跳去內容

夜空

呢篇文係一篇好文。想知更多，請撳呢個掣。
出自維基百科，自由嘅百科全書

多地夜空景象：上圖係二〇一四年美國亞利桑拿州，中圖係二〇一八年臺灣而下圖則係二〇一五年冰島南部。

夜空，粵拼：Je6 hung1，喺天文學上係指地球夜晚如果好天嘅話，會望到嘅天嘅景象：當地球表面某笪地方入咗夜，嗰度就唔會再受太陽直接照射，光量大減，但只要天氣夠好而且光污染[註 1]唔算太嚴重[1]，企喺地表嘅人，就可以用肉眼望到地球夜晚嗰邊面向嘅各種光源[2]。

人喺夜晚黑用肉眼，可以睇到嘅光源包括：

光源 實例
曉自己發光嘅天體 恆星同由大量恆星組成嘅銀河[3]
會反射陽光嘅天體 月亮以及地球以外嘅太陽系行星
大氣層當中會發光嘅物體 喺極地夜空嘅極光[註 2][4]

由古到今，夜空都一路引起人類嘅種種遐想：喺科學唔發達嘅古代，古人會用好多神話嚟解釋夜空嘅事物，例如古羅馬同古希臘嘅人，就將夜空嘅各種天體想像成天上嘅眾神或者相關嘅事物，好似係羅馬人噉，就將喺夜空中發出耀眼光煇嘅金星當成係象徵住維納斯，即係羅馬神話中主管愛與美嘅女神，而且世界各地嘅古人仲有占星術呢種學問，諗住用天體嘅移動同位置預知未來[註 3][5]。到咗現代，世人透過科學對夜空有咗較真實嘅了解，但夜空嘅美態依然吸引好多人進行睇星等嘅活動[1][4]。

亮度變化

[編輯]
内文：天空亮度
睇埋：曙暮光同夜晚

夜空有一定嘅亮度。一笪地方日頭嗰陣，會受到太陽光嘅直接照射，同時大氣層會散射[歐 1]太陽嘅光，令當地嘅天光同埋有色彩[6][7]；相比之下，喺好似水星等大氣層極其稀薄嘅行星上，日頭嘅天會得漆黑嘅背景同埋耀眼嘅太陽[8]。

隨住地球自轉，該地望到嘅太陽會慢慢下降到地平線以下，是謂日落，而當太陽嘅位置跌到咁上下，身處嗰笪地方嘅人就會見到暮光[歐 2]，即係日落後俾大氣層上層散射，照亮地表嘅陽光，而當太陽嘅位置再低啲，嗰笪地方最後就會入夜[9]。

一旦地球上某笪地方入咗夜，嗰度就唔會再受到陽光嘅直射，但夜空並唔係漆黑一片嘅：地球仲會受到好多唔同來源嘅光照射；月亮同第啲太陽系行星會反射照落佢哋嗰度嘅陽光，呢啲光有部份會照返落地球，而離地球閒閒哋成幾光年遠嘅星星，本身就識發光；地球嘅大氣層會散射呢啲光，令夜空唔單只有微弱嘅光，仲會有淡淡嘅藍色[10][11]。

光相關嘅物理，光學有仔細著墨。

有嘅物體

[編輯]
大犬座嘅圖解；啲線係為咗清楚起見而加嘅。

星星

[編輯]
内文：恆星

星星係遙遠嘅恆星[註 4]，會發光。典型恆星嘅光度[歐 3]係指緊佢喺每單位時間內射出幾多電磁能量，例如天狼星[歐 4]嘅光度就係太陽嘅成 25.4 倍左右[12]，不過呢啲太陽外嘅恆星離地球極其遠—天狼星離地球大約 8.611 光年咁遠，相比之下太陽離地球「只係」得 0.00001561 光年[12]，所以呢啲恆星由地球表面睇，好似細過太陽好多噉，而且望落好似冚唪唥都差唔多一樣咁遠[註 5]。由地表睇，星星嘅光弱到能夠輕易畀雲、濕氣同空污粒子遮蔽；光污染亦都會阻礙人睇星，喺多街燈等人造光源嘅都市帶，光污染足以令到地表嘅人睇唔到星星。

