築樣式이 섞인 特이한 構造의 王陵이다. 콘크리트 石像이 유럽人의 모습과 類似하다. 內部의 玉座에는 靑銅에 金箔을 입힌 啟定皇帝의 等身像이 있으며 그 아래 皇帝의 屍身이 安置돼 있다. 明命皇帝陵은 內外部裝飾이 아름답기로 손꼽힌다. 入口에 들어서면 初昇달模樣의 人工湖水가 눈에 들어오며，皇帝의 功德碑가 세워진 亭子 아래 쪽에 文武石 및 動物模樣의 石像들이 늘어서 있다.｣
  56. ↑ 56.0 56.1 《《ユネスコ世界遺産 6（東南アジア・オセアニア）》（粵譯：UNESCO世界遺產6（東南亞、大洋洲））》。頁 70～71。
  57. ↑ 57.0 57.1 57.2 57.3 《《ユネスコ世界遺産 6（東南アジア・オセアニア）》（粵譯：UNESCO世界遺產6（東南亞、大洋洲））》。頁 71。
  58. ↑ 58.0 58.1 《《ユネスコ世界遺産 6（東南アジア・オセアニア）》（粵譯：UNESCO世界遺產6（東南亞、大洋洲））》。頁 73。
  59. ↑ 59.0 59.1 59.2 《《ヴェトナム》（粵譯：越南；附錄）》。頁 40。
  60. ↑ 60.0 60.1 60.2 60.3 《《ユネスコ世界遺産 6（東南アジア・オセアニア）》（粵譯：UNESCO世界遺產6（東南亞、大洋洲））》。頁 74。
  61. ↑ 61.0 61.1 61.2 61.3 《地球の歩き方》編輯室。《《ベトナム》（粵譯：越南；2012～2013版）》。頁 206。
  62. ↑ 62.0 62.1 小倉。《《ヴェトナム歴史の旅》（粵譯：越南歷史之旅）》。頁 133。
  63. ↑ 《《ユネスコ世界遺産 6（東南アジア・オセアニア）》（粵譯：UNESCO世界遺產6（東南亞、大洋洲））》。頁 72。
  64. ↑ 64.0 64.1 《《ヴェトナム》（粵譯：越南）》。頁 226。
  65. ↑ 65.0 65.1 《《ユネスコ世界遺産 6（東南アジア・オセアニア）》（粵譯：UNESCO世界遺產6（東南亞、大洋洲））》。頁 76。
  66. ↑ 《地球の歩き方》編輯室。《《ベトナム》（粵譯：越南；2012～2013版）》。頁 206～207。
  67. ↑ 《《ユネスコ世界遺産 6（東南アジア・オセアニア）》（粵譯：UNESCO世界遺產6（東南亞、大洋洲））》。頁 76～77。
  68. ↑ 68.0 68.1 68.2 68.3 《《ベトナム》（粵譯：越南；2008～2009年版）》。頁 180。
  69. ↑ 69.0 69.1 69.2 《地球の歩き方》編輯室。《《ベトナム》（粵譯：越南；2012～2013版）》。頁 207。
  70. ↑ Travel Guerrilla（編） (2006年)。《《태국 베트남 캄보디아 라오스 100배 즐기기》（漢諺：泰國 越南 캄보디아 라오스 100倍 즐기기；粵譯：泰國、越南、柬埔寨、老撾，100倍快樂）》。首爾：랜덤하우스코리아（蘭登書屋韓國）。頁 494。｢城壁으로 둘러싸인 舊市街地는 傳統을 간직한 채 예前의 모습을 그대로 간직하고 있으며, 1993年에 유네스코 世界文化遺産으로 指定되었다.｣
  71. ↑ 小倉。《《ヴェトナム歴史の旅》（粵譯：越南歷史之旅）》。頁 123。
  72. ↑ 今井、岩井。《《現代ベトナムを知るための60章》（粵譯：知曉現代越南嘅60章）》。頁 214。
  73. ↑ 73.0 73.1 《《ベトナム》（粵譯：越南；2008～2009年版）》。頁 183。
