廣三鐵路

行喺廣三鐵路嘅N595次列車

廣三鐵路（gwong2 saam1 tit3 lou6；英文：Canton-Samshui Railway），又叫廣三綫gwong2 saam1 sin3，係中國廣東一條鐵路，最初叫三佛鐵路saam1 fat6 tit3 lou6，係條大清時起好嘅鐵路。廣三線家下由廣州市石圍塘站起，駁到去佛山市三水區三水南站，總長49千米。經營權歸廣州鐵路集團所有。

三佛鐵路個名，顧名思義，係三水到佛山嘅鐵路，不過查實係由廣東省城（後尾叫廣州）到三水，當時係諗住起粵漢鐵路支綫，所以又叫省佛支路saang2 fat6 zi1 lou6。

史

1898年（大清光緒廿四年）鐵路督辦大臣盛宣懷，同埋駐美國公使伍廷芳，同美國合興公司簽約，借錢起當時係諗住起粵漢鐵路支綫，即係三佛鐵路。

傾嗰陣，發覺省城、佛山到三水地平，難度到低，比較經濟。而佛山係經濟重鎮，而省城係華南大港，三水又係西、北、綏三江匯集，水路交通發達，經濟效益好。

首先係起省城到佛山一段。當時佛山鎮屬南海縣，而省城同南海之間，隔住條珠江。所以決定駁船渡江。水文測量之後，南海一邊揀咗石圍塘，而對面省城係黃沙碼頭，因為呢處水比較慢，啱駁船用。由石圍塘起，開五個站，有五眼橋，奇槎，韶邊，橫滘，最後到佛山。中間其實有過點頭站。省城到佛山全長16.5千米。

1901年（光緒廿七年）正月，省佛段動工，10月通車。好快起埋三佛段。三水境內，有三水同西南兩個站。1903年，即大清光緒廿九年，12月10號，三佛鐵路正式通車，全長48.9千米。

美方合興公司，違返條約，私自賣畀第三國。所華方收回鐵路自辦，注銷合同，畀675萬美金畀美方。因為呢次湖南、湖北、廣東三省商人集資贖回三佛鐵路，所以改名三省鐵路，自此中國就有商辦鐵路。

民國二年（1913年）民國政府交通部，派羅崇鹷為總辦，將湖南、湖北兩省股份收歸國有，重受晒三省鐵路一切開支。因為此又改名廣三鐵路。當其時，石圍塘到佛山，綫短收入大，係世界之冠。

路綫

家下路綫係石圍塘火車站、三眼橋站、奇槎站、佛山東站、佛山站、街邊站、上柏站、小塘站、小塘西站、走馬營站、三水站（拆咗）、三水南站。

喺三眼橋可以駁廣茂聯絡線，通去廣州站同京廣線，而喺三水，就可以駁三茂線。廣三鐵路實際係駁埋中國東西兩便鐵路。

客車經過廣三鐵路，可以到廣西、雲南、貴州、四川、重慶方向。而喺2007年4月18號，重駁通埋海南。

舊時係用蒸汽火車，家下全綫重未電氣化，重用柴油火車。

火車頭

大清同民國時期都係用蒸汽火車頭。而共和國時期就轉用柴油火車頭。

共和國

曾經用過嘅火車頭

• 東風3型內燃機車
• 前進型蒸汽機車
• 上游型蒸汽機車

家下用緊嘅火車頭

• 東風4B型內燃機車（DF4B）
• 東風5型內燃機車（DF5）
• 東風4C客運型內燃機車（DF4CK）
• 東風11供電型內燃機車（DF11G）