視乎上述呢啲因素，用肉眼睇得到嘅星星數量，由幾百到幾千粒不等。順帶一提，其實恆星之間喺發嘅光嘅色彩上都可以有異，熱－講緊開氏 25,000 度左右－嘅恆星傾向射藍色光，而好似太陽呢啲凍嘅恆星就唔同，太陽嘅表面溫度得嗰開氏 5,800 幾度左右，主要射白色嘅光，不過星星嘅色彩就噉用肉眼難以睇得出[1][13]。

好多人睇星嗰陣都會數星星。一般嚟講，喺冇架生用嘅情況下數星星係冇可能數得晒嘅，因為星星數量太多，而且齋靠人手亦冇方法知道邊粒星數咗邊粒未，而且暗啲嘅星星仲有可能因為觀察者冇集中眼光而消失，睇星嘅人如果想數星星通常會帶埋星圖[歐 5]同望遠鏡等嘅架生，星圖會提供資訊，使用者可以得知喺某一個地點每一個時間點天上，會見到乜嘢星星，仲有係呢啲星會喺咩位置[14]。

星座

[編輯]
内文：星座

星座[歐 6]係指天球當中嘅其中一橛，包含若干粒星星，而且因為嗰橛入面嗰啲星星排列嘅規律，有人覺得佢似某一樣事物而同佢命名。

喺古代，人造光源較少，古人夜晚嗰時可以輕易睇星，好多時仲會發揮佢哋嘅想像力，幫星座改名同想像呢啲星座背後有咩故事。例如大犬座[歐 7]噉，就因為有人覺得佢嗰幾粒星，畫線連埋有少少似隻狗噉嘅形而得名，而古希臘嘅傳說話大犬座查實係獵戶座[歐 8]養嗰隻狗[15]。

同一個星座入面嘅星星可以相距好遠。例如天狼星係大犬座嘅一部份，但大犬座嘅星星當中有啲離天狼星整整幾光年咁遠[16]。

銀河

[編輯]
内文：銀河

銀河[歐 9]係包含太陽系嘅星系，望落好似天上一條會發光嘅河噉：太空入面有極大量嘅物質，包括恆星、星際塵埃同暗物質呀噉。好多時，一大柞噉嘅物質會因為重力而聚埋一齊，形成星系；唔同星系喺恆星數量上可以爭好遠，有啲係 108 粒，而 1014 粒恆星嘅都有，彼此間因為重力嘅作用而圍住星系嘅中心公轉；銀河係太陽系所屬嗰個星系，結構上呈牒形，而太陽帶住地球等嘅行星圍住銀河中心公轉。由地球嘅角度嚟睇，銀河望落就好似一條長帶噉形[17][18]。

銀河有相當嘅光度，不過廿一世紀初嘅城市帶，通常都會因為光污染，而無法用肉眼觀察銀河[19]。

銀河嘅獨特外形，自古以嚟就引起人類嘅幻想。例如中國就有牛郎織女嘅故事，相傳身為人類嘅牛郎同身為仙女嘅織女相遇並且墮入愛河，但因為人仙相戀犯天規而俾天界阻止，王母娘娘變條銀河出嚟分隔佢哋，限佢哋淨係喺每年嘅農曆七月初七先可以喺條鵲橋上面相會－呢個傳說就係傳統節日七姐誕嘅起源[20]。

2005 年一晚，喺加州死亡谷影到嘅全景；相入面睇到條銀河劃過夜空。

行星

[編輯]

行星係圍住恆星公轉嘅天體，本身唔會點發光，但可以反射恆星照落去佢哋度嘅光。一般嚟講，喺地球上會見到嘅行星，淨係得太陽系中其餘嘅行星－太陽系內嘅行星，本身嘅表面已經可以反射光，有大氣層嘅，其大氣層又會散射同反射陽光，呢啲反射嘅陽光有啲會射落地球度，地表嘅人可以睇到，而且有啲時候呢啲行星嘅衛星，會因為喺行星嘅影像上留低陰影而可以用望遠鏡觀察到。一粒行星由地表睇嘅光度，視乎好多因素而定－粒行星同地球嘅距離以及佢本身反射幾多光[註 6]等，都會影響佢望落有幾光[21]。