  74. ↑ 74.0 74.1 74.2 小倉 (1997年)。〈フエ（粵譯：順化）〉. 《《月刊しにか》》。頁 38～39。
  75. ↑ 75.0 75.1 小倉。《《ヴェトナム歴史の旅》（粵譯：越南歷史之旅）》。頁 130。
  76. ↑ 《地球の歩き方》編輯室。《《ベトナム》（粵譯：越南；2012～2013版）》。頁 207～208。
  77. ↑ 《地球の歩き方》編輯室。《《ベトナム》（粵譯：越南；2012～2013版）》。頁 208。
  78. ↑ 78.0 78.1 78.2 坪井。《《ヴェトナム》（粵譯：越南）》。頁 216。
  79. ↑ 79.0 79.1 79.2 《《ヴェトナム》（粵譯：越南）》。頁 45。
  80. ↑ 《《ベトナム》（粵譯：越南；2008～2009年版）》。頁 182。
  81. ↑ 81.0 81.1 《地球の歩き方》編輯室。《《ベトナム》（粵譯：越南；2012～2013版）》。頁 210。
  82. ↑ 82.0 82.1 82.2 82.3 82.4 82.5 《地球の歩き方》編輯室。《《ベトナム》（粵譯：越南；2012～2013版）》。頁 211。
  83. ↑ 《《ユネスコ世界遺産 6（東南アジア・オセアニア）》（粵譯：UNESCO世界遺產6（東南亞、大洋洲））》。頁 68。
  84. ↑ 84.0 84.1 小倉。《《ヴェトナム歴史の旅》（粵譯：越南歷史之旅）》。頁 134。
  85. ↑ 85.0 85.1 伊藤。《《観光コースでないベトナム》（粵譯：唔係觀光課—越南；新版）》。頁 107。
  86. ↑ 伊藤。《《観光コースでないベトナム》（粵譯：唔係觀光課—越南；新版）》。頁 110。
  87. ↑ 87.0 87.1 《《ユネスコ世界遺産 6（東南アジア・オセアニア）》（粵譯：UNESCO世界遺產6（東南亞、大洋洲））》。頁 77。
  88. ↑ 伊藤。《《観光コースでないベトナム》（粵譯：唔係觀光課—越南；新版）》。頁 112～113。
  89. ↑ 坪井。《《ヴェトナム》（粵譯：越南）》。頁 44。
  90. ↑ 久布白、福川。《《ホイアンの町家とフエの民家》（粵譯：會安嘅鎮屋同埋順化嘅民宅），出自《昭和女子大学国際文化研究所紀要》1》。頁 47。
  91. ↑ 久布白、福川。《《ホイアンの町家とフエの民家》（粵譯：會安嘅鎮屋同埋順化嘅民宅），出自《昭和女子大学国際文化研究所紀要》1》。頁 47～48。
  92. ↑ 中澤信一郎 (2005年)。《《ベトナム中部地方・フエの伝統家屋》（粵譯：越南中部地方，順化嘅傳統屋宅），出自叢書《アジア遊学》（亞洲遊學）80》。勉誠出版。頁 36～37。
  93. ↑ 93.0 93.1 久布白、福川。《《ホイアンの町家とフエの民家》（粵譯：會安嘅鎮屋同埋順化嘅民宅），出自《昭和女子大学国際文化研究所紀要》1》。頁 50。
  94. ↑ 94.0 94.1 今井、岩井。《《現代ベトナムを知るための60章》（粵譯：知曉現代越南嘅60章）》。頁 115。
  95. ↑ 坪井。《《ヴェトナム》（粵譯：越南）》。頁 37、39。
  96. ↑ 今井、岩井。《《現代ベトナムを知るための60章》（粵譯：知曉現代越南嘅60章）》。頁 116。
  97. ↑ Travel Guerrilla（編） (2006年)。《《태국 베트남 캄보디아 라오스 100배 즐기기》（漢諺：泰國 越南 캄보디아 라오스 100倍 즐기기；粵譯：泰國、越南、柬埔寨、老撾，100倍快樂）》。首爾：랜덤하우스코리아（蘭登書屋韓國）。頁 502～503。｢主로 阮王朝 때의 遺物들을 展示해놓은 博物館이다. 宮廷에서 使用되었던 物件과 外國에서 온 膳物 等을 展示해놓은 傳統家屋模樣의 本館과 鐵製, 石製 展示品들을 展示해놓은 庭院으로 構成되어 있다.｣
