沙田至中環綫

沙田至中環綫 - 2007年7月兩鐵合併方案。

沙田至中環綫（簡稱沙中綫，Shatin to Central Link，簡稱SCL）係香港鐵路有限公司起緊嘅路綫嘅其中一條。路綫分開兩大部份：大圍去紅磡段同埋過海段。成個計劃由沙田區嘅大圍站開始，經過新起嘅顯徑站去到鑽石山，再經啟德新發展區、土瓜灣去紅磡站。同東鐵綫交匯之後，再經第四條過海鐵路去香港島嘅會展，最後用金鐘做終站。計劃包括起6個新車站（大圍去紅磡段：顯徑、啟德、宋皇臺、土瓜灣、何文田；過海段：會展）、重新起過紅磡站同埋擴建鑽石山站加埋金鐘站。

路線走向

根據運輸及房屋局同埋港鐵公司提供嘅資料，沙田至中環綫將會由大圍至紅磡段同埋過海段組成。大圍至紅磡段由現時馬鞍山綫大圍站以南開始伸延，經鑽石山、啟德、宋皇臺、土瓜灣、何文田去到紅磡站，連接西鐵綫九龍南綫一段。過海段就由現時東鐵綫紅磡站開始，經過海隧道到香港島，途經會展站，並且用金鐘做終站。

兩段總長度大約有17公里。大圍至啟德預計喺2020年2月14號通車，啟德至紅磡預計最遲2021年第三季通車。過海段就分兩期，第一期會將而家東鐵綫旺角東去紅磡嘅一段改行地底，預計喺2021年完成。第二段就因為要遷就灣仔填海計劃第二期同埋中環灣仔繞道嘅規劃，去到2022年第一季先至可以啟用。同一時間，觀塘綫由油麻地站延長去黃埔站，並且喺何文田站同沙中綫交匯。觀塘綫延綫喺2016年10月23號落成啟用。

到時，沙中綫將連接好多條現有鐵路線，形成兩條貫通香港南北、東西嘅策略性鐵路走廊：

• 東西走廊（屯馬綫）－由屯馬綫一期、新起嘅啟德至紅磡段同埋西鐵綫組成，由烏溪沙去屯門；
• 南北走廊（東鐵綫）－由東鐵綫同埋新起嘅過海段組成，由金鐘去邊境嘅羅湖同埋落馬洲。

出面網頁

• 沙中綫網頁