當中金星係由地球望落最耀眼嘅行星：一來金星離地球近，喺公轉途中金星同地球嘅距離可以只得 38,000,000 公里[22]；二來金星離太陽近，所以會受大量陽光照射；三來金星仲有好厚嘅大氣層，會反射大量陽光－據估計，射落金星嘅陽光大約有 70 至 80% 嘅都俾金星反射，相比之下，例如火星只會反射大約三成嘅陽光[23]。上述因素令金星成為由地表望落光度第三高嘅天體，只次於太陽同月亮[24][25]。不過除咗金星，地表嘅人亦有可能用肉眼睇到火星、水星、木星同土星－只要天氣夠好、光污染程度夠低而且啱時間，例如粒行星咁啱公轉到離地球近嘅位置，就有可能[21]。

月亮

[編輯]
内文：月亮

月亮係地球唯一一個自然衛星，透過反射陽光，成為地球夜空中最光嘅天體：月亮本身唔識發光，只係能夠反射太陽嘅光；月亮會一路圍住地球公轉，一路反射射落佢度嘅陽光，月相會喺呢個過程當中變化－視乎太陽、地球同月亮之間成乜角度，月亮可以望落全黑，是謂新月，但隨住佢公轉，佢會慢慢變成滿月－月亮成個面都受到陽光照射，喺地表嘅人會睇到圓形嘅大月亮[26]。

不過月亮反射光嘅能力唔強－據估計，射落月亮嘅陽光得大約 13% 會反射，相對於金星嘅 70% 反射率，就算係滿月，月亮由地表睇嘅光度都淨係得太陽嘅 400,000 分之一左右[27]。

月亮因為受到地球嘅重力影響，而有潮汐鎖定嘅現象：月亮會圍住地球公轉之餘，又會自轉；潮汐鎖定意思係話，月亮嘅公轉週期同自轉週期差唔多一樣咁長－都係大約 27.3 日左右；亦即係話，月亮長期都係同一面對住地球[26]。

第啲物體

[編輯]
一九九七年一晚拍攝到嘅彗星

夜空仲會有以下嘅物體。

黃道光係天上有時會出現嘅微弱白光，由太陽嘅方向擴散開去，常見於春天日落之後嘅暮光同秋天日出之前嘅曙光。呢種現象源於行星際空間，即係太陽系行星之間嘅太空，呢啲空間入便有啲塵埃粒子喺度散射陽光[28]。

流星體係指太空入面嘅碎岩石，有細有大。有陣時會有流星體跌入地球嘅大氣層，同大氣層磨擦而著火發光，成為流星。絕大多數嘅流星體都好細小，一係就喺大氣層入面完全燒到冇晒，一係就燒到好細粒，細到就算撞落地表都唔足以造成任何明顯嘅破壞；流星雨則係大量流星體跌入地球大氣層嘅現象[29]。

彗星[歐 10]係太陽系入面一啲由冰等嘅嘢組成嘅細小物體，彗星接近太陽嗰陣會受熱，並且產生氣體，形成極其微弱嘅大氣層，而呢股大氣層可以因為太陽風等嘅刺激而發光，形成一條「尾」而其長度可以係地球直徑嘅十五倍長；如果粒彗星夠光，地表嘅人就有可能睇得到佢噴氣體、有條掃把噉形嘅尾嘅樣[30]。

人造衛星係由人射上近地球嘅軌道，用嚟做通訊等目的嘅機械。人造衛星離地球相對近，可以係離地表得嗰幾萬公里遠[註 7]；佢哋會一定程度上反射陽光，所以地表嘅人有可能用肉眼望得到。夜空中見到人造衛星常見於日落後冇耐或者日出之前冇耐，視乎種類，人造衛星可以郁得好快，有可能會喺一兩分鐘內就橫跨成個夜空[31]。

此外，仲有雲、飛機、不明飛行物體等，而星雲假如夠光，都有可能用肉眼觀察[32]。

相關文化

[編輯]
呢幅油畫描繪畫家想像中嘅夜空女神倪克斯。
十九世紀日本畫家月岡芳年畫嘅牛郎織女
睇埋：星座同睇星

神話傳說

[編輯]