  98. ↑ 98.0 98.1 98.2 坪井。《《ヴェトナム》（粵譯：越南）》。頁 222。
  99. ↑ 小倉。《《ヴェトナム歴史の旅》（粵譯：越南歷史之旅）》。頁 137。
  100. ↑ 阿曾村。《《ベトナムの文化遺産と国際協力》（粵譯：越南文化遺產同國際合作），出自《ベトナム》（越南）下卷》。頁 702。
  101. ↑ 阿曾村。《《ベトナムの文化遺産と国際協力》（粵譯：越南文化遺產同國際合作），出自《ベトナム》（越南）下卷》。頁 702～703。
  102. ↑ 102.0 102.1 阿曾村。《《ベトナムの文化遺産と国際協力》（粵譯：越南文化遺產同國際合作），出自《ベトナム》（越南）下卷》。頁 713。
  103. ↑ 阿曾村。《《ベトナムの文化遺産と国際協力》（粵譯：越南文化遺產同國際合作），出自《ベトナム》（越南）下卷》。頁 714。
  104. ↑ 阿曾村。《《ベトナムの文化遺産と国際協力》（粵譯：越南文化遺產同國際合作），出自《ベトナム》（越南）下卷》。頁 714～715。
  105. ↑ 105.0 105.1 阿曾村。《《ベトナムの文化遺産と国際協力》（粵譯：越南文化遺產同國際合作），出自《ベトナム》（越南）下卷》。頁 715～716。
  106. ↑ 今井、岩井。《《現代ベトナムを知るための60章》（粵譯：知曉現代越南嘅60章）》。頁 213～214。
  107. ↑ 坪井。《《ヴェトナム》（粵譯：越南）》。頁 38。
  108. ↑ 坪井。《《ヴェトナム》（粵譯：越南）》。頁 251。
  109. ↑ 阿曾村。《《ベトナムの文化遺産と国際協力》（粵譯：越南文化遺產同國際合作），出自《ベトナム》（越南）下卷》。頁 708。
  110. ↑ 〈The Criteria for Selection（粵譯：登錄基準）〉。UNESCO。喺2019年12月17號搵到。
  111. ↑ 111.0 111.1 111.2 111.3 111.4 111.5 坪井。《《ヴェトナム》（粵譯：越南）》。頁 40。
  112. ↑ 112.0 112.1 今井、岩井。《《現代ベトナムを知るための60章》（粵譯：知曉現代越南嘅60章）》。頁 230。
  113. ↑ Ngoc, Huu; Borton, Lady（友玉、李迪·波頓） (2006年)。《《Am Thuc Xu Hue: Hue Cuisine》（粵譯：順化飲食）》。越南。{{cite book}}: CS1 maint: multiple names: 作者名單 (link)
  114. ↑ 《《ベトナム 2008-2009年版》（粵譯：越南2008～2009年版；新個人旅行）》。昭文社。2008年。頁 185。
  115. ↑ 森枝卓士 (2005年)。《《世界の食文化4：ベトナム・カンボジア・ラオス・ミャンマー》（粵譯：世界食文化4：越南、柬埔寨、老撾、緬甸）》。農山漁村文化協會。頁 131。
  116. ↑ 116.0 116.1 116.2 今井、岩井。《《現代ベトナムを知るための60章》（粵譯：知曉現代越南嘅60章）》。頁 231。
  117. ↑ 117.0 117.1 《地球の歩き方》編輯室。《《ベトナム》（粵譯：越南；2012～2013版）》。頁 30。
  118. ↑ 118.0 118.1 坪井。《《ヴェトナム》（粵譯：越南）》。頁 42。
