集合心靈

集合心靈嘅想像圖：好多個肉體上分離嘅個體，共享同一個心靈（或者腦）。

集合心靈，又叫集體心靈或者共同心靈，係科幻常用嘅一條橋段，指由多個個體組成、但思想與意志高度統一甚至共享嘅集體意識系統，簡單講即係多個個體「共用」同一個心靈，共享思緒、記憶同埋感受。到咗廿一世紀初，集合心靈依然係科幻同奇幻嘅範疇，不過就引起咗唔少科學家思考。

基本概念

内文：心靈同心靈感應

睇埋：科幻橋段

喺廿一世紀初，集合心靈係常見嘅科幻橋段，意即「好多個心靈集合埋一齊，形成一個大心靈」。集合心靈講緊嘅唔係一班人有心靈感應能力咁簡單，而係佢哋每個個體嘅思維彼此無間，能夠一齊諗嘢同時直接分享思緒，有陣時甚至仲可能完全冇晒個體意識，由同一個心靈或者腦操控。喺科幻作品中，集合心靈常見於強大但缺乏人性嘅存在體，例如講到昆蟲噉形嘅外星人具有集合心靈，其中一個個體見到（或者以其他方式感受到）某樣嘢，就等如集合心靈中嘅其他個體冚唪唥都感受到，佢哋甚至可以完全喪失個體性，會毫不猶豫噉犧牲自己嚟幫助群體達到目的。

例如想像：

喺未來世界，有一種名為神經網（英文：NeuroWeb）嘅技術，所有人都可以裝腦部接口，連接住全球網絡，將資訊 download 落個腦度。起初大家只係用佢做即時通訊，方便學習同工作。不過隨住技術發展，有啲社群決定完全融合思維，變成一個共同意識體。

例如 XX 聯盟就係噉。佢哋所有成員嘅腦都用神經網連埋一齊，可以即時知道彼此嘅情緒、思緒、甚至記憶。當某個成員學識新技能，其他人都會即時學識；當一個人有情緒問題，整個集體都會即刻知。決策唔再由單一人負責，而係由集體意識推演出最理性嘅方案。

呢種虛構故仔往往可以引起唔少人思考：例如當所有人思想都完全一致嘅時候，啲個體仲有冇自我？

用咗集合心靈或者類似橋段嘅具體例子：

• 《新世紀福音戰士》：補完計劃想將全人類嘅意識融合成一個整體，無分彼此，類似集合心靈。
• 《攻殼機動隊》：尤其係攻殼機動隊 STAND ALONE COMPLEX。
• 《星空奇遇記》

等等。

科學思考

呢大竇蜜蜂，成個群體望落有些少似有智能嘅噉。集合心靈喺英文入便其中一個名（hive mind）可以理解為蜜蜂竇式心靈嘅意思。

睇埋：群體智能同社會性

截至二〇二〇年代為止，人類仲未有科技做到集合心靈。

喺廿一世紀初嘅生物學界，有所謂嘅超生物概念。超生物體係指一啲由群居物種形成嘅整體，彷彿好似一隻隻統一嘅「大生命體」噉。譬如蜜蜂噉，一個蜜蜂竇包含成千上萬隻工蜂同兵蜂，仲有一隻蜂后，佢哋各自分工合作、共同維持整個群體嘅生存。由外便睇，一個蜜蜂竇好似本身係一個個體噉，有齊各種生命定義上有嘅特徵—蜜蜂竇有能力維持自身存在，工蜂會搵食，兵蜂會保護個竇，蜂后負責猛咁生蛋，甚至乎可以當佢係做緊決策。其他具有真社會性嘅生物都係噉。呢種現象引起咗唔少學者重新思考生物呢個概念應該點界定，亦令唔少人聯想到集合心靈。

好多自然同社會現象睇落都好似由某啲嘢中央控制噉，但唔表示呢啲現象有類似集合心靈嘅嘢喺背後操控。譬如喺個體為本模型（ABM）相關嘅討論中，研究者會行電腦模擬，模擬大量自主個體之間嘅互動，觀察佢哋喺指定規則下所產生嘅集體行為。呢啲模型其中一個重要諗頭，就係好多望落似由中央控制嘅整體規律，查實可以源自基層個體之間嘅互動規則，冇必要用集合心靈或者「有某啲嘢喺背後，做中央控制」噉嘅概念嚟解釋。

睇埋

• 心靈感應
• Cyberpunk
• 群體智能
• 腦機介面

參考

註解：

篇文引用咗以下呢啲文獻同網頁：

拎

• （英文） 集合心靈，電視橋段網