希臘神話

[編輯]
睇埋：倪克斯

古希臘人同古羅馬人嘅信仰入面，有對夜空作出各種幻想。古希臘人同古羅馬人往往將夜空當中嘅天體當成眾神嘅象徵，例如好大粒嘅木星，古希臘人就視之為眾神之首宙斯嘅代表，而各星座喺希臘神話入面都有相關嘅古仔，例子有獵戶座同大犬座之間嘅主人寵物關係噉[33]。

倪克斯[歐 11]個名喺古希臘文入邊係夜晚噉解，佢係希臘神話入面象徵夜空嘅神秘女神。古希臘人嘅文獻鮮有提到倪克斯，但佢依然有相當嘅地位：希臘神話相傳話，倪克斯生於宇宙嘅極初期，有某啲版本甚至話佢係同宇宙一齊誕生嘅，而且有力影響睡眠、死亡同黑暗等嘅力量；根據傳說，倪克斯生得靚之餘又法力高強，連眾神之王宙斯都對佢又敬又畏－有歷史學家指，古希臘人將夜空女神想像成好似夜空一樣，壯麗又神秘[33][34]。

牛郎織女

[編輯]
内文：牛郎織女

牛郎織女係中國古代講銀河起源嘅民間故事。個古仔係噉嘅：傳說喺好耐好耐之前，有個叫做牛郎嘅孤兒，佢跟亞哥亞嫂生活；牛郎亞嫂好刻薄，佢有日將九隻牛交俾牛郎，叫佢帶十隻牛返屋企，如果唔係就𢴒佢走。但牛郎好彩得到高人指點，喺山上發現咗隻有病嘅老牛，及後牛郎發現老牛原來係被打落凡間嘅金牛星，於是就將佢帶返屋企。後嚟牛郎得到老牛指點，搵到下凡仙女沖涼同玩嘅地方，佢同咁啱下凡玩嘅織女邂逅，兩人墮入愛河，後嚟仲生埋對龍鳳胎。但因為人仙相戀犯天規，織女俾神仙扚返去天界。深愛老婆嘅牛郎靠老牛嘅力量上天界搵織女，王母娘娘用佢頭上嘅銀簪變條銀河出嚟擋佢嘅去路，但天上嘅喜鵲俾牛郎嘅愛情感動咗，化作鵲橋，等牛郎可以跨過銀河同織女團聚。而王母娘娘亦都俾佢哋打動咗，下令每年七月初七，牛郎織女可以喺鵲橋相會，成為咗牽牛星同織女星。呢個傳說就係七姐誕嘅由來；而傳統上，東亞各地嘅婦女喺農曆七月初七嗰陣，都會向七姐—即係織女—獻祭，求自己可以有佢嗰對擅長編織嘅巧手同良緣[35]。

文學

[編輯]

自古以嚟，月亮同星星等夜空嘅景象周不時都會引起文人嘅讚嘆，賦予佢哋作詩嘅靈感。例如唐詩當中都有多首描寫星月夜空嘅詩[36]：

杜甫《旅夜書懷》

細草微風岸，危檣獨夜舟。
星垂平野闊，月涌大江流。
名豈文章著，官應老病休。
飄飄何所似，天地一沙鷗。

用現代粵語解詩：

微風吹拂江岸嘅草，有高桅杆嘅小船喺黑夜當中孤零零噉停泊。
星星垂喺天邊，令平野顯得寬闊；月光隨波涌動，大江滾滾東流。
我唔通係因爲文章而出名嘅咩？年老多病都應該休官喇。
自己到處漂泊似啲乜呢？就好似天地間一隻孤零零嘅沙鷗[37]。

杜牧《秋夕》

銀燭秋光冷畫屏，輕羅小扇撲流螢。
天階夜色涼如水，臥看牽牛織女星。

用現代粵語解詩：

秋天嘅夜晚，精美嘅銀色蠟燭發出微弱嘅光，為畫屏添咗幾分清冷之色；
一位宮女手執綾羅小扇，輕輕噉撲打飛舞嘅螢火蟲。
天階上嘅夜色清涼好似水噉；
坐榻仰望星空，只見牽牛星同織女星[38]。