  119. ↑ 森枝卓士 (2005年)。《《世界の食文化4：ベトナム・カンボジア・ラオス・ミャンマー》（粵譯：世界食文化4：越南、柬埔寨、老撾、緬甸）》。農山漁村文化協會。頁 125～126。
  120. ↑ 《《ベトナム 2008-2009年版》（粵譯：越南2008～2009年版；新個人旅行）》。昭文社。2008年。頁 187。
  121. ↑ 伊藤。《《観光コースでないベトナム》（粵譯：唔係觀光課—越南；新版）》。頁 108。
  122. ↑ 今井、岩井。《《現代ベトナムを知るための60章》（粵譯：知曉現代越南嘅60章）》。頁 208。
  123. ↑ 阿曾村。《《ベトナムの文化遺産と国際協力》（粵譯：越南文化遺產同國際合作），出自《ベトナム》（越南）下卷》。頁 719。
  124. ↑ 今井、岩井。《《現代ベトナムを知るための60章》（粵譯：知曉現代越南嘅60章）》。頁 114。
  125. ↑ 櫻井由躬雄 (1995年)。《《もっと知りたいベトナム》（粵譯：最想知嘅越南）》。弘文堂。頁 256。
  126. ↑ Ellis Claire（艾莉絲·克利亞） (1996年)。〈Ao Dai: The National Costume（越式長衫：民族服飾）〉。Things Asian。原著喺2008年7月5號歸檔。喺2008年7月2號搵到。
  127. ↑ 寶懿（Bửu Ý） (2004年6月19號)。〈Xứ Huế, người Huế（漢喃：處化、𠊛化；粵譯：順化埞，順化人）〉。Tuổi Trẻ。喺2020年3月18號搵到。
  128. ↑ 〈Ao dai - Hue's piquancy（越式長衫——順化嘅辛辣）〉。《越南網》。2004年6月18號。原著喺2011年2月4號歸檔。喺2011年6月1號搵到。
  129. ↑ 《《ベトナム 2008-2009年版》（粵譯：越南2008～2009年版；新個人旅行）》。昭文社。2008年。頁 177。
  130. ↑ 〈شهرهای بندر انزلی و هوء در ویتنام خواهر خوانده شدند（安扎利港同越南順化結成姊妹城市）〉。aftabir。2004年7月19號。原著喺2019年8月19號歸檔。喺2019年8月19號搵到。（波斯文）
  131. ↑ 131.0 131.1 〈Hue, Vietnam（順化，越南）〉。《美國國際姊妹都市協會》。原著喺2014-03-23歸檔。喺2014年3月22號搵到。（英文）
  132. ↑ 〈Ville ouverte sur le monde（向世界開放嘅城市）〉。《魁北克市政府》。原著喺2014年5月4號歸檔。喺2014年6月7號搵到。（法文）
  133. ↑ 〈姉妹都市・友好都市(Sister Cities)〉。《靜岡市政府》。原著喺2014年11月3號歸檔。喺2014年6月7號搵到。（日文）
  134. ↑ 〈西条市・フエ市友好都市提携を締結しました！（西條市同順化市締結做友好都市）〉。《西條市政府》。原著喺2018年10月26號歸檔。喺2018年10月26號搵到。（日文）
  135. ↑ 〈Jumelages et coopérations（締結同合作）〉。喺2019年8月19號搵到。（法文）

出面網頁

[編輯]
維基同享有多媒體嘅嘢：
順化
維基遊埠有呢篇旅遊嘅資源：順化（英文）
開放街圖（Open Street Map）嘅標誌
喺開放街圖（Open Street Map）嘅順化地圖。
由「https://zh-yue.wikipedia.org/w/index.php?title=順化&oldid=2200201」收