種群樽頸

Y 軸係個種群嘅個體數量，而 X 軸係時間。
Bottleneck event—引起樽頸嗰件事件；
Recovery—恢復返；
Extinction—絕埋種。

種群樽頸（粵拼：zung2 kwan4 zeon1 geng2；英文：population bottleneck）係進化論上嘅一個概念，指一個種群因為一啲災難事件，搞到短時間內有好多—例如講緊起碼 50%—嘅個體死亡或者喪失生殖嘅能力，因而令到個種群數目勁跌。常見嘅「災難事件」有饑荒、瘟疫或者山火呀噉。

種群樽頸好多時都會搞到一種物種絕種。就算個物種最後數目恢復返，種群樽頸都會搞到佢哋一嘢唔見咗好多「可以傳落下一代」嘅基因，呢點成日會引致個種群基因多樣性下跌，或者加劇基因漂變嘅現象。

如果讀者遇到唔識嘅概念，可以去參考吓進化論。

動物案例

獵豹

2005 年影到嘅一隻獵豹

獵豹（學名：Acinonyx jubatus）被指係佢哋進化史上經歷過種群樽頸。事實表明，好多跡象顯示獵豹嘅基因多樣性唔夠高：獵豹之間好多時就算直接做植皮都唔會引起免疫反應（反映個體之間嘅喺遺傳上唔係爭咁遠），又成日對啲病冇抵抗力；而且獵豹公仲成日出現精子濃度唔夠或者精子畸型等嘅問題；有科學家推測，獵豹喺大約 10,000 年前嘅對上一個冰河時期嗰陣經過咗種群樽頸，加上長時間嘅近親繁殖，搞到佢哋好唔夠基因多樣性。

人類

有唔少科學家都有研究喺人類當中發生過嘅種群樽頸。

根據一份 1999 年做嘅研究，大約二百萬年前，直立人（homo eretus）啱啱開始出現嗰時，一班南猿之間曾經出現過種群樽頸。

一份2023年喺《科學》期刊出版嘅研究就推算話，80萬年前左右因為極端氣候嘅關係，早期人類遇上咗種群樽頸，由大概10萬人跌到淨低千幾人。即係話，現代人類嘅祖先試過幾近滅種，而且人口數字之後11萬年都冇起色。不過有科學家覺得，海德堡人嘅出現就係源自於呢次種群樽頸，佢哋可能係我哋同尼安德特人嘅共同祖先。

而一份 2005 年嗰陣做嘅研究就話，1492 年打前美洲大陸嘅土著，全部都係嚟自一群喺對上一次冰河時期由亞洲經陸橋行到去美洲嘅人，而呢個古老族群估計得嗰 70 個人咁少，造成美洲土著基因多樣性唔夠。

第啲動物

• 歐洲野牛（Bison bonasus）：據講現存嘅族群源自於一個得 12 隻個體咁少嘅種群。
• 美洲野牛（Bison bison）：喺 1890 年代，佢哋嘅數量曾少過 1,000 隻。
• 華南虎（Panthera tigris amoyensis）
• 柴犬：喺二戰期間柴犬爭啲完全絕咗種咁滯。

睇埋

• 人工選擇
• 集體絕種

拎

• 維基同享中有關種群樽頸嘅資源類