畫藝

[編輯]
睇埋：星夜

傳統嘅西方藝術時常會描繪夜空：歐洲人畫家成日都會喺描述歷史大事[註 8]嗰陣用到夜空，又時會喺描繪宗教或奇幻題材嗰時用黑夜製造神秘感，用夜空象徵恐懼、死亡、哀愁、秘密同超自然力量等嘅主題[39]。

描繪夜空嘅西洋畫當中最出名嘅要數荷蘭畫家梵高[歐 12]喺一八八九年完成嘅作品星夜[歐 13]：星夜畫嘅係天上面有好多星星嘅夜晚，係後印象派嘅代表作品，亦係西方藝術史上最出名嘅畫作之一[40]。

夜空魅影

[編輯]
2014 年 3 月 17 號喺日本群馬縣草津白根山影到嘅夜空快鏡；嗰度光污染程度低，所以人能夠清楚噉睇到天上嘅銀河同眾多星星。

睇埋

[編輯]

註釋

[編輯]
  1. ↑ 指燈等人造嘅光照亮夜空嘅現象。
  2. ↑ 因為太陽風吹襲地球而形成嘅。
  3. ↑ 喺現代科學上，占星術經已證實咗係偽科學，不過間接推動咗古人研究天文。
  4. ↑ 太陽都係恆星。
  5. ↑ 查實呢啲星星彼此之間，閒閒地相距幾光年。
  6. ↑ 呢點取決於粒行星嘅大氣層等嘅諸多因素。
  7. ↑ 對照：月亮離地球大約 384,400 公里遠
  8. ↑ 中世紀歐洲藝術嘅常見題材
  9. ↑ 棟建築物係閩南建築嘅例子。

歐詞

[編輯]
  1. ↑ scatter
  2. ↑ evening twilight
  3. ↑ luminosity
  4. ↑ Sirius
  5. ↑ sky map
  6. ↑ constellation
  7. ↑ Canis Major
  8. ↑ Orion
  9. ↑ Milky Way
  10. ↑ comet
  11. ↑ 希臘文：Νύξ / Nyx
  12. ↑ Vincent Willem van Gogh
  13. ↑ The Starry Night

引咗

[編輯]
  1. 1 2 3 Kolláth, Z. (2010). Measuring and modelling light pollution at the Zselic Starry Sky Park. In Journal of Physics: Conference Series (Vol. 218, No. 1, p. 012001). IOP Publishing.
  2. ↑ Harrison, E. R. (1987). Darkness at night: A riddle of the universe. Harvard University Press.
  3. ↑ How To See the Milky Way – Dark Site Finder. National Geographic.
  4. 1 2 Weaver, D. (2011). Celestial ecotourism: New horizons in nature-based tourism. Journal of Ecotourism, 10(1), 38-45.
  5. ↑ Thagard, Paul R. (1978). "Why Astrology is a Pseudoscience". Proceedings of the Biennial Meeting of the Philosophy of Science Association. 1: 223–234.
  6. ↑ C.F. Bohren, D. Huffman, Absorption and scattering of light by small particles, John Wiley, New York 1983. Contains a good description of the asymptotic behavior of Mie theory for small size parameter (Rayleigh approximation).
  7. ↑ Fish, D. J., & Jones, R. L. (1995). Rotational Raman scattering and the ring effect in zenith‐sky spectra. Geophysical Research Letters, 22(7), 811-814.
  8. ↑ Hunten, D. M., Morgan, T. H., & Shemansky, D. E. (1988). The mercury atmosphere. Mercury, 562-612.
  9. ↑ Mateshvili, Nina; Didier Fussen; Filip Vanhellemont; Christine Bingen; Erkki Kyrölä; Iuri Mateshvili; Giuli Mateshvili (2005). "Twilight sky brightness measurements as a useful tool for stratospheric aerosol investigations". Journal of Geophysical Research. 110 (D09209): D09209.
  10. ↑ Xavier Kerola, D. (2006). Modelling artificial night-sky brightness with a polarized multiple scattering radiative transfer computer code. Monthly Notices of the Royal Astronomical Society, 365(4), 1295-1299.
  11. ↑ Garstang, R. H. (1984). Improved scattering formula for calculations of artificial night-sky illumination. The Observatory, 104, 196-197.
  12. 1 2 Liebert, J.; Young, P. A.; Arnett, D.; Holberg, J. B.; Williams, K. A. (2005). "The Age and Progenitor Mass of Sirius B". The Astrophysical Journal. 630 (1): L69-L72.
  13. ↑ Colors of Stars.
  14. ↑ Swerdlow, N. M. (August 1986). "A Star Catalogue Used by Johannes Bayer". Journal for the History of Astronomy. 17 (50): 189–197.
  15. ↑ Canis Major Constellation. Constellation Guide.
  16. ↑ Allen, Richard Hinckley. (1899). Star-Names And Their Meanings, G. E. Stechert, New York, New York, U.S.A., hardcover; reprint 1963 as Star Names: Their Lore and Meaning, Dover Publications, Inc., Mineola, New York, U.S.A.
  17. ↑ Gerhard, O. (2002). "Mass distribution in our Galaxy". Space Science Reviews. 100 (1/4): 129–138.
  18. ↑ Gillessen, S.; et al. (2009). "Monitoring stellar orbits around the massive black hole in the Galactic Center". Astrophysical Journal. 692 (2): 1075-1109.
  19. ↑ Crumey, Andrew (2014). "Human contrast threshold and astronomical visibility". Monthly Notices of the Royal Astronomical Society. 442 (3): 2600-19.
  20. ↑ 袁珂編著《中國神話傳說辭典》，華世出版社印行。
  21. 1 2 When, Where and How to See the Planets in the 2020 Night Sky. Space.com.
  22. ↑ How Far is Venus from Earth?.
  23. ↑ Albedo of the Planets.
  24. ↑ Why is Venus so bright?.
  25. ↑ Marov, M. J., Marov, M. I., Marov, M. A., Marov, M. Y., & Grinspoon, D. H. (1998). The Planet Venus. Yale University Press.
  26. 1 2 Buick, Tony; Pugh, Philip (2011). How to Photograph the Moon and Planets with Your Digital Camera. Springer.
  27. ↑ How Bright is the Moon . . . Exactly?. Sky & Telescope.
  28. ↑ Reach, W. T. (1997). "The structured zodiacal light: IRAS, COBE, and ISO observations". Diffuse Infrared Radiation and the Irts. 124: 1.
  29. ↑ Rubin, Alan E.; Grossman, Jeffrey N. (January 2010). "Meteorite and meteoroid: New comprehensive definitions". Meteoritics & Planetary Science. 45 (1): 114-122.
  30. ↑ Ishii, H. A.; et al. (2008). "Comparison of Comet 81P/Wild 2 Dust with Interplanetary Dust from Comets". Science. 319 (5862): 447–50.
  31. ↑ Satellite orbits.
  32. ↑ The Eyes Have it — Deep-Sky Observing Without Equipment. Sky & Telescope.
  33. 1 2 Gantz, Timothy (1993). Early Greek Myth: A Guide to Literary and Artistic Sources. Johns Hopkins University Press.
  34. ↑ Christopoulos, M., Levaniouk, O., & Karakantza, E. D. (Eds.). (2010). Light and darkness in ancient Greek myth and religion (pp. 66-67). Lanham, MD: Lexington Books.
  35. ↑ Mao, Xian. Cowherd and Weaver and other most popular love legends in China. eBook: Kindle Direct Publishing. 2013.
  36. ↑ 詩人們有多喜歡星星？——細數唐詩中的美麗星辰 互聯網檔案館嘅歸檔，歸檔日期2020年3月16號，.。
  37. ↑ 旅夜書懷，讀古詩網。
  38. ↑ 秋夕，讀古詩網。
  39. ↑ Steer, Isabella. (2002). The History of British Art. Bath: Parragon.
  40. ↑ Moyer, Edward (14 February 2012). "Interactive canvas lets viewers stir Van Gogh's 'Starry Night'". CNET News. Retrieved 12 June 2015. ...one of the West's most iconic paintings: Vincent van Gogh's 'The Starry Night.'

拎

[編輯]
由「https://zh-yue.wikipedia.org/w/index.php?title=夜空&oldid=2467998」收